ការសន្យាផ្តល់ជំនួយវ៉ាក់សាំងបន្ថែមចំនួន៣០លានដូសដល់ប្រទេសក្រីក្រ ជាផ្នែកមួយនៃការចូលរួមរបស់ជប៉ុនជាមួយសហគមន៍អន្តរជាតិដើម្បីធានាថា ប្រទេសក្រីក្រអាចទទួលបានវ៉ាក់សាំងសម្រាប់ប្រយុទ្ធប្រឆាំងនឹងជំងឺកូវីដ-១៩។ ជាមួយការផ្តល់ជំនួយបន្ថែម កញ្ចប់ជំនួយវ៉ាក់សាំងរបស់ជប៉ុនកើនដល់ជាង៦០លានដូសហើយ បូករួមថវិកា១ពាន់លានដុល្លារទៀតដល់កម្មវិធី COVAX ។
 

«ជប៉ុនបានផ្តល់វ៉ាក់សាំងការពារជំងឺកូវីដ-១៩ ចំនួន២៣លានដូសដល់ប្រទេសផ្សេងៗនៅទូទាំងពិភពលោក និងជាអ្នកផ្តល់វ៉ាក់សាំងធំបំផុតទីបីនៅលើពិភពលោករហូតមកដល់ពេលនេះ»។ លោក ស៊ូហ្គាយូស៊ីហ៊ីដេ បានលើកឡើងក្នុងសន្និសីទកំពូលស្ដីពីជំងឺកូវីដ-១៩ ។
 

ការបរិច្ចាគវ៉ាក់សាំងរបស់ជប៉ុនរហូតមកដល់ពេលនេះ ភាគច្រើនគឺតាមរយៈកិច្ចព្រមព្រៀងទ្វេភាគីជាមួយប្រទេសផ្សេងៗជាជាងតាមកម្មវិធី COVAX ។ វ៉ាក់សាំងដែលជប៉ុនផ្តល់ឱ្យជាជំនួយដល់ប្រទេសនានាភាគច្រើនជាវ៉ាក់សាំងផលិតក្នុងស្រុករបស់ក្រុមហ៊ុន AstraZeneca ។
 

ផ្ទុយទៅវិញ ជប៉ុនពឹងផ្អែកខ្លាំងលើការនាំចូលវ៉ាក់សាំងប្រភេទ mRNA ពីក្រុមហ៊ុន Pfizer និង Moderna សម្រាប់ចាក់ជូនពលរដ្ឋខ្លួន។ តាមទិន្នន័យពីរដ្ឋាភិបាល បច្ចុប្បន្នប្រជាជនជប៉ុនប្រមាណ ៥៥ ភាគរយនៃប្រជាជនសរុបបានចាក់វ៉ាក់សាំងរួចរាល់ហើយ។
 

គួររំលឹកថា នៅថ្ងៃទី២២ ខែកញ្ញាប្រធានាធិបតីអាម៉េរិក ចូ បៃឌិន បានសន្យា បរិច្ចាគវ៉ាក់សាំងបង្ការជំងឺកូវីដ-១៩ ចំនួន៥០០លានបន្ថែមទៀតដល់ប្រទេសក្រីក្រនៅជុំវិញពិភពលោក។ ក្នុងកិច្ចប្រជុំស្តីពីជំងឺកូវីដ-១៩ លោកក៏បានអំពាវនាវឱ្យរាល់ប្រទេសអ្នកមាន ក៏ដូចជាសម្ព័ន្ធមិត្តចូលរួមបរិច្ចាគវ៉ាក់សាំងដើម្បីកាត់បន្ថយវិសមភាពនៃការចែកចាយវ៉ាក់សាំងផងដែរ៕