អន្តរជាតិ
ស្ត្រីអាម៉េរិកវ័យ១០១ឆ្នាំ បន្តប្រកបរបរចាប់បង្កង ដោយគ្មានគម្រោងចូលនិវត្តនោះឡើយ
លោកយាយ Virginia Oliver នៅតែរីករាយ_បន្ត_របរចាប់បង្កងក្នុងសមុទ្រ ទោះមានអាយុ_១០១ឆ្នាំក៏ដោយ។ រូបថត AP
×![]()
ដោយ: ធីតា
ស្ត្រីអាម៉េរិកឈ្មោះ Virginia Oliver បានប្រឡូករបរចាប់បង្កងនៅសមុទ្រជាមួយឪពុកតាំងពីអាយុ៨ឆ្នាំមកម្ល៉េះ។ បច្ចុប្បន្នវ័យ១០១ឆ្នាំទៅហើយ គាត់នៅបន្តប្រកបរបរនេះជាមួយកូនប្រុសអាយុ៧៨ឆ្នាំ និងគ្មានបំណងឈប់សម្រាកនោះឡើយ។
ចាប់ផ្តើមតាំងពីមុនសង្គ្រាមលោកលើកទីពីរ កុមារី Oliver បានដើរតាមឪពុករបស់ខ្លួន រុករកបង្កងនៅតំបន់ឆ្នេរថ្ម ក្នុងរដ្ឋ Maine។ នៅពេលនោះ សញ្ញាចរាចរណ៍អគ្គិសនីផ្សេងៗ មិនទាន់ត្រូវបានបង្កើតនោះឡើយ ហើយស្ត្រីតិចតួចបំផុតដែលបានប្រឡូកក្នុងរបរចាប់បង្កង។
ឈានដល់វ័យ១០១ឆ្នាំ ស្ត្រីរូបនេះ បន្តប្រកបរបរដដែល នៅទីតាំងទឹកដដែលក្នុងក្រុង Rockland ជាមួយ Max កូនប្រុសបង្កើតអាយុ៧៨ឆ្នាំរបស់ខ្លួន។ ពួកគេប្រើប្រាស់ទូកដែលជាកេររបស់ស្វាមី។
តាមការផ្សាយរបស់ AP លោកយាយ Oliver គ្មានបំណងចូលនិវត្តនោះឡើយ ប៉ុន្តែគាត់បារម្ភពីការនេសាទធនធានបង្កងដ៏ច្រើនសន្ធឹកសន្ធាប់នៅ Maines។ «ខ្ញុំប្រកបរបរនេះ ពេញមួយជីវិតរបស់ខ្ញុំ ដូច្នេះខ្ញុំត្រូវតែបន្តធ្វើវា»។
នារយៈពេលជាច្រើនទសវត្សរ៍កន្លងមកនេះ លោកយាយបានមើលឃើញពីការវិវត្តលើមធ្យោបាយប្រើប្រាស់ផ្សេងៗ ដោយដើមឡើងលោកយាយចាប់ដោយប្រើឈើធម្មតា ប៉ុន្តែពេលនេះ វាត្រូវបានជំនួសដោយអន្ទាក់អគ្គិសនី។
លោកយាយអាចធ្វើអ្វីៗដោយខ្លួនឯងជាច្រើន រួមទាំងការបញ្ជាទូកផងដែរ ហើយក៏ធ្លាប់របួសម្រាមដៃរហូតដល់ដេរ៧ថ្នេរផងដែរ។ គ្រូពេទ្យ និងមិត្តភក្តិ បានស្តីថាឲ្យគាត់ ហេតុអ្វីបានជាបន្តចេញទៅរកបង្កង? លោកយាយ Oliver ឆ្លើយដោយខ្លីថា ពីព្រោះគាត់ចង់បន្តរបរឪពុករបស់ខ្លួន៕
© រក្សាសិទ្ធិដោយ thmeythmey.com
