ជាតិ
សេដ្ឋកិច្ច
លោក គង់ វិបុល ពិភាក្សាជាមួយក្រុមហ៊ុនអ៊ឺនធ័រណិលើការអនុវត្តប្រតិបត្តិការពាណិជ្ជកម្មអេឡិចត្រូនិក
× លោក គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី និងជាប្រតិភូរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានពន្ធដារ បានប្រជុំពិភាក្សាជាមួយបណ្តាថ្នាក់ដឹកនាំក្រុមហ៊ុនផ្គត់ផ្គង់សេវាអ៊ីនធ័រណិត (Internet Service Provider-ISP) ចំនួន៤៩នៅកម្ពុជា លើការអនុវត្តអាករលើតម្លៃបន្ថែម ចំពោះប្រតិបត្តិការពាណិជ្ជកម្ម តាមប្រព័ន្ធអេឡិចត្រូនិក។ នេះបើយោងតាមសេចក្តីប្រកាសព័ត៌មានរបស់អគ្គនាយកដ្ឋានពន្ធដារ កាលពីថ្ងៃទី៧ ខែកុម្ភៈ។
ចាប់ពីថ្ងៃទី១ ខែមេសា កម្ពុជានឹងអនុវត្តការយកអាករលើតម្លៃបន្ថែម (VAT) ចំពោះប្រតិបត្តិការពាណិជ្ជកម្មតាម ប្រព័ន្ធ អេឡិចត្រូនិក (E-Commerce) ពីក្រុមហ៊ុនដូចជា Facebook, YouTube, Netflix, Amazon និង Alibaba ជាដើម។ នេះជាការអនុវត្តតាមអនុក្រឹត្យលេខ ៦៥ អនក្រ.បក ស្តីពីការអនុវត្តអាករលើតម្លៃបន្ថែម ចំពោះពាណិជ្ជកម្ម តាមប្រព័ន្ធអេឡិចត្រូនិក ដែលមានវិសាលភាពអនុវត្តចំពោះការផ្គត់ផ្គង់ទំនិញឌីជីថល ឬសេវាឌីជីថលតាមប្រព័ន្ធអេឡិចត្រូនិក ឬរាល់សកម្មភាពពាណិជ្ជកម្ម តាមប្រព័ន្ធអេឡិចត្រូនិក ដែលធ្វើឡើងដោយអ្នកផ្គត់ផ្គង់អនិវាសនជន នៅក្រៅកម្ពុជាមកក្នុងកម្ពុជា ដោយឡែកចំពោះសកម្មភាពពាណិជ្ជកម្ម តាមប្រព័ន្ធអេឡិចត្រូនិកក្នុងកម្ពុជា ត្រូវអនុវត្តតាមបទប្បញ្ញត្តិ ស្តីពីអាករលើតម្លៃបន្ថែមជាធរមាន។
ក្នុងកិច្ចប្រជុំជាមួយថ្នាក់ដឹកនាំក្រុមហ៊ុនផ្គត់ផ្គង់សេវាអ៊ីនធ័រណីត លោក គង់ វិបុល បានកើតសម្គាល់សន្ទុះអាជីវកម្មតាមអនឡាញ វិស័យអនឡាញ និងអ៊ិនធើណេត នារយៈពេលចុងក្រោយនេះ ហើយ មានសហគ្រាសមួយចំនួនធំ ពុំទាន់បានចុះបញ្ជី និងយល់ដឹងអំពីកាតព្វកិច្ចសារពើពន្ធនៅឡើយ។
«ការពង្រឹងនូវការគ្រប់គ្រង សកម្មភាពពាណិជ្ជកម្មតាមប្រព័ន្ធអេឡិចត្រូនិក គឺជាការពង្រឹងការប្រកួតប្រជែងដោយស្មើភាព (Level Playing Field) និងអនុលោមភាពសារពើពន្ធ សម្រាប់វិស័យនេះ»។ អគ្គនាយកដ្ឋានពន្ធដារបានគូសបញ្ជាក់យ៉ាងដូច្នេះ។
តាមសេចក្តីប្រកាសព័ត៌មានដដែល កិច្ចប្រជុំនេះ អគ្គនាយកដ្ឋានពន្ធដារ មានបំណងក្នុងការផ្សព្វផ្សាយ និងពង្រឹងកិច្ចសហការពីបណ្តាសហគ្រាស ជាអ្នកផ្គត់ផ្គង់សេវាអឺនធើណេត (Internet Service Provider - ISP) ក្នុងព្រះរាជាណាចក្រកម្ពុជា ក្នុងចូលរួមជាមួយរាជរដ្ឋាភិបាល ដោយក្នុងករណីសហគ្រាសមិនចុះបញ្ជី និងបំពេញកាតព្វកិច្ចសារពើពន្ធ វិធានការចាំបាច់នានា ក្នុងការរាំងខ្ទប់នូវប្រតិបត្តិការតាមប្រព័ន្ធអេឡិចត្រូនិកនានា។
«អគ្គនាយកដ្ឋានពន្ធដារ ស្វាគមន៍ចំពោះរាល់ធាតុចូល និងកិច្ចសហការនានា លើផ្នែកបច្ចេកទេសពាក់ព័ន្ធ ដើម្បីឲ្យការអនុវត្តអាករលើតម្លៃបន្ថែម ចំពោះប្រតិបត្តិការពាណិជ្ជកម្មតាមប្រព័ន្ធអេឡិចត្រូនិក កាន់តែប្រសើរសំដៅធានា បាននូវការប្រមូលចំណូលពន្ធដារ កើនឡើងប្រកបដោយចីរភាព»។ នេះបើតាមការលើកឡើងក្នុងសេចក្តីប្រកាសព័ត៌មាន៕
Tag:
គង់ វិបុល
E-COMMERCE
© រក្សាសិទ្ធិដោយ thmeythmey.com