វិបត្តិកូវីដ-១៩ នៅតែបន្តជះឥទ្ធិពលយ៉ាងធ្ងន់ធ្ងរដល់សេដ្ឋកិច្ចរបស់បណ្តាគ្រួសារក្រីក្រ និងងាយរងគ្រោះនៅកម្ពុជា។ អង្គការស្បៀងនិងកសិកម្មនៃសហប្រជាជាតិ(FAO) បានលើកឡើងដូច្នេះ នៅក្នុងទិវាស្បៀងអាហារពិភពលោកលើកទី៤១ ប្រចាំឆ្នាំ២០២១។ 
 

មូលហេតុដែលគ្រួសារក្រីក្រនិងងាយរងគ្រោះកំពុងប្រឈមនឹងវិបត្តិសេដ្ឋកិច្ចយ៉ាងធ្ងន់ធ្ងរនេះ គឺដោយសារតែក្រុមមនុស្សទាំងនេះ បានពឹងផ្អែកតែទៅលើប្រភពចំណូលបានពីការធ្វើស្រែចម្ការ ការស៊ីឈ្នួលលក់កម្លាំងពលកម្ម និងសកម្មភាពមិនមែនកសិកម្ម ជាដើម។ សេចក្តីប្រកាសព័ត៌មានរបស់អង្គការ FAO បានបញ្ជាក់ថា «តាមការវាយតម្លៃផលប៉ះពាល់សង្គមសេដ្ឋកិច្ច ជាងពាក់កណ្តាលនៃគ្រួសារនៅកម្ពុជាត្រូវកាត់បន្ថយបរិមាណនិងគុណភាពអាហារ ក្នុងអំឡុងពេលមានការរាតត្បាតជំងឺកូវីដ-១៩នេះ»។ 
 

បើតាមអង្គការFAOផលប៉ះពាល់សង្គមសេដ្ឋកិច្ចនេះ គឺជាភាពរាំងស្ទះដល់ការសម្រេចឱ្យបាននូវការអភិវឌ្ឍដោយចីរភាពត្រឹមឆ្នាំ២០៣០នៅកម្ពុជា។
 

ថ្ងៃទី១៦តុលានេះ ក្រសួងកសិកម្ម រួមជាមួយអង្គFAO បានរៀបចំទិវាស្បៀងអាហារពិភពលោកប្រចាំឆ្នាំនៅក្នុងខេត្តព្រៃវែង ក្រោមប្រធានបទ «សកម្មភាពយើង គឺជាអនាគតយើង ផលិតកម្មល្អ អាហាររូបត្ថម្ភល្អ បរិស្ថានល្អ នាំឱ្យជីវិតកាន់តែប្រសើរ»។

 

លោក Antonio Schiavone តំណាងស្ដីទីអង្គការFAOប្រចាំកម្ពុជាលើកឡើងថា៖« ទិវាស្បៀងអាហារពិភពលោកឆ្នាំនេះ គឺជាយុទ្ធនាការផ្សព្វផ្សាយស្បៀង ដើម្បីទាក់ទាញចំណាប់អារម្មណ៍របស់សាធារណជន ឱ្យបង្កើនការយកចិត្តទុកដាក់ ទៅលើការជ្រើសអាហារ និងរបៀបនៃការផលិត វេចខ្ចប់ ចម្អិន និងរក្សាទុកអាហារ ដែលធ្វើឱ្យយើងគ្រប់គ្នា ក្លាយជាផ្នែកសំខាន់មួយ នៃប្រព័ន្ធនេះ»។ 
 

 

សូមរម្លឹកថា កាលឆ្នាំ២០២០កម្ពុជា ប្រារព្ធទិវាស្បៀងអាហារពិភពលោកនៅក្នុងខេត្តសៀមរាប ក្រោមប្រធានបទ«រួមគ្នាផលិតស្បៀងសម្រាប់មនុស្ស និងនិរន្តរភាពផែនដី»៕