បន្ទាប់ពីរៀនសូត្រ និងទទួលបានការបង្ហាត់បង្ហាញរយៈពេល ៨ខែ ក្រុមឈ្នះចំនួន៦ ទទួលបានប្រាក់រង្វាន់ ២០ ០០០ដុល្លារ សិង្ហបុរី ក្នុងមួយក្រុម ដើម្បីជួយពួកគេឱ្យចាប់ផ្តើម ឬពង្រីកអាជីវកម្មសង្គមរបស់ពួកគេ។
ប្រទេសសិង្ហបុរី ថ្ងៃទី១៥ ខែមីនា ឆ្នាំ២០២២៖ សហគ្រាសសង្គមចំនួន៦ ទទួលបានទឹកប្រាក់រហូតដល់ ២ម៉ឺនដុល្លារសិង្ហបុរី សម្រាប់សហគ្រាសនីមួយៗ ដើម្បីជួយពួកគេ ក្នុងការកសាងអាជីវកម្មរបស់ខ្លួន។
ការទទួលបានទឹកប្រាក់នេះ បានកើតមានឡើង បន្ទាប់ពីក្រុមចំនួន១២ ដែលរួមមានអ្នកធ្វើឱ្យមានការផ្លាស់ប្តូរ (Changemakers) ចំនួន២៤នាក់ បានប្រមូលផ្តុំគ្នាតាមអនឡាញ ដើម្បីបញ្ចប់ជុំចុងក្រោយ នៃកម្មវិធីសហគ្រិនសង្គមវ័យក្មេងពិភពលោកឆ្នាំ២០២១ (YSE Global 2021) របស់មូលនិធិអន្តរជាតិសិង្ហបុរី (SIF)។
ក្រុមទាំងនេះដែលមកពីប្រទេសកម្ពុជា ចិន ហ្ស៊កដានី ឥណ្ឌា ឥណ្ឌូណេស៊ី ថៃ និងសិង្ហបុរី ត្រូវបានសម្រាំងចេញពីក្រុមធំមួយ ដែលមានចំនួន៤១ក្រុម ដែលមានយុវជនចំនួន ១០៩នាក់ មកពីប្រទេសចំនួន១៦។ ពួកគេបានចូលរួមក្នុង សិក្ខាសាលា YSE Global 2021 ចាប់ពីខែកក្កដា ដល់ខែសីហា ឆ្នាំ២០២១។
នៅឆ្នាំនេះ ដំណោះស្រាយជិត ៧០ភាគរយ ដែលស្នើឡើងដោយក្រុមចូលរួម គឺជាក្រុមដែលជំរុញដោយបច្ចេកវិទ្យា ពោលគឺកើនឡើងបីដង បើធៀបនឹងកម្មវិធីលើកមុន និងជាកំណត់ត្រាថ្មីមួយសម្រាប់កម្មវិធី។ រាប់ចាប់ពីបច្ចេកវិទ្យា Deep tech បច្ចេកវិទ្យាជំនួយ រហូតដល់ភ្លែតហ្វមឌីជីថល ក្រុមដែលចូលរួមបានប្រើបច្ចេកវិទ្យា និងការច្នៃប្រឌិត ដើម្បីដោះស្រាយបញ្ហា ក្នុងវិស័យបរិយាបន្ន និរន្តរភាព អនាម័យសាធារណៈ ការថែទាំសុខភាព និងការអប់រំ។ គោលបំណងរបស់ពួកគេក្នុងការធ្វើឱ្យមានផលប៉ះពាល់វិជ្ជមាន ប្រកបដោយនិរន្តរភាព ជាមួយនឹងអាជីវកម្មរបស់ខ្លួន ក៏ស្របទៅនឹងគោលបំណង ជាសកលនៃគោលដៅអភិវឌ្ឍន៍ប្រកបដោយចីរភាព របស់អង្គការសហប្រជាជាតិផងដែរ។
សម្រាប់វគ្គផ្តាច់ព្រ័ត្រថ្ងៃនេះ ដែលហៅថា Pitching for Change ក្រុមដែលជាប់ក្នុងបញ្ជីសម្រាំង បានបង្ហាញគំនិតអាជីវកម្មសង្គមរបស់ពួកគេ ទៅកាន់គណៈកម្មការ។ ក្រុមដែលឈ្នះទាំង៦ក្រុម ត្រូវបានជ្រើសរើសដោយផ្អែកលើផលប៉ះពាល់វិជ្ជមាន និងភាពអាចពង្រីក និងបង្រួមបាននៃគំនិតអាជីវកម្មរបស់ពួកគេ ក៏ដូចជាកម្រិតនៃការប្តេជ្ញាចិត្តរបស់សមាជិកក្រុម។
ក្រុមដែលឈ្នះរួមមាន (តាមលំដាប់អក្ខរក្រម)៖
1. AKYAS Sanitation (ហ្សកដានី)
2. Kanpur Flowercycling Private Limited (Phool.co) (ឥណ្ឌា)
3. Khmer Super Plantfood (កម្ពុជា)
4. Sojourner Brother (សិង្ហបុរី)
5. TACT (ថៃ)
6. VEMBI (ឥណ្ឌា)
Khmer Super Plantfood មកពីប្រទេសកម្ពុជាគឺជាក្រុមមួយក្នុងចំណោមក្រុមសហគ្រាសសង្គមដែលឈ្នះទាំង៦ នៅឯកម្មវិធីសហគ្រិនសង្គមវ័យក្មេងពិភពលោកឆ្នាំ២០២១ (YSE Global 2021) របស់មូលនិធិអន្តរជាតិសិង្ហបុរី (SIF)។ ជួរខាងលើ ពីឆ្វេង៖ លោកស្រី Carrie Tan សមាជិកសភារបស់ប្រទេសសិង្ហបុរី លោកស្រី Jean Tan នាយកប្រតិបត្តិមូលនិធិ SIF។ ជួរខាងក្រោម ពីឆ្វេង៖ អ្នកនាង សៅ សិរីសុធា និងអ្នកនាង សៅ សុម៉ាលែន សហស្ថាបនិកក្រុម Khmer Super Plantfood។
លោកស្រី Carrie Tan ស្ថាបនិកសហគ្រាសសង្គម Daughters Of Tomorrow និងជាសមាជិកសភារបស់ប្រទេសសិង្ហបុរី បានប្រគល់រង្វាន់ និងបិទកម្មវិធីតាមអនឡាញនេះ។
លោកស្រីបានមានប្រសាសន៍ថា៖ «ការងាររបស់សហគ្រិនសង្គម មានសារៈសំខាន់ណាស់ ដោយសារពួកគេស្វែងរកវិធីថ្មីៗប្រកបដោយនិរន្តរភាព ដើម្បីដោះស្រាយតម្រូវការសង្គម និងបរិស្ថានដែលមិនត្រូវបានឆ្លើយតបរបស់សហគមន៍របស់ពួកគេ។ វាគួរឱ្យរំភើប ដែលមើលឃើញចំណង់ ការប្តេជ្ញាចិត្ត និងភាពធន់របស់អ្នកចូលរួមវ័យក្មេងទាំងនេះ ក្នុងការសម្រេចបានបេសកកម្មសង្គមរបស់ពួកគេ»។
ដើម្បីឈានមកដល់វគ្គ Pitching for Change អ្នកធ្វើឱ្យមានការផ្លាស់ប្តូរ (Changemakers) វ័យក្មេងទាំងនេះ បានចូលរួមក្នុងសិក្ខាសាលា និងគ្លីនិកអាជីវកម្មតាមអនឡាញជាច្រើន។ មូលនិធិ SIF បានបង្កើតវគ្គសិក្ខាសាលាទាំងនេះឡើង ដើម្បីបង្កើនសមត្ថភាព និងទំនុកចិត្តរបស់ពួកគេ ក្នុងការអភិវឌ្ឍអាជីវកម្មល្អៗក្នុងសង្គម។
អ្នកចូលរួមក៏បានធ្វើការជាមួយអ្នកបង្ហាត់បង្ហាញស្ម័គ្រចិត្ត ដែលទទួលបានការចាត់តាំង រយៈពេលប្រាំបីខែផងដែរ ដើម្បីសម្រួចគំនិតអាជីវកម្មរបស់ពួកគេ ក្នុងការត្រៀមខ្លួនសម្រាប់វគ្កផ្តាច់ព្រ័ត្រ។ ក្រុមអ្នកបង្ហាត់បង្ហាញរួមមានអ្នកផ្តល់ប្រឹក្សាផ្នែកពាណិជ្ជកម្មឈានមុខគេ មកពីក្រុមហ៊ុន McKinsey & Company ក្រុមហ៊ុន Temasek International ក្រុមហ៊ុន Bain &Company និងសហគ្រិន និងអ្នកជំនាញដែលពាក់ព័ន្ធនឹងវិស័យរបស់ពួកគេ។
ក្រុមទាំងនេះក៏បានចូលរួមក្នុងវគ្គ YSE Spotlight ដែលជាសកម្មភាពអនឡាញជាស៊េរី ដើម្បីពង្រីកចក្ខុវិស័យរបស់ពួកគេ និងស្វែងយល់អំពីប្រព័ន្ធអេកូឡូស៊ី ភាពជាសហគ្រិនសង្គមនៅក្នុងប្រទេសអាស៊ីផ្សេងៗផងដែរ។ នៅក្នុងវគ្គនេះ សហគ្រិនសង្គម និងអ្នកជំនាញក្នុងឧស្សាហកម្មនានា ចែករំលែកបទពិសោធន៍ និងការយល់ដឹងរបស់ពួកគេ។
អ្នកចូលរួមក៏បានបង្កើតបណ្តាញ ជាមួយមិត្តភ័ក្តិដែលមានសញ្ជាតិផ្សេងៗគ្នា ទទួលបានការយល់ដឹងអំពីអន្តរវប្បធម៌កាន់តែស៊ីជម្រៅ បង្កើតមិត្តថ្មី និងបង្កើតទំនាក់ទំនងអាជីវកម្ម តាមរយៈការចែករំលែក និងការពិភាក្សាអនឡាញ។
លោកស្រី Ng Shin Ein ប្រធានមូលនិធិ SIF និងជាចៅក្រមនាំមុខនៃកម្មវិធី YSE Global 2021 បានកត់សម្គាល់ថា ចំនួនយុវជនដែលមានចំណេះដឹងផ្នែកបច្ចេកវិទ្យា កំពុងកើនឡើងនៅទូទាំងពិភពលោក ដែលត្រូវបានជំរុញដោយស្មារតីនៃគោលបំណងសង្គម ដើម្បីបង្កើតការផ្លាស់ប្តូរជាវិជ្ជមាន។
លោកស្រីមានប្រសាសន៍ថា៖ «វាពិតជាពេលវេលាដ៏រំភើប សម្រាប់នវានុវត្តន៍សង្គម។ បច្ចេកវិទ្យាបានបង្កើតឱកាសជាច្រើន សម្រាប់សហគ្រិនវ័យក្មេង ដើម្បីបង្កើតការផ្លាស់ប្តូរប្រកបដោយនិរន្តរភាព។ ពួកគេបានបង្កើតដំណោះស្រាយប្រកបដោយភាពច្នៃប្រឌិត ដើម្បីដោះស្រាយបញ្ហាប្រឈមក្នុងសង្គម និងបរិស្ថានជាមួយនឹងការទទួលបានប្រាក់ចំណេញ និងផលប៉ះពាល់វិជ្ជមាន។ មូលនិធិ SIF មានមោទកភាព ក្នុងការគាំទ្រសហគ្រាសសង្គមទាំងនេះ ក្នុងដំណើររបស់ពួកគេឆ្ពោះ ទៅរកការបង្កើតផលប៉ះពាល់សង្គមវិជ្ជមានកាន់តែច្រើន»។
កញ្ញា សៅ សេរីសុទ្ធា សហស្ថាបនិក Khmer Super Plantfood ពីប្រទេសកម្ពុជាបានមានប្រសាសន៍ថា៖ «ខ្ញុំសូមអរគុណ ចំពោះការគាំទ្រពីក្រុមការងាររៀបចំ អ្នកបង្ហាត់បង្ហាញរបស់យើង និងអ្នកចូលរួមផ្សេងទៀតទាំងអស់។ ខ្ញុំទទួលបានយ៉ាងច្រើនក្នុងរយៈពេលប្រាំបីខែកន្លងមកនេះ។ វាក៏កំពុងលើកទឹកចិត្តផងដែរ ឱ្យខ្ញុំដឹងថា មានយុវជនផ្សេងទៀតនៅជុំវិញពិភពលោក ដែលតាំងចិត្តធ្វើឱ្យមានការផ្លាស់ប្តូរ នៅក្នុងសហគមន៍របស់ពួកគេ។ កត្តានេះជួយខ្ញុំ កុំឱ្យមានអារម្មណ៍ឯកោ ក្នុងដំណើរសហគ្រិនសង្គមរបស់ខ្ញុំ។"
YSE Global ស្វែងរកការបំផុសគំនិត បំពាក់ និងផ្តល់លទ្ធភាពឱ្យយុវជន មកពីជាតិសាសន៍ផ្សេងៗឱ្យចាប់ផ្តើម ឬពង្រីកសហគ្រាសសង្គមរបស់ពួកគេ។ ក្នុងរយៈពេល ១២ឆ្នាំកន្លងមកនេះ កម្មវិធីរបស់មូលនិធិ SIF នេះបានជួយដល់អតីតអ្នកចូលរួមជាង ១ ៣០០នាក់ មកពី ៤២ប្រទេស និងសហគ្រាសសង្គមចំនួន៦២៨។
ពាក្យស្នើសុំចូលរួមក្នុងកម្មវិធីសម្រាប់ YSE Global 2022 ឥឡូវនេះអាចរកបានហើយ។ សូមចូលទៅកាន់ YSE Global 2022 - Virtual Roadshows សម្រាប់ព័ត៌មានបន្ថែមអំពីកម្មវិធី៕
(អត្ថបទពាពិជ្ជកម្ម)