ជាតិ
អ្នកជំនាញដោះមីន ៣នាក់ និងពលរដ្ឋម្នាក់ស្លាប់ នៅខេត្តព្រះវិហារ
× អ្នកជំនាញដោះមីន ៣នាក់ និងពលរដ្ឋម្នាក់ទៀត បានស្លាប់ក្នុងហេតុការណ៍ចុះរុករកគ្រាប់មីន នៅខេត្តព្រះវិហារ។ នេះបើតាមលោក ហេង រតនា ប្រធានមជ្ឈមណ្ឌលសកម្មភាពកំចាត់មីនកម្ពុជា នៅថ្ងៃទី១០ខែមករានេះ។
លោក ហេង រតនា បានលើកឡើងថា មានករណីផ្ទុះគ្រាប់មីនតោន ស្ថិតក្នុងភូមិសែនតេជៈ ឃុំមរកត ស្រុកជាំក្សាន្ត ខេត្តព្រះវិហារ នៅព្រឹកថ្ងៃទី១០ មករានេះ ដោយបានធ្វើឲ្យអ្នកជំនាញនៃអង្គការដោះមីនកម្ពុជា ឬហៅថាអង្គការអាគីរ៉ា ៣នាក់ស្លាប់ និងរបួសធ្ងន់ម្នាក់។ នៅពេលជាមួយគ្នានេះ ក៏មានពលរដ្ឋម្នាក់ទៀតបានស្លាប់ ដោយសារផ្ទុះគ្រាប់បែក ដុតសម្អាតដីដាំដំឡូផងដែរ។
លោក ប្រាប់សារព័ត៌មានថ្មីៗ ដូច្នេះថា៖«ឥឡូវយើងរកឃើញសាកសពអស់ហើយ ទាំងអស់៥នាក់ ស្លាប់៤នាក់ និងរបួសម្នាក់។ ក្នុងចំណោម៤ នាក់ហ្នឹង មានប្រជាជនស្លាប់ម្នាក់ដែរ នៅភូមិជាមួយគ្នាហ្នឹង តែចម្ងាយដីខុសគ្នាប្រហែល៥គីឡូម៉ែត្រទេ វាជារឿងចៃដន្យ»៕
© រក្សាសិទ្ធិដោយ thmeythmey.com