លោក អ៊ឹង ឌីប៉ូឡា បានបញ្ជាក់ថា ក្រុមហ៊ុនចិនចំនួន៣​ នឹងធ្វើអាជីវកម្មចម្រាញ់រ៉ែមាស នៅទឹកដីនៃខេត្តព្រះវិហារ ក្រចេះ និងមណ្ឌលគិរី។ ជាមួយគ្នានេះ ក៏មានក្រុមហ៊ុនមកពីប្រទេសឥណ្ឌាមួយទៀត ត្រៀមធ្វើអាជីវកម្មរ៉ែមាសនេះ នៅក្នុងខេត្តរតនគិរី ​ផងដែរ។ លោក អ៊ឹង ឌីបូឡា បាននិយាយប្រាប់សារព័ត៌មានThmeyThmey នាព្រឹកថ្ងៃទី១១មករា ដូច្នេះ៖ «យើងសង្ឃឹមខ្ពស់ថា ក្រុមហ៊ុនទាំងនេះ នឹងអាច​ធ្វើអាជីវកម្មជាផ្លូវការ នៅក្នុងឆ្នាំ២០២២»។ 

 

បើតាមលោក អ៊ឹង ឌីបូឡា ការធ្វើអាជីវកម្មរ៉ែមាសរបស់ក្រុមហ៊ុនទាំងនេះ នឹងរួមចំណែកក្នុងការអភិវឌ្ឍសេដ្ឋកិច្ចនិងសង្គមនៅកម្ពុជា តាមរយៈរដ្ឋាភិបាលទទួលបានចំណូលពីសួយសារនិងពន្ធអាករផ្សេងៗ។ 

 

សូមរម្លឹកថា កាលពីថ្ងៃទី២១មិថុនា ឆ្នាំ២០២១  រដ្ឋាភិបាល​បានប្រកាសបើកដំណើរការចម្រាញ់រ៉ែមាសលើកដំបូង នៅតំបន់អូរខ្វាវ ខេត្តមណ្ឌលគិរី ដោយក្រុមហ៊ុន Renaissance Minerals មកពីប្រទេសអូស្រា្តលី ដែលមានសមត្ថភាពអាចផលិតមាសសុទ្ធ បានប្រមាណ៣តោនក្នុងមួយឆ្នាំ។ លទ្ធភាពរបស់រោងចក្រចម្រាញ់រ៉ែមាសនេះ កម្ពុជារំពឹងថា នឹងទទួលបានថវិកាចូលជាតិ ពីសួយសារ និងសារពើពន្ធផ្សេងៗ ជាមធ្យមប្រមាណ៤០លានដុល្លារក្នុងមួយឆ្នាំ សម្រាប់ប្រើប្រាស់ក្នុងចរន្តថវិកាជាតិ ដើម្បីអភិវឌ្ឍសេដ្ឋកិច្ច និងសង្គម៕