អន្តរជាតិ
ប្រឡងក្របខណ្ឌគ្រូ! ឥណ្ឌាចាប់បានបេក្ខជន១០នាក់ដែលលួចបង្កប់ Bluetooth ក្នុងស្បែកជើងផ្ទាត់
រូបថត AFP
×![]()
ដោយ: ធីតា
នៅឥណ្ឌា មនុស្ស១០នាក់ត្រូវបានចាប់ខ្លួន ពីបទរៀបចំគម្រោងលួចចម្លងវិញ្ញាសា ក្នុងការប្រឡងជ្រើសរើសក្របខណ្ឌគ្រូបង្រៀនកាលពីថ្ងៃអាទិត្យ ទី២៦ ខែកញ្ញា។ បើតាមការផ្សាយរបស់ទីភ្នាក់ងារព័ត៌មាន AFP អ្នកទាំងនោះ សុទ្ធតែបានលួចបង្កប់ឧបករណ៍ Bluetooth ក្នុងស្បែកជើងផ្ទាត់របស់ខ្លួន។
បេក្ខជនប្រមាណ១,៦លាននាក់នៅរដ្ឋ Rajasthan ត្រៀមប្រឡងប្រជែងដើម្បីទទួលបានឱកាសក្លាយជាគ្រូបង្រៀន។ ដោយសារតែការប្រឡងត្រូវរឹតបន្តឹង ហើយប៉ូលិសមានគ្រប់បែបយ៉ាងក្នុងការដកហូតមធ្យោបាយទំនាក់ទំនងដែលភ្ជាប់អ៊ីនធ័រណិត បេក្ខជនដែលមានគំនិតខិលខូច មានវិធីសាស្ត្រកាន់តែទំនើបបន្ថែមទៀត។
តាមការស៊ើបអង្កេត ប៉ូលិសបានស្រាវជ្រាវឃើញមនុស្សមួយក្រុម បានរៀបចំផែនការលួចចម្លង តាមរយៈការលួចបង្កប់ឧបករណ៍ Bluetooth នៅក្នុងស្បែកជើងផ្ទាល់ ហើយបន្តភ្ជាប់ប្រព័ន្ធគ្មានខ្សែទៅនឹងឧបករណ៍ស្តាប់ដែលបង្កប់ក្នុងត្រចៀក។ បច្ចេកវិទ្យានេះ អាចធ្វើឲ្យបេក្ខជនទាក់ទងទៅអ្នកសមគំនិតនៅខាងក្រៅ ដើម្បីផ្តល់ចម្លើយវិញ្ញាសា។
លោក Priti Chandra មន្ត្រីប៉ូលិសប្រចាំក្រុង Bikaner បានបញ្ជាក់ប្រាប់ AFP ថា បេក្ខជន១០នាក់ស្ថិតក្រោមការសង្ស័យ ហើយត្រូវបានចាប់ខ្លួននៅក្រៅបន្ទប់ប្រឡងនាល្ងាចមួយថ្ងៃមុនការប្រឡង ក្រោយស្រាវជ្រាវឃើញឧបករណ៍ដែលពួកគេបានលាក់បង្កប់ទុកក្នុងស្បែកជើងផ្ទាត់។
លោកបានលើកឡើងថា សមត្ថកិច្ចតែងតែរឹតបន្តឹងដើម្បីទប់ស្កាត់ការលួចចម្លងតាមប្រព័ន្ធអ៊ីនធ័រណិត ហើយករណីលួចបង្កប់ឧបករណ៍ Bluetooth ក្នុងស្បែកជើង និងត្រចៀកនេះ ជាករណីថ្មី និងទំនើបបំផុតផងដែរ។
ការស៊ើបអង្កេតបន្តបន្ទាប់ បានរកឃើញបេក្ខជនយ៉ាងហោចណាស់២៥នាក់ បានទិញស្បែកជើងផ្ទាត់ដែលបង្កប់បច្ចេកវិទ្យា Bluetooth ដោយក្រុមជនសង្គមងងឹតលក់ក្នុងតម្លៃ៦០ម៉ឺនរូពី (ជាង៨០០០ដុល្លារអាមេរិក)។
ក្រោយការកើតឡើងករណីនេះ មណ្ឌលប្រឡងជាច្រើននៅឥណ្ឌា បានតម្រូវឲ្យបេក្ខជនដោះស្បែកជើងទុកនៅក្រៅបន្ទប់ប្រឡង៕
Tag:
អប់រំ
ប្រឡង
គ្រូបង្រៀន
© រក្សាសិទ្ធិដោយ thmeythmey.com
