នៅតំបន់សមុទ្រចិនខាងត្បូងដែលមានបញ្ហារកច្រកចេញមិនឃើញ ចិន បានទាមទារកម្មសិទ្ធិ​ស្ទើរតែ​ទាំងស្រុងហើយបានសាងសង់កោះសិប្បនិម្មិតជាច្រើនផងដែរ។ ទោះបីជាមិនមែនជារដ្ឋទាមទារក្ដី អាម៉េរិកវិញ តែងចេញមុខរិះគន់ចិន និងតែងបានសម្ញែងអានុភាពយោធារបស់ខ្លួនតាមរយៈការបញ្ជូន​នាវាចម្បាំងជាច្រើនលើកច្រើនសារក្រោមហេតុផលការពារតំបន់ឥណ្ឌូ-ប៉ាស៊ីហ្វិកសេរី និង​បើកចំហ។

 

អំឡុងបទសម្ភាសជាមួយទីភ្នាក់ងារព័ត៌មាន AP នៅថ្ងៃទី២០ ខែមីនា មេបញ្ជាការបញ្ជាទីបញ្ជាការដ្ឋានឥណ្ឌូប៉ាស៊ីហ្វិក ឧត្តមនាវិ John C Aquilino លើកឡើងថា ទីក្រុងប៉េកាំងបានបង្កើនសមត្ថភាព និង​អាវុធនៅក្នុងតំបន់សមុទ្រចិនខាងត្បូងដែលការណ៍នេះ នឹងនាំឱ្យមានអស្ថិរភាពតំបន់។ 

 

បើតាមប្រមុខកងទ័ពអាម៉េរិកប្រចាំតំបន់រូបនេះ ចិនប្រហែលជាបានបញ្ចប់ការសាងសង់ឃ្លាំងមីស៊ីល, ឃ្លាំង​ផ្ទុកយន្តហោះ, បំពាក់ប្រព័ន្ធរ៉ាដា និងកន្លែងយោធាផ្សេងទៀតនៅលើកោះ Mischief, Subi និង Fiery Cross នៅសមុទ្រចិនខាងត្បូង។ លោកក៏អះអាងថា ចិនប្រហែលជា​សាងសង់ហេដ្ឋា​រចនា​សម្ព័ន្ធ​យោធានៅតំបន់ផ្សេងៗទៀតផងដែរ។

 

មេបញ្ជាការយោធាអាម៉េរិករូបនេះ បានរិះគន់ក្រុងប៉េកាំងទៀតថា សកម្មភាពបំពានខាងលើនេះ​គឺ​ផ្ទុយស្រឡះទៅនឹងការធានារបស់ប្រធានាធិបតីចិនលោក ស៊ី ជិនភីង ដែលបានអះអាងថា ទីក្រុង​ប៉េកាំងនឹងមិនប្រែក្លាយកោះសិប្បនិមិត្តនៅ ក្នុងដែនទឹកប្រទាញប្រទង់នេះទៅ​ជា​មូលដ្ឋាន​យោធា​នោះ​ឡើយ។ ឧត្តមនាវីដដែល ក៏សង្កត់ធ្ងន់ថា ​ចំណាត់ការខាងលើនេះ​គឺ​ជា​ផ្នែក​មួយ​នៃ​ការ​ពង្រឹង​សាច់ដុំ​យោធា​របស់ចិន៕