អាយុ​៥៦​ឆ្នាំ លោក Kayasan ជាអ្នក​ជំងឺមហារី​កឈាម​ម្នាក់ ដែល​តេស្តវិជ្ជមាន​កូវីដ-១៩ កាលពីខែវិច្ឆិកា ឆ្នាំ២០២០។ ក្រោយសម្រាកព្យាបាលនៅមន្ទីរពេទ្យ រយៈពេលខ្លី គាត់ត្រូវបានតម្រូវឲ្យបន្តព្យាបាលនៅ​ផ្ទះ​ក្នុង​ស្រុក Sariyer ក្រុង Istanbul ប៉ុន្តែ​ក្រោយ​ការរស់នៅ​ដាច់ដោយឡែក​២សប្តាហ៍ គាត់នៅតែបន្តមាន​វិជ្ជមាន​កូវីដ-១៩ដដែល។

 

អ្វីដែលមិនគួរនឹកស្មាន​ដល់នោះ គាត់បន្ត​តេស្តជាបន្ត​បន្ទាប់នារយៈពេលល១៤ខែ ដែលមាន​រហូតដល់ទៅ​៧៨​លើក ហើយ​លទ្ធផល​ដែលចេញដោយមន្ទីរពិសោធន៍​ផ្សេងៗគ្នា បង្ហាញថា គាត់នៅ​តែ​វិជ្ជមាន​កូវីដ-១៩។ អំឡុងពេល​កន្លងមក គាត់​ព្យាបាល​៩ខែ​នៅមន្ទីរពេទ្យ និង​៥ខែទៀត​រស់នៅ​ដាច់ដោយឡែកក្នុងផ្ទះ។

 

លោក Kayasan បាន​រៀបរាប់ថា លោក​មាន​បញ្ហាពិបាក​ដក​ដង្ហើម ពិបាកដើរ មើលមិនសូវឃើញ និង​បាត់បង់រសជាតិ។ «ក្រុម​វេជ្ជបណ្ឌិត យក​ចិត្តទុក​ដាក់និងព្យាបាលខ្ញុំជាពិសេស ប៉ុន្តែស្ថានភាព​ខ្ញុំ​នៅ​តែមិនធូរស្បើយ​នារយៈពេល​១៤ខែកន្លងមកនេះ»។

 

លោកបាន​គូសបញ្ជាក់ថា នា​អំឡុង​ពេល​លោកព្យាបាល អ្នកជំងឺ​ផ្សេងទៀតដែលមានអាការៈស្រដៀងលោក បានសះស្បើយ និ​ងចេញពីមន្ទីរពេទ្យ​ជា​បន្ត​បន្ទាប់ ហើយ​លោក​ក៏បានឃើញមនុស្ស​ស្លាប់ជាច្រើននាក់​ផងដែរ ក្នុងនោះមានទាំងយុវជន។

 

លោក Kayasan ផ្ញើសារដល់មនុស្សទូទៅឲ្យចាក់វ៉ាក់សាំងបង្ការកូវីដ-១៩ ដោយ​មិន​ត្រូវ​បណ្តោយខ្លួន រហូតដល់ឆ្លងជំងឺ​នោះទេ។ ការ​រស់នៅ​ដាច់ដោយឡែក លោកតែងតែនឹករលឹកគ្រួសារជានិច្ច ជាពិសេសចៅប្រុស​អាយុ​២​ឆ្នាំ​ ដែលបាន​ត្រឹមឃើញគ្នា​តាម​កញ្ចក់​តែប៉ុណ្ណោះ៕