លោក Cezary Kulesza បាននិយាយថា សមាគមខ្លួន កំពុងពិភាក្សាជាមួយសមភាគីស៊ុយអែត និងឆែកទាក់ទងនឹងការប្រកួតជម្រុះ នាខែមីនា ដើម្បីបំពេញកន្លែង សម្រាប់ការប្រកួតបាល់ទាត់ពិភពលោក។
 

«ពេលវេលាសម្រាប់ការនិយាយគឺចប់ហើយ។ វាដល់ពេលដែលត្រូវធ្វើសកម្មភាពហើយ។ ដោយសារតែ ការឈ្លានពានរបស់សហព័ន្ធរុស្ស៊ីនៅអ៊ុយក្រែននេះ ក្រុមប៉ូឡូញ នឹងមិនលេង play-off ទល់នឹងរុស្ស៊ីទេ។ នេះគឺជាការសម្រេចចិត្តដ៏ត្រឹមត្រូវតែមួយគត់។ យើងកំពុងពិភាក្សាជាមួយសមាគមស៊ុយអែត និងឆេក ដើម្បីបង្ហាញជំហររួមមួយទៅកាន់ FIFA»។ នេះបើតាម Channel News Asia ដែលបានស្រង់សម្តីលោក Kulesza ។
 

កាលពីថ្ងៃទី២៤ កុម្ភៈ សហព័ន្ធទាំងបីនេះ ក៏បានចេញសេចក្តីថ្លែងការណ៍រួមមួយ ទាមទារឱ្យ FIFA ផ្លាស់ប្តូរការប្រកួតវគ្គ Play-off រៀងៗខ្លួនពីប្រទេសរុស្ស៊ីដែរ។
 

តែយ៉ាងណា FIFA ថ្កោលទោសរុស្ស៊ីវាយប្រហារអ៊ុយក្រែន តែមិនទាន់សម្រេចចិត្តដកការប្រកួតវគ្គជម្រុះ World Cup ឡើយ
 

ដោយឡែកតារាបាល់ទាត់សញ្ជាតិប៉ូឡូញ Robert Lewandowski ក៏បានបង្ហោះសារ កាលពីថ្ងៃទី២៥ កុម្ភៈថា រូបគេនឹងពិគ្រោះយោបល់ជាមួយមិត្តរួមក្រុម អំពីការប្រកួត និងការបដិសេធចំពោះសង្គ្រាម។
 

ខ្សែប្រយុទ្ធក្លិប Bayern Munich រូបនេះ បានសរសេរដូច្នេះថា៖«អ្វីគ្រប់យ៉ាងដែលស្រស់ស្អាតនៅក្នុងកីឡាគឺប្រឆាំងនឹងអ្វីដែលនាំមកនូវសង្រ្គាម ។ សម្រាប់មនុស្សទាំងអស់  ឱ្យតម្លៃលើសេរីភាព និងសន្តិភាព ហើយនេះគឺជាពេលវេលានៃសាមគ្គីភាពជាមួយជនរងគ្រោះ នៃការឈ្លានពានយោធានៅអ៊ុយក្រែន»។
 

រុស្សី នឹងត្រូវធ្វើជាម្ចាស់ផ្ទះ ទទួលភ្ញៀវប៉ូឡូញ ក្នុងវគ្គពាក់កណ្តាលផ្តាច់ព្រ័ត្រនៃការប្រកួតជម្រុះ World Cup នៅថ្ងៃទី ២៤ ខែមីនា ។ ប្រសិនបើរុស្ស៊ីឈ្នះ គឺត្រូវបន្តប្រកួតជាមួយស៊ុយអែត ឬសាធារណរដ្ឋឆែក នៅចុងខែមីនា ផងដែរ៕