ជាច្រើនលើកច្រើនសា ចិនតែងស្នើផ្តល់វ៉ាក់សាំងប្រឆាំងជំងឺកូវីដ-១៩ ទៅតៃវ៉ាន់ និងអំពាវនាវឱ្យជនរួមជាតិខ្លួននៅតៃវ៉ាន់ មកទទួលវ៉ាក់សាំងនៅចិនដីគោក។ ប៉ុន្តែសំណើទាំងនោះ ត្រូវបានរដ្ឋាភិបាលក្រុងតៃប៉ិ ច្រានចោលជាបន្តបន្ទាប់។ 

 

បើទោះរដ្ឋាភិបាលតៃវ៉ាន់បានបដិសេធក៏ដោយ ប្រជាជនតៃវ៉ាន់នៅតែទៅចិន ដើម្បីទៅទទួលវ៉ាក់សាំង។ នៅក្នុងសន្និសីទសារព័ត៌មាន អ្នកនាំពាក្យការិយាល័យកិច្ចការតៃវ៉ាន់របស់ក្រុមប្រឹក្សារដ្ឋចិន អ្នកស្រី Zhu Fenglian  បានអះអាងថា ប្រជាជនតៃវ៉ាន់ច្រើនជាង ១៥៦០០០នាក់ បានទទួលវ៉ាក់សាំងបង្ការជំងឺកូវីដ-១៩ នៅចិន។

 

«យើងអាចឃើញថា វាពិតជាពិបាកណាស់ ក្នុងការទទួលបានវ៉ាក់សាំងនៅតៃវ៉ាន់»។ អ្នកស្រី Zhu បានសង្កត់ធ្ងន់បែបនេះ ដោយបន្ថែមថា ចិននឹងព្យាយាមឱ្យបានល្អបំផុត ដើម្បីជនរួមជាតិចិន ក្នុងការប្រយុទ្ធប្រឆាំងនឹងជំងឺឆ្លងសកល និងទទួលបានវ៉ាក់សាំងបង្ការជំងឺកូវីដ-១៩។ 

 

អ្នកនាំពាក្យចិនរូបនេះ ក៏បានអំពាវនាវឱ្យបក្សវឌ្ឍនភាពប្រជាធិបតេយ្យ របស់លោកស្រីប្រធានាធិបតីតៃវ៉ាន់ Tsai Ing-wen បញ្ឈប់ការធ្វើនយោបាយលើវិទ្យាសាស្រ្ត និងផ្តោតអាទិភាពលើប្រជាជន ដើម្បីការពារសុខភាពប្រជាជន។ អ្នកស្រី Zhu ក៏បានរិះគន់តៃវ៉ាន់ផងដែរ ដែលចង់ស្វះស្វែងរកឯករាជ្យ តាមរយៈការប្តូរឈ្មោះការិយាល័យរបស់ខ្លួននៅទីក្រុងវ៉ាស៊ីនតោន។ តៃវ៉ាន់ ត្រូវបានរាយការណ៍ថា ព្យាយាមប្តូរការិយាល័យអ្នកតំណាងវប្បធម៌ និងសេដ្ឋកិច្ចក្រុងតៃប៉ិ ទៅការិយាល័យតំណាងតៃវ៉ាន់។ 

 

មកទល់ពេលនេះ តៃវ៉ាន់មានករណីឆ្លងជំងឺកូវីដ-១៩ សរុបចំនួន ១៦១០៣នាក់ និងអ្នកស្លាប់មានចំនួន ៨៣៩នាក់។ មិនតែប៉ុណ្ណោះ តៃវ៉ាន់ បានផ្តល់វ៉ាក់សាំងចំនួន ១២,៥លានដូស ដោយប្រជាជនចំនួន ១,០៦លាននាក់ បានទទួលវ៉ាក់សាំងពេញលេញ៕