ពីនេះ ពីនោះ
មុជទឹក និង ងូតទឹក ខុសគ្នាបែបណា?
× តាមពិតទៅយើងអាចបែងចែកច្បាស់ហើយរវាងពាក្យ «មុជ» និង «ងូត» ប៉ុន្តែសារព័ត៌មានថ្មីៗ សង្កេតឃើញថា មនុស្សមួយចំនួននៅតែសរសេរច្របូកច្របល់គ្នា។
«មុជ» មានន័យថា ពន្លិចក្បាលខ្លួនឯងទៅក្នុងទឹក, មុជទឹក។ រីឯពាក្យ «ជ្រមុជ» គឺ ចាប់សង្កត់ឲ្យមុជ។ ជ្រមុជជ្រមិន ឬ ជ្រមុជជ្រមឹន ចាប់ឈ្លីញក់ញីឲ្យមុជដោយការប្រឡែងលេង ។ ប្រើប្រាស់ញីញក់ឥតប្រណី, ឥតថ្នម ។ ជ្រមុជជ្រមុល ចាប់សង្កត់ជម្រុលឲ្យមុជ ។ បើមានគេនិយាយថា «មុជរបង» គឺមានន័យថា ឱនក្បាលចូលបន្ទាបខ្លួនចុះ។
រីឯ «ងូត» ឯណោះវិញ មានន័យថា ស្រោចទឹកជម្រះកាយខ្លួនឯង, ងូតទឹក ។ តាមវចនានុក្រមខ្មែរសម្តេចព្រះសង្ឃរាជ ជួន ណាត ក្រៅពីកិរិយាសព្ទ ពាក្យនេះ ជួនកាលប្រើជានាមសព្ទ។ ឧទាហរណ៍ដូចជា ភ្លៀងមួយងូត គឺភ្លៀងល្មមទទឹកខ្លួនដូចគេងូត ឬ ល្មមងូតបាន ៕
© រក្សាសិទ្ធិដោយ thmeythmey.com