ខ្មែរក្រហម
ជាតិ
សង្គមជាតិ
៣៥ឆ្នាំក្រោយមក សង្គ្រាមពាក្យសម្តីជុំវិញអត្ថន័យនៃថ្ងៃ៧មករានៅតែបន្ត
× ភ្នំពេញ៖ គណបក្សប្រជាជនកម្ពុជានឹងប្រារព្ធទិវាជ័យជំនៈ៧មករាលើកទី៣៥របស់ខ្លួននៅថ្ងៃស្អែកនៅទីតាំងកោះពេជ្រកណ្តាលទីក្រុងភ្នំពេញ។ សមាជិកគណបក្សប្រជាជនកម្ពុជាជាង១ម៉ឺននាក់នឹងចូលរួមអបអរសាទរទិវាជ័យជំនៈលើរបបប្រល័យពូជសាសន៍ប៉ុលពត។ គណបក្សប្រជាជនកម្ពុជាតែងតែលើកឡើងថា ថ្ងៃ៧មករាគឺជាកំណើតទី២របស់ប្រជាពលរដ្ឋកម្ពុជា។ ប៉ុន្តែ អ្នករិះគន់ចោទថា ថ្ងៃ៧មករាគឺជាថ្ងៃឈ្លានពានរបស់ប្រទេសវៀតណាមមកលើកម្ពុជា។
លោក ជាម យៀប តំណាងរាស្ត្រ និងជាសមាជិកនៃគណៈកម្មាធិការអចិន្ត្រៃកណ្តាលនៃគណបក្សប្រជាជនកម្ពុជាបានថ្លែងប្រាប់គេហទំព័រថ្មីៗនៅព្រឹកថ្ងៃចន្ទនេះថា សម្តេចទាំងបីនៃគណបក្សប្រជាជនកម្ពុជានឹងចូលរួមពិធីបុណ្យជ័យជំនះ៧មករានៅថ្ងៃស្អែកនៅទីតាំងកោះពេជ្រ។ មេដឹកនាំគណបក្សប្រជាជនកម្ពុជានឹងថ្លែងសុន្ទរកថា លើកឡើងពីសមិទ្ធផលនានាដែលគណបក្សសម្រេចបានក្នុងរយៈពេល៣៥ឆ្នាំកន្លងមកនេះ។
លោក ជាម យៀប បានបញ្ជាក់ថា៖«គណបក្សប្រជាជនកម្ពុជាបានបន្តការពារអាយុជីវិតប្រជាពលរដ្ឋខ្មែរដែលនៅសេសសល់រស់រានមានជីវិតពីរបបប៉ុលពត។ បន្ទាប់មក គណបក្សបានអភិវឌ្ឍជីវភាពប្រជាជនពីកម្រិតសូន្យមកអោយរីកចម្រើន។ មិនត្រឹមតែប៉ុណ្ណោះ យើងបានកសាងទំនាក់ទំនងការទូតជាមួយប្រទេសជាង៦០»។ លោក ជាម យៀប បានបន្តទៀតថា៖«ថ្ងៃ៧មករាគឺជាថ្ងៃប្រវត្តិសាស្ត្រ និងជាមេរៀនសម្រាប់យុវជនជំនាន់ក្រោយ»។
សម្រាប់គណបក្សប្រជាជនកម្ពុជា ថ្ងៃ៧មករា គឺជាកំណើតទី២របស់ប្រជាជនកម្ពុជា។ ប៉ុន្តែសម្រាប់អ្នករិះគន់វិញ ថ្ងៃ៧មករាគឺជាថ្ងៃឈ្លានពានរបស់វៀតណាមមកលើកម្ពុជា។ លោក សឺន ស៊ូប៊ែរ ប្រធានគណបក្សសិទ្ធិមនុស្ស និងជាកូនលោកតា សឺន សាន បានបញ្ចេញទស្សនៈថា៖«ថ្ងៃ៧មករាគឺជាថ្ងៃវៀតណាមឈ្លានកម្ពុជា ពីព្រោះខ្មែរយើងស្ថិតនៅក្រោមបង្គាប់វៀតណាមជិត១០ឆ្នាំ(៧៩-៨៩)។ ថ្ងៃនេះគឺជាថ្ងៃដែលខ្ញុំសោកស្តាយ»។
សូមបញ្ជាក់ថា ទោះបីជាពេលវេលា៣៥ឆ្នាំបានកន្លងផុតទៅហើយក្តី ក៏នៅថ្ងៃ៧មករា មតិចម្រូងចម្រាសនៅតែកើតមានឡើងគ្រប់ទីកន្លែង។ អ្នកខ្លះថា ថ្ងៃ៧មករាគឺជាដែលវៀតណាមជួយខ្មែរ ប៉ុន្តែ អ្នកខ្លះទៀតថា ថ្ងៃនេះគឺជាថ្ងៃដែលវៀតណាមឈ្លានពាន៕
© រក្សាសិទ្ធិដោយ thmeythmey.com