ភ្នំពេញ ថ្ងៃទី១១ ខែតុលា ឆ្នាំ២០២១៖ ECAM LaSalle មានមោទកភាពក្រៃលែង ក្នុងការប្រកាសអំពីការបើកដំណើរការជាផ្លូវការ នៃឆ្នាំសិក្សាទី១ នៃថ្នាក់អនុបណ្ឌិតផ្នែកវិស្វកម្មផលិតកម្មប្រកបដោយនិរន្តរភាពដំបូងគេនៅកម្ពុជា ដោយសហការជាមួយវិទ្យាស្ថានបច្ចេកវិទ្យាកម្ពុជា (ITC)។
ពិធីសម្ពោធជាផ្លូវការបានប្រព្រឹត្តទៅ នៅថ្ងៃចន្ទ ទី១១ ខែតុលា ឆ្នាំ២០២១ វេលាម៉ោង ៩ ព្រឹក ក្នុងបរិវេណវិទ្យាស្ថាន ITC ដោយមានការគាំទ្រ និងវត្តមានរបស់រដ្ឋមន្ត្រីក្រសួងអប់រំនៃព្រះរាជាណាចក្រកម្ពុជា លោក ហង់ ជួនណារ៉ុន ព្រមទាំងមន្ត្រីតំណាងឯកអគ្គរដ្ឋទូតបារាំង លោក Fabrice Etienne និងវត្តមានលោក Didier Desplanche នាយកផ្នែកគ្រប់គ្រងនៅ ECAM Lasalle, លោក អ៊ុម រម្យណី អគ្គនាយកវិទ្យាស្ថាន ITC, លោក សៀង ផេន នាយកផ្នែកកិច្ចការអន្តរជាតិនៃវិទ្យាស្ថាន ITC រួមទាំងសាស្ត្រាចារ្យ និស្សិតឆ្នាំទី ១ ជំនាន់ទីមួយ និងមន្ត្រីតំណាងជាច្រើនរូបទៀតមកពីកម្ពុជា និងបារាំង។
«ថ្ងៃទី ១១ ខែតុលា ឆ្នាំ២០២១នេះ នឹងក្លាយជាថ្ងៃទីមួយ នៃការសម្ពោធកម្មវិធីអន្តរជាតិ ECAM Engineering ដោយសហការជាមួយវិទ្យាស្ថានបច្ចេកវិទ្យាកម្ពុជា (ITC)។ វាជាថ្ងៃដ៏មានសារៈសំខាន់ ដែលបញ្ជាក់ពីការខិតខំអស់រយៈពេលជាច្រើនខែ ដើម្បីរៀបចំថ្ងៃបង្រៀនទីមួយនេះ សម្រាប់ថ្នាក់ដែលមាននិស្សិតច្រើនជាតិសាសន៍។ ថ្ងៃនេះ ក៏ជាឱកាសស្វាគមន៍លោករដ្ឋមន្ត្រីក្រសួងអប់រំ យុវជន និងកីឡា ដើម្បីជានិមិត្តរូប នៃការរំពឹងទុកខ្ពស់ចំពោះកម្មវិធីបណ្ដុះបណ្ដាលផ្នែកវិស្វកម្មនេះ នៅក្នុងព្រះរាជាណាចក្រកម្ពុជា។ នេះជាកម្មវិធីដំបូងបំផុតក្នុងប្រទេសនេះ។ យើងសង្ឃឹមថា នឹងបំពេញតាមក្ដីសង្ឃឹម និងការរំពឹងទុករបស់សហគ្រាស យុវជន គ្រួសារ និងនាំមកជូនជំនាញបន្ថែម ដល់ព្រះរាជាណាចក្រកម្ពុជា។ ខ្ញុំសូមថ្លែងអំណរគុណជាពិសេស ដល់ក្រុមការងារទាំងមូល នៃវិទ្យាស្ថាន ITC ចំពោះការប្ដេជ្ញាចិត្តដ៏គួរឱ្យកត់សម្គាល់ និងការជឿជាក់របស់ពួកគេ លើគម្រោងអប់រំនេះ។ ខ្ញុំក៏សូមថ្លែងអំណរគុណ ដល់អគ្គនាយកវិទ្យាស្ថាន ITC គឺលោក អ៊ុម រម្យណី ដែលបានជឿជាក់តាំងពីដំបូង លើគុណតម្លៃពិសេសនៃកម្មវិធីនេះ រួមជាមួយគុណភាពបណ្ដុះបណ្ដាល ការបើកទូលាយ អន្តរជាតូបនីយកម្ម និងសហគ្រិនភាព។ ថ្ងៃនេះក៏ជាសមិទ្ធផលដ៏សំខាន់ សម្រាប់ ECAM Lasalle ក្នុងការអភិវឌ្ឍលក្ខណៈអន្តរជាតិរបស់យើង។ ECAM មានចក្ខុវិស័យជួយធ្វើឱ្យពិភពលោកកាន់តែមានមនុស្សធម៌ មានទំនួលខុសត្រូវ និងមាននិរន្តរភាព តាមរយៈការអប់រំ វិទ្យាសាស្ត្រ និងបច្ចេកវិទ្យា។ យើងមានមោទកភាពក្រៃលែង ក្នុងការផ្សព្វផ្សាយចក្ខុវិស័យរបស់យើង នៅព្រះរាជាណាចក្រកម្ពុជា ដែលជាការអភិវឌ្ឍលក្ខណៈអន្តរជាតិ នៅក្រៅប្រទេសបារាំងជាលើកទីមួយរបស់យើង។ យើងមានគោលដៅឈោងចាប់កិច្ចសហការប្រភេទនេះ និងរួមចំណែកអភិវឌ្ឍពិភពអប់រំ វិទ្យាសាស្ត្រ និងការអភិវឌ្ឍបុគ្គលិកលក្ខណៈក្នុងប្រទេសផ្សេងទៀត ដោយជួយយុវជនវ័យក្មេងឱ្យត្រៀមខ្លួនសម្រាប់ពិភពលោកជំនាន់ក្រោយ។»
Didier Desplanche នាយកផ្នែកគ្រប់គ្រងនៅ ECAM Lasalle មានប្រសាសន៍ថា កម្មវិធីអប់រំអន្តរជាតិទ្រង់ទ្រាយធំពិតប្រាកដ ស័ក្តិសមនឹងបើកដំណើរការនៅកម្ពុជា ដើម្បីឱ្យការបណ្ដុះបណ្ដាលធនធានមនុស្ស ដែលមានគុណភាពបំពេញតាមតម្រូវការរបស់ទីផ្សារសេរីក្នុងប្រទេសយើង ដើម្បីជំរុញការអភិវឌ្ឍសហគ្រាសខ្នាតតូច និងមធ្យម។ ក្រុមហ៊ុនទាំងនេះគឺជាសសរស្ដម្ភ សម្រាប់ទ្រទ្រង់ការអភិវឌ្ឍសេដ្ឋកិច្ចជាតិ ប្រកបដោយនិរន្តរភាព ដែលជាក់ស្ដែងមានឥទ្ធិពល លើគោលនយោបាយយុទ្ធសាស្ត្រចតុកោណ ដំណាក់កាលទី ៤ ដែលនឹងជួយឱ្យព្រះរាជាណាចក្រនេះ ក្លាយជាប្រទេសមានប្រាក់ចំណូលបង្គួរ នៅឆ្នាំ ២០៣០ និងមានប្រាក់ចំណូលខ្ពស់នៅឆ្នាំ ២០៥០។
ដើម្បីសម្រេចគោលដៅនេះ វិទ្យាស្ថានបច្ចេកវិទ្យាកម្ពុជា (ITC) និងសាលាវិស្វកម្ម Ecam LaSalle បានព្រមព្រៀងបង្កើតឱ្យមានក្នុងស្រុក នូវកម្មវិធីអន្តរជាតិពិសេសមួយនៅវិទ្យាស្ថាន ITC ដែលជាកម្មវិធីដំបូងគេ ក្នុងប្រទេសនេះ ដែល ECAM ចង់ពង្រីកទៅក្នុងតំបន់អាស៊ីអាគ្នេយ៍។ សម្រាប់ពេលនេះ កម្មវិធីសិក្សាអន្តរជាតិនេះ បើកថ្នាក់អនុបណ្ឌិតតែពីរជម្រើសប៉ុណ្ណោះគឺ៖ រ៉ូបូតនិងស្វ័យប្រវត្តិកម្ម និងការគ្រប់គ្រងខ្សែចង្វាក់ផ្គត់ផ្គង់ និងឧស្សាហកម្ម។
ជំនាន់ទីមួយ ចាប់ផ្ដើមនៅថ្ងៃទី ១១ ខែតុលា ឆ្នាំ ២០២១ ដោយមាននិស្សិត ១៦ នាក់ ហើយក្នុងចំណោមនោះមាន ៣ នាក់ មកពីបារាំង និងម្នាក់មកពីអេហ្ស៊ីប។
ខ្ញុំក៏សូមឆ្លៀតឱកាសនេះ ដើម្បីលើកឡើងអំពីតួនាទីដ៏សកម្ម របស់ភ្នាក់ងារសាកលវិទ្យាល័យប្រើប្រាស់ភាសាបារាំង (AUF) ដែលចូលរួមក្នុងកម្មវិធីនេះ តាមរយៈជំនួយហិរញ្ញវត្ថុរបស់ខ្លួន សម្រាប់ការផ្ទេរគ្រូបង្រៀនទៅទិសដៅទាំងពីរ ពោលគឺពីកម្ពុជាទៅបារាំង និងពីបារាំងមកកម្ពុជា។ ក្នុងនាមជានាយកផ្នែកទំនាក់ទំនងអន្តរជាតិ ខ្ញុំមានទំនុកចិត្តថាវិទ្យាស្ថាន ITC និង ECAM LaSalle នឹងផ្ដល់កម្មវិធីសិក្សាកម្រិតអនុបណ្ឌិត ដែលមានគុណភាពដល់និស្សិតកម្ពុជា ក៏ដូចជានិស្សិតបរទេសផងដែរ ហើយថ្នាក់អនុបណ្ឌិតនេះ នឹងទាក់ទាញនិស្សិតកាន់តែច្រើន ក្នុងរយៈពេលប៉ុន្មានឆ្នាំខាងមុខ។»
ក្នុងនោះដែរ លោក សៀង ផេន នាយកផ្នែកកិច្ចការអន្តរជាតិ នៃវិទ្យាស្ថាន ITC។
ថ្នាក់វិស្វកម្មជាភាសាបារាំងដំបូងគេនៅកម្ពុជា ដែលមានគុណភាពលំដាប់ “វិទ្យាស្ថានឧត្តមសិក្សាបារាំង”។
ចាប់ពីថ្ងៃទី១១ ខែតុលា ឆ្នាំ២០២១ កម្មវិធីដែលមានរយៈពេល ៣ឆ្នាំនេះ នឹងបើកថ្នាក់សញ្ញាបត្រពីរគឺ អនុបណ្ឌិតពី ECAM Engineering និងអនុបណ្ឌិតពីវិទ្យាស្ថាន ITC។
កម្មវិធីនេះ គឺជាកម្មវិធីសិក្សាដែលមានភាពច្នៃប្រឌិត ផ្អែកលើគ្រឹះស្ថានឯកទេសនានា រួមបញ្ចូលគ្នា៖ ECAM LaSalle ដែលជាសាលាវិស្វកម្មឯកជនចំណាត់ថ្នាក់លេខ ២ និងវិទ្យាស្ថានបច្ចេកវិទ្យាកម្ពុជា (ITC ដែលជាសាកលវិទ្យាល័យវិស្វកម្មចម្បងគេនៅកម្ពុជា)។
សម្រាប់ជំនាន់ទី ១ នេះមាននិស្សិតអន្តរជាតិ ១៦នាក់ ដោយក្នុងចំណោមនោះមាន ១២ នាក់មកពីកម្ពុជា ៣ នាក់មកពីបារាំង និង ១នាក់ មកពីអេហ្ស៊ីប បានចុះឈ្មោះក្នុងកម្មវិធីនេះ។
កម្មវិធីសិក្សានេះ នឹងរួមចំណែកក្នុងការជំរុញប្រព័ន្ធអេកូ នៃកម្រិតឧត្តមសិក្សាឱ្យរីកចម្រើនមួយកម្រិតទៀតនៅកម្ពុជា ដោយច្របាច់បញ្ចូលគ្នា នូវចំណេះដឹង និងវិធីសាស្ត្រធ្វើការពីវិទ្យាសាស្ត្រវិស្វកម្ម និងការអភិវឌ្ឍបុគ្គលិកលក្ខណៈ និងការគ្រប់គ្រងមកអនុវត្ត។ វាក៏ជំរុញការបើកទូលាយ ជាអន្តរជាតិផងដែរ។
ដោយបង្រៀនជាភាសាអង់គ្លេសទាំងស្រុង និស្សិតកម្ពុជា ក៏នឹងមានឱកាសសិក្សាភាសាបារាំងផងដែរ ដើម្បីទទួលបានកម្រិត B2 នៅពេលបញ្ចប់កម្មវិធីនេះ។ និស្សិតមួយចំនួន នឹងអាចទទួលបានអាហារូបករណ៍ ទៅសិក្សានៅប្រទេសបារាំងថែមទៀតផង។
ដោយអភិវឌ្ឍជំនាញវិជ្ជាជីវៈ ការអនុវត្ត និងបទពិសោធន៍ (ថ្នាក់ពិសោធន៍ គម្រោង និងកម្មសិក្សាជាច្រើន ជាមួយស្ថាប័នឯកជន) កម្មវិធីសិក្សានេះ នឹងផ្ដល់ជំនាញឯកទេស ផ្នែកវិស្វកម្ម និងបច្ចេកទេសបន្តិចម្ដងៗ។
នៅឆ្នាំចុងក្រោយ និស្សិតនឹងអាចជ្រើសរើសឯកទេស៖ វិស្វកម្មឧស្សាហកម្ម និងការគ្រប់គ្រងខ្សែចង្វាក់ផ្គត់ផ្គង់ ឬរ៉ូបូតនិងវិស្វកម្មផ្នែកស្វ័យប្រវត្តិកម្ម។
"ខ្ញុំបានសម្រេចចិត្តចូលសិក្សាក្នុងកម្មវិធីរបស់ ECAM Engineering ដោយសារវាជាកម្មវិធីផ្នែកវិស្វកម្មដ៏ពិសេស និងមានតិចតួចបំផុតនៅកម្ពុជា ដែលផ្ដល់សញ្ញាបត្រពីរដល់យើង ដោយសញ្ញាបត្រមួយ ចេញដោយវិទ្យាស្ថាន ITC និងមួយទៀតចេញដោយ ECAM LaSalle។ លើសពីនេះ និស្សិតក៏នឹងមានឱកាសដកស្រង់បទពិសោធន៍ យ៉ាងហោចណាស់មួយឆមាស នៃកម្មវិធីរបស់ពួកគេ នៅប្រទេសបារាំងផងដែរ។” ហេង សុថន អាយុ ២១ ឆ្នាំ ជានិស្សិតផ្នែកវិស្វកម្មមេកានិក មកពីវិទ្យាស្ថាន ITC បានថ្លែងដូច្នេះ។
ព័ត៌មានលម្អិតទាំងស្រុងអំពីកម្មវិធីនេះ
ECAM ENGINEERING
វិស្វកម្មឧស្សាហកម្ម និងការគ្រប់គ្រងខ្សែចង្វាក់ផ្គត់ផ្គង់ | រ៉ូបូត និងវិស្វកម្មផ្នែកស្វ័យប្រវត្តិកម្ម សញ្ញាបត្រពីរចេញដោយ ECAM LaSalle / ITC
ការតម្រែតម្រង់ផ្លូវសម្រាប់អនាគតនៃបដិវត្តន៍ឧស្សាហកម្មទី ៤ នៅកម្ពុជា៖
ថ្វីបើមានជំងឺកូវីដក៏ដោយ បរិបទនៃការពន្លឿនដំណើរការពាណិជ្ជកម្មសកល និងសមាហរណកម្មតំបន់អាស៊ានរបស់កម្ពុជា គឺជាតថភាពជាក់ស្ដែងសម្រាប់ព្រះរាជាណាចក្រកម្ពុជា។
រចនាឡើងជាពិសេស ដើម្បីដោះស្រាយបញ្ហាទីផ្សារកំពុងអភិវឌ្ឍ ដែលប្រឈមនឹងផលិតកម្មឧស្សាហកម្ម កាន់តែច្រើនឡើងៗ ដែលត្រូវតែអនុលោមតាមលក្ខខណ្ឌតម្រូវ នៃការអភិវឌ្ឍប្រកបដោយនិរន្តរភាព កម្មវិធីថ្នាក់អនុបណ្ឌិតថ្មីនេះ នឹងរំពឹងទុកជាមុន នូវតម្រូវការវិស្វករ និងប្រធានប្រតិបត្តិកម្រិតខ្ពស់ ដែលអាចដឹកនាំវិស័យផលិតកម្ម ឆ្ពោះទៅរកបដិវត្តន៍ឧស្សាហកម្មទី ៤ ដោយផ្ដោតជាពិសេសលើធនធានអភិរក្ស របស់ព្រះរាជាណាចក្រនេះ។
ថ្នាក់អនុបណ្ឌិតនេះ នឹងអប់រំនិស្សិតជាពិសេស ដើម្បីបញ្ជ្រាបបច្ចេកវិទ្យាឌីជីថល ទៅក្នុងដំណើរការគ្រប់គ្រងភស្តុភារ និងផលិតកម្ម (នវានុវត្តន៍បែបឌីជីថល មេកាត្រូនិក ខ្សែចង្វាក់ផ្គត់ផ្គង់ និងភស្តុភារ) ផ្អែកលើវិធីសាស្ត្រសេដ្ឋកិច្ចជារង្វង់ ដែលមានផលប៉ះពាល់សង្គម និងបរិស្ថានតិចតួចបំផុត (វត្ថុធាតុដើម ថាមពល ទឹក កាកសំណល់ និងអនុផលិតផល)។
កម្មវិធីនេះ មានគោលដៅគាំទ្រគោលការណ៍អភិវឌ្ឍឧស្សាហកម្ម (IDP) របស់ក្រសួងឧស្សាហកម្មនៃប្រទេសកម្ពុជា។ និស្សិតបញ្ចប់ការសិក្សា នឹងអភិវឌ្ឍសមត្ថភាព និងផ្នត់គំនិតសំខាន់ៗ ដើម្បីរៀបចំការអភិវឌ្ឍផលិតកម្ម ដែលមាននិរន្តរភាពនាពេលអនាគតដោយប្រើជំនាញ និងការយល់ដឹងស៊ីជម្រៅ អំពីបញ្ហាប្រឈមផ្នែកឧស្សាហកម្ម ភាពជាអ្នកដឹកនាំ ការគ្រប់គ្រងគម្រោង និងនវានុវត្តន៍ ដែលនឹងផ្ដល់ឱកាសឱ្យពួកគេ ក្នុងវិស័យកំពុងរីកចម្រើនជាច្រើន (ឧស្សាហកម្ម នវានុវត្តន៍ ហេដ្ឋារចនាសម្ព័ន្ធ ។ល។)។
ប្រវត្តិរូបផ្ទាល់ខ្លួន និងបច្ចេកទេសលក្ខណៈអន្តរជាតិរបស់ពួកគេ នឹងត្រូវបានទទួលស្គាល់ខ្លាំងក្នុងទីផ្សារសកល។
“ការបើកដំណើរការកម្មវិធី Ecam LaSalle ក្នុងទីក្រុងលីយ៉ុង នៅវិទ្យាស្ថានបច្ចេកវិទ្យាកម្ពុជា គឺជាឱកាសពិសេសសម្រាប់និស្សិតកម្ពុជា និងបារាំង ក្នុងការបន្តការបណ្ដុះបណ្ដាលផ្នែកវិស្វកម្មរួមគ្នា តាមរយៈវិធីសាស្ត្របង្រៀនច្រើនមុខវិជ្ជាៈ និងមានភាពច្នៃប្រឌិត។ សេវាកម្មស្ថានទូត រួមទាំងវិទ្យាស្ថានភាសាបារាំង បានតាមដានការចាប់កំណើត នៃគម្រោងនេះអស់រយៈពេលជាច្រើនខែ ដោយសង្កត់ធ្ងន់លើពហុភាសានិយមផងដែរ។”
Christophe Gigaudaut
ទីប្រឹក្សាផ្នែកកិច្ចសហប្រតិបត្តិការ និងកិច្ចការវប្បធម៌នៃស្ថានទូតបារាំង ទីក្រុងភ្នំពេញ ប្រទេសកម្ពុជា
"ទីផ្សារកម្ពុជា គឺជាគោលដៅដែលមានភាពទាក់ទាញខ្លាំង សម្រាប់សហគ្រិន និងសាជីវកម្មបរទេស ជាពិសេសសហគ្រិន និងសាជីវកម្ម ដែលមានប្រភពនៅប្រទេសបារាំង។ កង្វះធនធានមនុស្ស មានលក្ខណសម្បត្តិគ្រប់គ្រាន់ក្នុងស្រុក គឺជាកត្តាដាក់កំហិត ដែលយើងដឹងច្បាស់ និងជះឥទ្ធិពល ដល់ការអភិវឌ្ឍការវិនិយោគ ដែលមានគុណតម្លៃកាន់តែពិសេសនៅប្រទេសយើង។ ចំណុចនេះ រឹតតែពិតខ្លាំង នៅក្នុងវិស័យវិស្វកម្ម។ កិច្ចខិតខំប្រឹងប្រែងរបស់កិច្ចសហប្រតិបត្តិការបារាំង បានខ្នះខ្នែងដោះស្រាយស្ថានភាពនេះ អស់ច្រើនទសវត្សរ៍មកហើយ ប៉ុន្តែការផ្គត់ផ្គង់ក្រុមវិស្វករជំនាន់ថ្មី មិនអាចបំពេញតម្រូវការរបស់កំណើនទីផ្សារបានទេ។
ខ្ញុំរីករាយខ្លាំងណាស់ ដែលឃើញស្ថាប័នដើរតួនាទីដ៏លេចធ្លោបំផុត ផ្នែកវិស្វកម្មឯកជនរបស់បារាំងចូលរួម និងបំពេញបន្ថែម លើកិច្ចខិតខំប្រឹងប្រែងនេះ។ ខ្ញុំមានទំនុកចិត្តខ្ពស់ថា ECAM Lasalle នឹងទទួលបានភាពជោគជ័យនៅទីនេះ ដោយនាំមកនូវវិធីថ្មីៗ ក្នុងការបណ្ដុះបណ្ដាល និងអប់រំអ្នកជំនាញវ័យក្មេង តាមស្តង់ដារសកល ហើយខ្ញុំរឹតតែមានជំនឿចិត្តថា ថ្នាក់អនុបណ្ឌិតថ្មីនេះ ក៏ដូចជានិស្សិតដែលចូលរួម នឹងទាក់ទាញចំណាប់អារម្មណ៍ និងការគាំទ្រពីសាធារណជនទូទៅ ក្នុងសហគមន៍អាជីវកម្មបារាំង-កម្ពុជារបស់យើង។”
កែប៊ិន សូរស្មី - ប្រធានសភាពាណិជ្ជកម្មបារាំងប្រចាំទីក្រុងភ្នំពេញ នៃប្រទេសកម្ពុជា
អំពី ECAM Lasalle
ECAM Lasalle ដែលត្រូវបានបង្កើតឡើងនៅឆ្នាំ១៩០០ ត្រូវបានទទួលស្គាល់ថា ជាសាលាវិស្វកម្មកម្រិតក្រោយឧត្តមសិក្សាល្អបំផុតមួយ នៅប្រទេសបារាំង (សាលាវិស្វកម្មឯកជនជាប់លេខ ២ ក្នុងឆ្នាំ២០២០ ដែលចាត់ថ្នាក់ដោយ L’Etudiant)។ សាលានេះ គឺជាផ្នែកមួយនៃកម្មវិធីសិក្សារបស់វិទ្យាស្ថានឧត្តមសិក្សា (Grandes Ecoles)។ កម្មវិធីនេះ ផ្ដល់ឱកាសឱ្យបេក្ខជនបញ្ចប់ការសិក្សា ក្នុងរយៈពេល ៣ឆ្នាំ ដោយទទួលបានសញ្ញាបត្រពីរ៖ ថ្នាក់មេកានិក និងវិស្វកម្មអគ្គិសនី និងអនុបណ្ឌិតផ្នែកវិទ្យាសាស្ត្រ ពីសាកលវិទ្យាល័យដៃគូ ក្នុងវិស័យឯកទេសដែលនិស្សិតបានជ្រើសរើស។ និស្សិតដែលបានចុះឈ្មោះ នឹងទទួលបានអត្ថប្រយោជន៍ ពីក្រុមសាស្ត្រាចារ្យមានជំនាញ ជាអ្នកស្រាវជ្រាវដែលផ្ដោតលើវិទ្យាសាស្ត្រវិស្វកម្ម មន្ទីរពិសោធន៍ស្រាវជ្រាវអប់រំចម្រុះ មែកធាងដែលផ្ដល់ជំនាញ និងការអប់រំបន្តសម្រាប់ក្រុមហ៊ុន ក៏ដូចជាស្ថាប័នផ្ដល់ជំនួយ សម្រាប់ក្រុមហ៊ុនបង្កើតថ្មី ដែលមានសក្ដានុពលខ្លាំងផ្នែកបច្ចេកវិទ្យា។
អតីនិស្សិត ៧៥០០ នាក់ | និស្សិត ១៩០០ នាក់
(អត្ថបទពាណិជ្ជកម្ម)