កីឡាអន្តរជាតិ
អន្តរជាតិ
គ្រូបង្វឹកបាល់ទាត់ម្នាក់ស្លាប់ដោយសារគាំងបេះដូង ក្រោយអបអរគ្រាប់បាល់ចុងម៉ោង
× គ្រូបង្វឹកកីឡាបាល់ទាត់អេហ្ស៊ីបម្នាក់បានស្លាប់ដោយសារគាំងបេះដូង អំឡុងពេលអបអរគ្រាប់បាល់ជ័យជម្នះរបស់កូនក្រុម។
បើតាមការផ្សាយរបស់កាសែត The Sun លោក Adham El-Selhadar អ្នកចាត់ការទូទៅ El Magd បានដឹកនាំក្រុមឈ្នះ El Zarqa ១-០ នាការប្រកួតលីគលំដាប់ទី២អេសហ្ស៊ីប Egyptian Second Division clash នៅថ្ងៃទី២ ខែធ្នូ សប្តាហ៍មុន។
គ្រាប់បាល់ជ័យជម្នះ ១-០ ធ្វើបានដោយកូនក្រុមលោក El-Selhadar នៅនាទី៩០+២ ដើម្បីជួយ El Magd ទទួលបាន៣ពិន្ទុ។ ជាអកុសល គ្រាប់បាល់ចុងម៉ោងនេះ បានធ្វើឱ្យគ្រូបង្គោល El Magd ស្លាប់ដោយសារគាំងបេះដូង។
El-Selhadar សញ្ជាតិអេហ្ស៊ីប ភ្ញាក់ផ្អើលនឹងគ្រាប់ស៊ុតចុងម៉ោងរបស់កូនក្រុមរហូតមានបញ្ហាដោយសារការអបអររបស់ខ្លួន ហើយត្រូវបញ្ជូនទៅកាន់មន្ទីរពេទ្យ។ បុរស់វ័យ៥៣ឆ្នាំរូបនេះ ត្រូវបានក្លិប El Magd ប្រកាសថាស្លាប់នៅឯមន្ទីរពេទ្យដោយសារគាំងបេះដូង។
ក្រោយដំណឹងមរណភាពនេះត្រូវបានផ្សព្វផ្សាយ ក្លិបកំពូលនៅអេហ្ស៊ីបដូចជា Al Ahly SC និង Ismaily SC ដែល El Selhadar ធ្លាប់ដឹកនាំ បានផ្ញើការគោរពចំពោះការបាត់បង់ដ៏គួរភ្ញាក់ផ្អើលនេះ។
ក្រុមប្រឹក្សាភិបាលក្លិប El Magd ទាំងមូលប្រកាសកាន់ទុក្ខលោក El Selhadar រយៈពេល៦ថ្ងៃ និងផ្អាកការប្រកួតមួយចំនួន ដើម្បីជាការគោរពសព និងក្រុមគ្រួសារសព៕
© រក្សាសិទ្ធិដោយ thmeythmey.com