ជាតិ
ទូតជប៉ុន សង្ឃឹមគម្រោងទប់ស្កាត់សំណល់ប្លាស្ទិក រួមចំណែកឲ្យក្រុងព្រះសីហនុ ក្លាយជាទីក្រុងស្អាត លោក មិកាមិ ម៉ាសាហ៊ីរ៉ូ ឯកអគ្គរាជទូតជប៉ុនប្រចាំកម្ពុជា (បង់កក្រមាពណ៌ក្រហម)
× លោក មិកាមិ ម៉ាសាហ៊ីរ៉ូ ឯកអគ្គរាជទូតជប៉ុនប្រចាំកម្ពុជា បានចុះពិនិត្យទីតាំងគ្រប់គ្រងសំណល់ មួយចំនួនក្នុងក្រុងព្រះសីហនុ នៃគម្រោងទប់ស្កាត់សំណល់ប្លាស្ទិកក្នុងសមុទ្រ ដែលអនុវត្តដោយក្រសួងបរិស្ថាននិងកម្មវិធីអភិវឌ្ឍន៍សហប្រជាជាតិ (UNDP) ក្រោមការគាំទ្រពីរដ្ឋាភិបាលប្រទេសជប៉ុន។
តាមរយៈគម្រោងទប់ស្កាត់សំណល់ប្លាស្ទិកក្នុងសមុទ្រ លោក មិកាមិ ម៉ាសាហ៊ីរ៉ូ សង្ឃឹមថា នឹងជួយកែលម្អបរិស្ថាននៅក្រុងព្រះសីហនុ ឱ្យក្លាយជាទីក្រុងស្អាត។ ក្នុងដំណើរចុះត្រួតពិនិត្យទីតាំងគ្រប់គ្រងសំណល់មួយចំនួន ក្នុងក្រុងព្រះសីហនុ នៅថ្ងៃទី១៥វិច្ឆិកា ឆ្នាំ២០២១ ឯកអគ្គរាជទូតជប៉ុនប្រចាំកម្ពុជារូបនេះ បាននិយាយដូច្នេះ៖ «យើងសង្ឃឹមថាគម្រោងរបស់យើងនឹងជួយដល់កិច្ចខិតខំប្រឹងប្រែងរបស់ក្រុងព្រះសីហនុក្នុងការកែលម្អបរិស្ថាន និងធ្វើឲ្យទីក្រុងស្អាត»។
កាលពីថ្ងៃទី២៥វិច្ឆិកា ឆ្នាំ២០២០ ស្ថានទូតជប៉ុន និងUNDP បានចុះហត្ថលេខាលើកិច្ចព្រមព្រៀងអនុវត្តន៍ «គម្រោងទប់ស្កាត់នឹងសំណល់ប្លាស្ទិកក្នុងសមុទ្រនៅកម្ពុជា»។ បើតាមការចុះផ្សាយរបស់ស្ថានទូតជប៉ុនប្រចាំកម្ពុជា គម្រោងនេះ ត្រូវបានអនុវត្តដោយក្រសួងបរិស្ថាន ក្រុមប្រឹក្សាជាតិអភិវឌ្ឍន៍ដោយចីរភាព និង UNDP ដោយមានគោលបំណងទប់ស្កាត់ និងកាត់បន្ថយឱ្យបានជាអតិបរមានូវការបំពុលដោយសំណល់ប្លាស្ទិកលើដី និងក្នុងសមុទ្រ តាមរយៈការជំរុញឱ្យមានការអនុវត្តតាមគោលការណ៍ 4Rs (កុំប្រើ-Refuse កាត់បន្ថយ-Reduce ប្រើឡើងវិញ-Reuse និងកែច្នៃយកមកប្រើប្រាស់-Recycle)។
គម្រោងថ្មីនេះនឹងរៀបចំលិខិតបទដ្ឋានគតិយុត្ត បង្កើនការយល់ដឹង និងកាត់បន្ថយសំណល់ប្លាស្ទិកនៅតាមតំបន់គោលដៅ ព្រមទាំងជំរុញឱ្យមានការកែច្នៃសំណល់ និងការប្រើប្រាស់សម្ភារផ្សេងក្រៅតែពីប្លាស្ទិក។ តំបន់គោលដៅ រួមមានក្រុងធំៗ និងខេត្តដែលនៅតាមតំបន់ឆ្នេរ ដូចជា៖ សៀមរាប ព្រះសីហនុ ភ្នំពេញ កែប កំពត និងកោះកុង ដើម្បីកាត់បន្ថយការបំពុលប្លាស្ទិកនៅតាមសមុទ្រឱ្យមានប្រសិទ្ធភាព នៅតាមតំបន់ប្រភពសំណល់តែម្ដង។
បើតាមរបាយការណ៍UNDP បរិមាណប្លាស្ទិកសរុបក្នុងសកលលោកទាំងមូលបានកើនឡើងដល់៨,៣ ពាន់លានតោន។ ជារៀងរាល់ឆ្នាំ មានប្លាស្ទិក ១៣លានតោន ហូរចូលទៅក្នុងសមុទ្រ ដែលស្មើនឹងការចាក់សំរាមមួយឡានដឹកសំរាមពេញ រៀងរាល់មួយនាទីម្ដង។ សំណល់ប្លាស្ទិកប្រមាណ ៩០ភាគរយ ដែលហូរចូលទៅក្នុងសមុទ្រមានប្រភពពីទន្លេធំៗចំនួន ១០ ដែលក្នុងនោះមានទន្លេមេគង្គមួយផងដែរ។
ក្នុងដំណើរទៅកាន់ខេត្តព្រះសីហនុនោះដែរ លោក មិកាមិ ម៉ាសាហ៊ីរ៉ូ បានអញ្ជើញទៅទស្សនកិច្ចនៅកំពង់ផែស្វយ័តក្រុងព្រះសីហនុ និងបានជួបជាមួយលោក លូ គឹមឈន់ ប្រតិភូរាជរដ្ឋាភិបាលកម្ពុជា ទទួលបន្ទុកជាប្រធានអគ្គនាយក កំពង់ផែស្វយ័តក្រុងព្រះសីហនុ។ ឱកាសនោះ ភាគីទាំងពីរ បានផ្លាស់ប្តូរយោបល់លើស្ថានភាពបច្ចុប្បន្ន និងផែនការអនាគតរបស់កំពង់ផែ រួមទាំងគម្រោង ODA របស់ជប៉ុន និងការប្រើប្រាស់តំបន់សេដ្ឋកិច្ចពិសេស (SEZ) ៕
© រក្សាសិទ្ធិដោយ thmeythmey.com