ការបិទខ្ទប់និងវិធានការរឹតបន្តឹងផ្សេងៗដែលធ្វើឡើងក្នុងគោលបំណងកាត់បន្ថយការរីករាលដាលនៃជំងឺកូវីដ-១៩ បានប៉ះពាល់សេដ្ឋកិច្ចហ្វីលីពីនយ៉ាងដំណំ ជាមួយទំហំខូចខាតច្រើន។ ប្រជាជនក្នុងប្រទេសអាស៊ីអាគ្នេយ៍មួយនេះរាប់លាននាក់ បាត់បង់ការងារ ហើយគ្រួសារជាច្រើនធ្លាក់ខ្លួនកាន់តែយ៉ាប់យ៉ឺន។

 

«ការចំណាយសរុបទៅលើជំងឺកូវីដ-១៩ និងថ្លៃធ្វើចត្តាឡីស័ក្កនឹងត្រូវប្រើរយៈពេលវែងពី១០ទៅ៤០ ឆ្នាំខាងមុខដើម្បីស្តាឡើងវិញ ពីព្រោះការខាតបង់នេះអាចកើនឡើងដល់៨១០ពាន់លានដុល្លារ»។ រដ្ឋមន្ត្រីផែនការសេដ្ឋកិច្ចហ្វីលីពីន Karl Kendrick Chua អះអាងថាបែបនេះ មុនវាយតម្លៃថា ពលរដ្ឋហ្វីលីពីនជំនាន់នេះ និងជំនាន់ក្រោយមួយទៀត ជាអ្នករ៉ាប់រងថ្លៃចំណាយទាំងនេះ។ តួលេខនេះគឺច្រើនជាងផលិតផលក្នុងស្រុកសរុបទ្វេដងរបស់ហ្វីលីពីននៅឆ្នាំ ២០២០ ដែលធនាគារពិភពលោកព្យាករថាមានចំនួន៣៦១,៥ពាន់លានដុល្លារអាម៉េរិក។ 

 

លោក Chua បន្តថា ការប្រើប្រាស់ ការវិនិយោគ និងចំណូលពន្ធ នឹងពិបាកងើបឡើងវិញដោយសារច្បាប់រក្សាគម្លាតសុវត្ថិភាពរារាំងវិស័យសំខាន់ៗដូចជាទេសចរណ៍និងភោជនីយដ្ឋានពីការបើកដំណើរការឡើងវិញ។ ជាមួយគ្នានេះ ផលិតភាពទាបដែលបណ្តាលមកពីការស្លាប់ ជំងឺ ឬការបិទសាលារៀនអំឡុងវិបត្តិកូវីដ-១៩ ក៏ទំនងជាមានផលប៉ះពាល់ជាអចិន្រ្តៃយ៍។ 

 

ទោះជាយ៉ាងណា មន្រ្តីរដ្ឋាភិបាលរូបនេះ អះអាងថា នៅឆ្នាំ២០២១ សេដ្ឋកិច្ចហ្វីលីពីនត្រូវរំពឹងថា នឹងកើនឡើងពី៤ទៅ៥ ភាគរយវិញ បន្ទាប់ពីធ្លាក់ចុះខ្លាំងដល់ទៅ៩,៦ភាគរយនៅឆ្នាំ ២០២០។ ​ប៉ុន្តែ ហ្វីលីពីន ត្រូវចំណាយពេល១០ឆ្នាំដើម្បីវិលត្រឡប់ទៅកំណើនសេដ្ឋកិច្ចមុនការផ្ទុះជំងឺកូវីដ-១៩ ។ មុនមានជំងឺនេះ  ​កំណើនសេដ្ឋកិច្ចក្នុងរយៈពេល ១០ មានជាមធ្យម៦,៤ភាគរយ។

 

មកទល់ពេលនេះ ហ្វីលីពីនមានអ្នកឆ្លងជំងឺកូវីដ-១៩សរុបជាង២,៥លាននាក់ និងស្លាប់ចំនួន៣៨ពាន់នាក់។ ត្រឹមតែជាងមួយភាគបួននៃប្រជាជនពេញវ័យប៉ុណ្ណោះ ត្រូវបានចាក់វ៉ាក់សាំងពេញលេញ៕