កម្ពុជា សម្រេចការនាំចេញទំនិញជាមួយនឹងប​ណ្តាប្រ​ទេស-តំបន់នៅក្នុងពិភពលោកបានសរុប ១៤ ២៨៦លានដុល្លារ នារយៈពេល១០ខែ ឆ្នាំ២០២១។ បើតាមរបាយការណ៍បូកសរុបការងារពាណិជ្ជកម្មឆ្នាំ២០២១ និងទិសដៅឆ្នាំ២០២២ ប្រទេសដែលនាំទំនិញចូលពីកម្ពុជាច្រើនគេមាន៖ សហរដ្ឋអាម៉េរិកមានទំហំទឹកប្រាក់សរុប ៦ ០៧៥លានដុល្លារ​, ចិនមានតម្លៃ ​១ ២២២លានដុល្លារ និងជប៉ុនមានក្នុងតម្លៃ ៩២០លានដុល្លារ។ 

 

ផ្ទុយពីការនាំចេញ កម្ពុជាបាននាំទំនិញចូលពីអាម៉េរិកក្នុងទំហំទឹកប្រាក់ត្រឹមតែ ២៧៨លានដុល្លារ, នាំចូលពីជប៉ុន មានក្នុងតម្លៃ​៥២៩លានដុល្លារ និងពីចិនវិញ​ មានរហូតដល់  ៧ ៧៦០លានដុល្លារ។ 

 

កម្ពុជា សម្រេចនូវទំហំពាណិជ្ជកម្មបានសរុប ៣៧ ៣៤៦លានដុល្លារ ជាមួយនឹងប​ណ្តាប្រ​ទេស-តំបន់នៅក្នុងពិភពលោក នារយៈពេល១០ខែដើមឆ្នាំ២០២១។ ក្នុងចំណោមពាណិជ្ជកម្មនេះ ការនាំចូលរបស់កម្ពុជាមានតម្លៃរហូតដល់ ២៣ ០៦០លានដុល្លារ។ របាយការណ៍បូកសរុបការងារដដែលរបស់ក្រសួងពាណិជ្ជកម្ម បានបង្ហាញថា តម្លៃទំនិញដែលកម្ពុជានាំចូលពីបរទេសនេះ គឺបានកើនក្នុងអត្រា៥៨ភាគរយ ខណៈការនាំចេញកើនបានត្រឹម២ភាគរយប៉ុណ្ណោះ បើធៀបនឹងរយៈពេលដូចគ្នា កាលពីឆ្នាំ២០២០៕