វ៉ាក់សាំងបង្ការជំងឺកូវីដ-១៩ ប្រភេទ Pfizer ចំនួន ៧៨៣ ០០០ដូស ដែលជាជំនួយរបស់រដ្ឋាភិបាលប្រទេសអូស្រ្តាលី បានដឹកមកដល់កម្ពុជា នៅថ្ងៃទី២៦ធ្នូ ឆ្នាំ២០២១។ សម្តេច ហ៊ុន សែន នាយករដ្ឋមន្ត្រីកម្ពុជា បានអញ្ជើញទៅទទួលយកជំនួយវ៉ាក់សាំងនេះដោយផ្ទាល់។  ដោយឡែក វ៉ាក់សាំង Pfizer ចំនួន ១ ៥៦៧ ៥៣០ដូសទៀត នឹងដឹកមកដល់កម្ពុជា នៅថ្ងៃទី២៨ធ្នូ។  

 

លោក Andreas Zurbrugg ភារធាវីស្ថានទូតអូស្រា្តលីប្រចាំកម្ពុជា បានថ្លែងក្នុងពិធីប្រគល់-ទទួលវ៉ាក់សាំង នៅអាកាសស្ថានភាពអន្តរជាតិភ្នំពេញថា អូស្ត្រាលី មានមោទកភាពក្នុងការគាំទ្រដល់កម្ពុជា ដោយបានផ្តល់វ៉ាក់សាំងបង្ការជំងឺកូវីដ-១៩ Pfizer-BioNTechc សរុប២,៣៥លានដូស។  ការបរិច្ចាគវ៉ាក់សាំងនេះ គឺជាលើកទីមួយហើយដែលវ៉ាក់សាំង Pfizer នឹងត្រូវបានប្រើប្រាស់ក្នុងចំនួនយ៉ាងបែបនៅកម្ពុជា។

 

សម្តេច ហ៊ុន សែន បានថ្លែងអំណរគុណ ចំពោះប្រជាជន និងរដ្ឋាភិបាលអូស្ត្រាលី ដែលបានផ្តល់វ៉ាក់សាំងឱ្យកម្ពុជា ក្នុងការប្រយុទ្ធប្រឆាំងជំងឺកូវីដ-១៩។ សម្តេច  បន្តមានប្រសាសន៍ដូច្នេះ៖ «អំណោយដ៏ថ្លៃថ្លានេះ គឺជាកាយវិការដ៏ប្រពៃរបស់ប្រជាជន និងរដ្ឋាភិបាលអូស្ត្រាលី ចំពោះប្រជាជន និងរាជរដ្ឋាភិបាលកម្ពុជា ក៏ដូចជាមនុស្សជាតិទាំងមូល នៅក្នុងបុព្វហេតុប្រយុទ្ធនឹងជំងឺកូវីដ-១៩។ ជាពិសេសនៅពេលដែលកម្ពុជា កំពុងតែព្យាយាមសម្រប និងរស់នៅតាមគន្លងប្រក្រតីភាពថ្មី ក្នុងបរិបទកូវីដ-១៩នេះ»។

 

បើតាមសម្តេច ហ៊ុន សែន  ចាប់តាំងពីផ្ទុះជំងឺកូវីដ-១៩ រដ្ឋាភិបាលកម្ពុជា បានកំណត់យ៉ាងច្បាស់ថា មានតែវ៉ាក់សាំងទេ ទើបអាចយកឈ្នះជំងឺនេះបាន។ 

 

គិតត្រឹមថ្ងៃទី២៦ធ្នូ ឆ្នាំ២០២១ កម្ពុជា ចាក់វ៉ាក់សាំងបង្ការជំងឺកូវីដ-១៩ ដល់ពលរដ្ឋ បានជាង១៤,២៤លាននាក់។ ក្នុងនោះ មានពលរដ្ឋដែលបានអាយុលើសពី១៨ឆ្នាំ មានជាង១០លាននាក់, ពលរដ្ឋពីអាយុ១២ដល់១៧ឆ្នាំ មានជាង១,៨លាននាក់, កុមារអាយុពី៦ឆ្នាំ ដល់១១ឆ្នាំ មានជិត១,៩លាននាក់ និងកុមារអាយុ៥ ជាង៣០ម៉ឺននាក់ ក៏បានចាក់វ៉ាក់សាំងបង្ការជំងឺកូវីដ-១៩ ដែរ៕