«យើងរំពឹងរយៈពេលបីឆ្នាំ បានត្រលប់ដូចមុនឆ្នាំ២០១៩វិញ»។ លោក សុង សារ៉ន ប្រធានសហព័ន្ធស្រូវអង្ករកម្ពុជា បាននិយាយប្រាប់សារព័ត៌មានThmeyThmeyដូច្នេះ ដោយបានបញ្ជាក់ថា៖ «ដោយសារហេតុការណ៍ភ្លាមៗបែបនេះ គឺអតិថិជនយើងមួយចំនួនបានបញ្ជាទិញអង្ករពីប្រទេសផ្សេងរួចទៀតហើយ។ ដូច្នេះ យើងរំពឹងថា[ការនាំចេញអង្ករក្នុងឆ្នាំ២០២២]នឹងកើន ប៉ុន្តែយើងមិនអាចដូចមុនបានភ្លាមៗទេ! យើងត្រូវការពេល២ទៅ៣ឆ្នាំបន្ថែមទៀត ដើម្បីឱ្យស្ថានការណ៍របស់យើងឈរជើងបាន ហើយយើងអាចប្រកួតប្រជែងយកទីផ្សារយើងវិញបាន ឱ្យដូចឬប្រហែលនឹងមុនឆ្នាំ២០១៩»។

 

សម្រាប់ឆ្នាំ២០២២ សហព័ន្ធស្រូវអង្ករកម្ពុជា គឺព្យាយាមធ្វើយ៉ាងណាដើម្បីសម្រេចការនាំចេញអង្ករទៅទីផ្សារអឺរ៉ុបឱ្យបាន២០ម៉ឺនតោន។ លោក សារ៉ន បាននិយាយដូច្នេះ៖« « យើងនឹងកើនឡើង១០ភាគរយៗ ដោយឡើងរហូតដល់ប្រហាក់ប្រហែលចំនួន២៥ទៅ៣០ម៉ឺនតោន ដូចពីមុនវិញ ហើយអ្វីដែលយើងចង់បានគឺចំនួន៣០ម៉ឺនតោន»។

 

ដើម្បីកា្តប់ទីផ្សារអង្ករនៅអឺរ៉ុបបានមកវិញ សហព័ន្ធស្រូវអង្ករកម្ពុជាបានត្រៀមខ្លួនរួចជាស្រេចក្នុងការផ្សព្វផ្សាយ  ចូលរួមតាំងពិព័រណ៍ និងចុះជួបអតិថិជនធំៗនៅតំបន់អឺរ៉ុបដោយផ្ទាល់។ នេះជាការលើកឡើងរបស់លោក សុង សារ៉ន។

 

ឆ្នាំ២០២១ កម្ពុជានាំចេញអង្ករបានជាង៦០ម៉ឺនតោន ដែលមានតម្លៃប្រមាណ៥០០លានដុល្លារអាម៉េរិក។ ក្នុងចំណោមអង្ករនាំចេញនេះ មានជិត១៤ម៉ឺនតោនប៉ុណ្ណោះ ដែលបាននាំចូលទីផ្សារអឺរ៉ុប។
 

 
 

សូមរម្លឹកថា សភាពាណិជ្ជកម្មនៃសហភាពអឺរ៉ុបយកពន្ធលើអង្ករកម្ពុជា ជាផ្លូវការចាប់ពីថ្ងៃទី២០មករា ឆ្នាំ២០១៩ ក្នុងអត្រាជិត២០០ដុល្លារអាមេរិក សម្រាប់អង្ករមួយតោន។ អត្រាពន្ធនេះ បានធ្លាក់មកនៅត្រឹមជាង១៧០ដុល្លារ សម្រាប់អង្ករមួយតោន នៅក្នុងឆ្នាំ២០២០ និងជាង១៤១ដុល្លារក្នុងអង្ករមួយតោន នៅឆ្នាំ២០២១៕