ធ្វើជាអធិបតីក្នុងសន្និបាតបូកសរុបលទ្ធផលការងារប្រចាំឆ្នាំ២០២១ របស់ខេត្តព្រះសីហនុ នាព្រឹកថ្ងៃទី៩ ខែមីនា ឆ្នាំ២០២២ សម្តេច ស ខេង បានថ្លែងថា៖«មានប្រទេសខ្លះ គាត់អត់យកទេណា។ គាត់ដឹងថា ជាជនជាតិគាត់ តែយើងស្នើឲ្យគាត់យកត្រឡប់ទៅវិញ បញ្ជូនទៅ គាត់ No (បដិសេធ)។ អាហ្នឹង ដែលពិបាក យើងកំពុងខិតខំប្រឹងប្រែងធ្វើការងារនេះ»។
 

ក្នុងពិធីបិទសន្និបាតបូកសរុបលទ្ធផលការងារឆ្នាំ២០២១ របស់ក្រសួងមហាផ្ទៃ កាលពីថ្ងៃទី២៣ ខែកុម្ភៈ ឆ្នាំ២០២២ លោកនាយឧត្តមសេនីយ៍ ប៉ោ ភក្តិ អគ្គលេខាធិការ​នៃ​អគ្គលេខាធិការដ្ឋាន​ក្រសួង​មហាផ្ទៃ បានប្រកាសចំឈ្មោះប្រទេស ដែលមិនព្រមទទួលយកជនអន្តោប្រវេសន៍របស់ខ្លួនពីកម្ពុជាវិញ។ លោកនាយឧត្តមសេនីយ៍ផ្កាយ៤រូបនេះ បញ្ជាក់ថា៖ «អាជ្ញាធរវៀតណាម មិនទទួលយកជនអន្តោប្រវេសន៍វៀតណាមគ្រប់រូប ឬជនអន្តោប្រវេសន៍វៀតណាម ដែលមានបំណងត្រឡប់ទៅវៀតណាមវិញ»។ 
 

របាយការណ៍ពីសមាគមខ្មែរ-វៀតណាមនៅកម្ពុជា ដែលដកស្រង់ទៅចុះផ្សាយដោយសារព័ត៌មាន VNEXPRESS របស់វៀតណាម កាលពីចុងឆ្នាំ២០២១ បានឲ្យដឹងថា គិតតែនៅក្នុងភូមិសាស្រ្តរាជធានីភ្នំពេញ មានជនជាតិវៀតណាមប្រមាណ៣ម៉ឺននាក់ ​កំពុងរស់នៅ។  

 

សម្តេច ស ខេង បានកោតសរសើរ និងអរគុណរដ្ឋាភិបាលចិន ដែលតែងទទួលយកជនជាតិរបស់ខ្លួន នៅរាល់ពេលដែលអាជ្ញាធរកម្ពុជា ចាប់បញ្ជូន ឬបណ្តេញទៅវិញ។ សម្តេចរដ្ឋមន្រ្តីយល់ថា បើរដ្ឋាភិបាលចិន បដិសេធមិនទទួលយកជនជាតិខ្លួន កម្ពុជានឹងលំបាកក្នុងការស្វែងរកកន្លែងដាក់ពួកគេ។  
 

លោក ប៉ោ ភក្តិ អះអាងថា ជនអន្តោប្រវេសន៍ខ្លះ ត្រូវអាជ្ញាធរកម្ពុជាបណ្តេញចេញហើយ តែបានលួចឆ្លងដែនខុសច្បាប់ត្រឡប់មកកម្ពុជាវិញ ដែលបង្កផលប៉ះពាល់ដល់សន្តិសុខ សណ្តាប់ធ្នាប់សង្គមកម្ពុជា៕