អ្នកចាត់ការទូទៅ Man Utd បានផ្តោតលើអ្នកដែលរិះគន់កិច្ចខិតខំប្រឹងប្រែងរបស់ Ronaldo ខណៈប្រធានក្រុមជម្រើសជាតិព័រទុយហ្កាល់រូបនេះបានជួយបិសាចក្រហមទទួលបាន៣ពិន្ទុបន្ថែម នៅវគ្គសន្សំពិន្ទុពូល F នៃក្របខណ្ឌអឺរ៉ុប នារាត្រីថ្ងៃទី២០ ខែតុលា។
 

Ronaldo ជាអ្នកសម្រេចគ្រាប់បាល់ជ័យជម្នះនៅនាទី៨១ បន្ទាប់ពី Marcus Rashford និង Harry Maguire រកបានគ្រាប់តាមស្មើនៅនាទី៥៣ និង៧៥ មុនពេល Atalanta នាំមុខ ២-០ មុន នៅតង់ទី១ តាមរយៈកីឡាករ Mario Pasalic និង Merih Demiral។
 

មុនជំនួបនេះ ខ្សែប្រយុទ្ធវ័យ៣៦ឆ្នាំ បានរងការរិះគន់យ៉ាងខ្លាំងពីអតីតកីឡាករបាល់ទាត់ល្បីៗមួយចំនួនអំពីទម្រង់លេងរបស់គេ។ ប៉ុន្តែលោក Solskjaer បង្ហាញថា ជ័យជម្នះរបស់ក្រុមយប់មិញនេះបញ្ជាក់ថា Ronaldo គឺល្អប៉ុណ្ណា។

អ្នកចាត់ការសញ្ជាតិន័រវែសបានប្រាប់ទូរទស្សន៍ BT Sport ថា៖ « បន្ទាប់ពី Rashford និង Maguire ខ្ញុំមិនគិតថាអ្នកទាំងអស់គ្នារំពឹងថា Ronaldo អាចរកគ្រាប់បាល់បាននោះទេ។ Ronaldo អស្ចារ្យណាស់ក្នុងការសម្រេចទីគូប្រជែង។ ប្រសិនបើនរណាម្នាក់ចង់រិះគន់គាត់ចំពោះការខិតខំប្រឹងប្រែងកន្លងមក លោកអ្នកគ្រាន់តែមើលការប្រកួតនេះទៅដឹងហើយ។ ចូលមើលពីរបៀបដែលគាត់រត់ជុំវិញទីលាននោះទៅ»។
 

Solskjaer បន្ថែមថា លោកពិតជាពេញចិត្តចំពោះរបៀបដែល Ronaldo ព្យាយាមរត់រកចន្លោះដើម្បីមានឱកាសសម្រេចទីក្នុងការជួយ Man Utd កើន៣ពិន្ទុបន្ថែមនេះណាស់។

តាមរយៈជ័យជម្នះនេះ Man Utd ឡើងឈរកំពូលតារាងពូល F មាន៦ពិន្ទុក្រោយការប្រកួត៣លើក តាមពីក្រោយដោយ Atalanta ដែលមាន៤ពិន្ទុ។ Villarreal ស្ថិតនៅចំណាត់ថ្នាក់ទី៣មាន៤ពិន្ទុដែរ ក្រោយពួកគេឈ្នះ Young Boys ៤-១។ 
 

ពូល E

Barcelona ១-០  Dynamo Kyiv

Benfica ០-៤ Bayern Munich

ពូល G 

RB Salzburg ៣-១ Wolfsburg

Lille ០-០ Sevilla

ពូល H

Chelsea ៤-០ Malmö FF

Zenit St Petersburg ០-១ Juventus