នាពេលថ្មីៗនេះ មានវីដេអូស្រី្តខ្មែរម្នាក់ ស្នើសុំសមត្ថកិច្ចជួយសង្គ្រោះ ចេញពីគ្រួសារខាងប្ដីដែលនៅប្រទេសចិន ឲ្យត្រឡប់មកកម្ពុជាវិញ។ ក្នុងវីដេអូដែលចែកចាយបន្តគ្នា លើបណ្ដាញសង្គម ស្រី្តរងគ្រោះរូបនោះថា នាងរងការវាយធ្វើបាប និងបិទសិទ្ធិ មិនឲ្យទាក់ទងជាមួយក្រុមគ្រួសារនៅកម្ពុជា។ 

 

ក្រោយឃើញវីដេអូតាមបណ្ដាញសង្គម ក្រុមការងារបានស្រាវជ្រាវរកទីតាំងជនរងគ្រោះ និងក្រុមគ្រួសារស្ត្រីរងគ្រោះ។ បន្ទាប់មកក៏បានរកឃើញ ក្រុមគ្រួសារ និងព័ត៌មានលម្អិតស្រី្តរងគ្រោះនោះ មានឈ្មោះ អាត់ ស្រុកសំរោងទង ខេត្តកំពង់ស្ពឺ។ សមត្ថកិច្ចជំនាញ ក៏បានបញ្ជូនព័ត៌មានជនរងគ្រោះបន្ត ទៅក្រសួងការបរទេស និង

និងសហប្រតិបត្តិការអន្តរជាតិ ដើម្បីជួយអន្តរាគមន៍។ នេះបើតាមការចេញផ្សាយរបស់នាយកដ្ឋានប្រឆាំងការជួញដូរមនុស្ស និងការពារអនីតិជន។

 

មន្ត្រីជំនាញបានស្រាវជ្រាវរកឃើញអាសយដ្ឋានស្នាក់នៅរបស់នារីរងគ្រោះ គឺនៅក្រុងណានឆាង ខេត្តជាំងស៊ី ប្រទេសចិន កាលពីថ្ងៃទី២០កញ្ញា ។ បន្ទាប់មក មន្រី្តស្ថានទូតកម្ពុជាប្រចាំប្រទេសចិន បានសហការជាមួយអាជ្ញាធរប្រទេសចិន ក៏បានជួយសង្គ្រោះនារីរងគ្រោះ ដោយជោគជ័យ។ បច្ចុប្បន្ន ជនរងគ្រោះមានសុវត្ថិភាព ជាមួយនឹងនគរបាលចិន និងត្រៀមបញ្ជូនត្រឡប់មកកម្ពុជាវិញ។ 

 

អ្នកនាំពាក្យក្រសួងការបរទេស លោក កុយ គួង បានបញ្ជាក់ថា ៦ខែ ឆ្នាំ២០២១នេះ អាជ្ញាធរបានជួយស្ត្រីខ្មែររងគ្រោះនៅចិន២៣១នាក់ ។ លោកថា ស្ត្រីខ្មែររងគ្រោះទាំងនោះ ភាគច្រើន ចាញ់បោកមេខ្យល់នាំទៅរៀបការជាមួយបុរសចិន។ «ភាគច្រើននៅពេលការរស់នៅ (ចិន) ទីនោះ មិនសូវបានសេចក្តីសុខដូចការរំពឹងទុក ដូចមេខ្យល់និយាយបោកប្រាស់ហ្នឹង ពួកគាត់(ស្រ្តីខ្មែរ)ទាំងនោះ ក៏ទាក់ទងមកស្ថានតំណាងកម្ពុជា នៅទីនោះជួយគាត់ឱ្យត្រឡប់មកវិញ»។ នេះបើតាមលោក កុយ គួង។

 

ក្រៅពីស្រ្តីរងគ្រោះនៅចិន ២៣១នាក់នេះ ក៏មានពលរដ្ឋខ្មែរប្រមាណ២ពាន់នាក់ទៀត ដែលស្ថានទូតកម្ពុជា បានជួយសង្គ្រោះពួកគេ នៅរយៈពេល៦ខែនេះដែរ ក្នុងនោះរួមមាន ពលរដ្ឋខ្មែរ ៣៣២នាក់ មកពីម៉ាឡេស៊ី និង១ ៦០៨ មកពីថៃ រួមទាំងប្រទេសផ្សេងទៀត។ នេះបើតាមអ្នកនាំពាក្យក្រសួងការបរទេស៕