«ការចូលរួមរបស់សមាជិក សមាជិកា គ្រប់ៗរូប ពិតជាបានសបញ្ជាក់យ៉ាងច្បាស់ពីតួនាទីយ៉ាងសំខាន់របស់យុវជនក្នុងដំណើរការប្រព្រឹត្តទៅក្នុងសង្គម និងការអភិវឌ្ឍនានាលើគ្រប់វិស័យក្នុងប្រទេស»។ នេះជាការលើកឡើងរបស់លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា (ស.ស.យ.ក) ក្នុងកិច្ចប្រជុំគណៈកម្មាធិការកណ្តាលសហភាពសហព័ន្ធយុវជនកម្ពុជា នាសៀមរាប។

 

ទន្ទឹមនឹងនេះ លោក ម៉ានី ក៏កត់សម្គាល់ផងដែរ ពីដំណើរវិវត្តឥតឈប់ឈរនៃបរិបទសង្គម នយោបាយ និង សេដ្ឋកិច្ច  ជាពិសេសការប្រកាន់យកប្រក្រតីភាពថ្មី ក្នុងដំណាក់កាលវិបត្តិកូវីដ-១៩។ សម្រាបលោក ម៉ានី ក្នុងការចូលរួមរបស់សមាជិក សមាជិកា ស.ស.យ.ក. លើកិច្ចការប្រយុទ្ធប្រឆាំងការរីករាលដាលជំងឺកូវីដ-១៩ ជាមួយរាជរដ្ឋាភិបាល គឺជាកម្លាំងដ៏សកម្មមួយ ដែលមិនអាចខ្វះបាន។

 

លោក ម៉ានី អះអាងថា សមិទ្ធផល និងស្នាដៃ ដែលយុវជន ស.ស.យ.ក សម្រេចបានកន្លងមក រួមមានការរៀបចំរចនាសម្ព័ន្ធចាត់តាំង និងការកសាងស.ស.យ.ក,ការការពារ និងថែរក្សាអធិបតេយ្យភាពជាតិ បូរណភាពទឹកដី ឯករាជ្យភាព សន្តិភាព ស្ថិរភាព សេរីភាព និងសុវត្ថិភាពសង្គម,ការលើកកម្ពស់សុខដុមនីយកម្មសង្គម អត្តសញ្ញាណ និងលើកកិត្តិនាមកម្ពុជា។ លើសពីនេះ ក៏ជំរុញការអភិវឌ្ឍសេដ្ឋកិច្ច និងពាណិជ្ជកម្ម,ការអភិវឌ្ឍសមត្ថភាពយុវជន,ការចូលរួមសកម្មភាពសង្គម,ការលើកកម្ពស់សុខភាព និងវិស័យកីឡា,ការជំរុញកិច្ចសហការប្រតិបត្តិការ និងទំនាក់ទំនងអន្តរជាតិ,យុទ្ធនាការពលរដ្ឋល្អ រួមទាំងកិច្ចការផ្សព្វផ្សាយ និងសាធារណៈមតិផងដែរ។

 

សូមបញ្ជាក់ថា ត្រឹមឆ្នាំ ២០២១ រចនាសម្ព័ន្ធ ស.ស.យ.ក នៅថ្នាក់រាជធានី ខេត្ត ស្រុក ខណ្ឌ ឃុំ សង្កាត់ វិស័យ និងសមាជិកអង្គនីតិបុគ្គលរបស់ ស.ស.យ.ក មានសមាជិកសរុបជាង១៨ម៉ឺននាក់ ក្នុងនោះស្រ្ដីមាន៤២ភាគរយ៕