រដ្ឋមន្ត្រីការបរទេសសហភាពអឺរ៉ុប (EU) នៅថ្ងៃទី២១ ខែមីនា មិនឯកភាពគ្នា ចំពោះចំណាត់ការ ដាក់ទណ្ឌកម្មលើថាមពលរុស្ស៊ី ដើម្បីដាក់សម្ពាធដាក់ឱ្យប្រតិបត្តិការយោធាពិសេសនៅអ៊ុយក្រែន។ បើតាមមន្រ្តីទូតអឺរ៉ុបមួយរូប សហភាពអឺរ៉ុប ត្រូវការពេលវេលាមួយចំនួន ដើម្បីរកប្រភពថាមពលជំនួសពីរុស្ស៊ី ខណៈ លីទុយអានី បានអះអាងថា មិនគួរផ្ដល់ពេលឱ្យរុស្ស៊ីបន្តចំណេញពីការនាំចេញថាមពលទាំងនោះ។
ចាប់តាំងពីរុស្ស៊ីឈ្លានពានអ៊ុយក្រែន សហភាពអឺរ៉ុប បានដាក់ទណ្ឌកម្មនឹងរុស្ស៊ីជាច្រើន ក្នុងនោះរួមមាន ការបង្កកទ្រព្យសម្បត្តិធនាគារកណ្តាល និងអភិជនរុស្ស៊ីជាច្រើនរូប។ ប៉ុន្តែជុំវិញទណ្ឌកម្មលើប្រេង និងហ្គាសរុស្ស៊ី សមាជិកសហភាពអឺរ៉ុបទាំង ២៧ប្រទេស មិនចុះសម្រុងគ្នាឡើយ ដោយសារតែប្លុកមួយនេះ បានពឹងផ្អែកលើការនាំចូលថាមពលពីរុស្ស៊ីរហូតដល់ ៤០ភាគរយឯណោះ។
អាល្លឺម៉ង់ បារាំង អ៊ីតាលី ស្ថិតក្នុងចំណោមប្រទេសផ្សេងទៀត ដែលពឹងផ្អែកហ្គាសលើរុស្ស៊ី។ ចំណែកលីទុយអានី ហ្វាំងឡង់ ស្លូវ៉ាគី ប៉ូឡូញ និងប្រទេសផ្សេងទៀត បាននាំចូលប្រេងជាច្រើនប៉ារ៉ែលពីរុស្ស៊ី។
ក្រោយជំនួបរដ្ឋមន្ត្រីការបរទេសសហភាពអឺរ៉ុប នៅថ្ងៃទី២១ ខែមីនា រដ្ឋមន្ត្រីការបរទេសអាល្លឺម៉ង់ លោកស្រី Annalena Baerbock បានប្រាប់អ្នកសារព័ត៌មានថា សំណួរជុំវិញទណ្ឌកម្មប្រេងលើរុស្ស៊ី មិនមែនជាសំណួរ ដែលអាល្លឺម៉ង់ចង់បាន ឬមិនចង់បាននោះឡើយ ប៉ុន្តែវាមានសំណួរមួយ ថាតើបណ្តាប្រទេសអឺរ៉ុប បានពឹងផ្អែកលើប្រេងខ្លាំងប៉ុណ្ណាពីរុស្ស៊ី។
«អាល្លឺម៉ង់ កំពុងនាំចូលប្រេង(ពីរុស្ស៊ី)ជាច្រើន ប៉ុន្តែក៏មានសមាជិកផ្សេងទៀត ដែលមិនអាចបញ្ឈប់ការនាំចូលប្រេងពីមួយថ្ងៃទៅមួយថ្ងៃផងដែរ»។ លោកស្រី Baerbock បានលើកឡើងបែបនេះ ដោយបន្តថា សហភាពអឺរ៉ុបគួរតែជំរុញការកាត់បន្ថយការពឹងផ្អែកលើទីក្រុងមូស្គូ សម្រាប់តម្រូវការថាមពល។
យ៉ាងណាមិញ បណ្តាប្រទេសអឺរ៉ុបមួយចំនួនមិនពេញចិត្ត ក្នុងការពន្យារពេលដាក់ទណ្ឌកម្ម លើថាមពលរុស្ស៊ីនោះឡើយ។ រដ្ឋមន្ត្រីការបរទេសលីទុយអានី លោក Gabrielius Landsbergis បានសរសេរ លើបណ្ដាញសង្គមTwitter ថា សហភាពអឺរ៉ុបមិនគួរទុកពេលឱ្យរុស្ស៊ី នៅទទួលបានផលប្រយោជន៍ពីការនាំចេញប្រេងមកអឺរ៉ុប ការប្រើប្រាស់កំពង់ផែអឺរ៉ុបពីសំណាក់រុស្ស៊ី និងការប្រើប្រាស់ធនាគាររុស្ស៊ីនៅអឺរ៉ុប ដែលមិនទាន់ដាក់ទណ្ឌកម្មនោះឡើយ។
ពាក់ព័ន្ធនឹងបញ្ហានេះ មន្រ្តីទូតអឺរ៉ុបម្នាក់បានអះអាងថា សមាជិកខ្លះសង្ឃឹមថា ត្រឹមខែមិថុនា ខាងមុខ អឺរ៉ុបនឹងរកឃើញប្រភពថាមពលជំនួសគ្រប់គ្រាន់ ហើយពិចារណាបន្ថែមទៀត ចំពោះទណ្ឌកម្មប្រេងពីរុស្ស៊ី។ ប៉ុន្តែកាលបរិច្ឆេទមិនទាន់ត្រូវបាន ព្រមព្រៀងគ្នាទេ ហើយរដ្ឋសមាជិកផ្សេងទៀតអាចនឹងមានគោលដៅជំនួសផ្សេងៗគ្នាផង។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។
ក្រៅពីនេះ មន្រ្តីទូតអឺរ៉ុបផ្សេងទៀតបានបញ្ជាក់ថា ទណ្ឌកម្មមួយចំនួន កំពុងត្រូវបានពិភាក្សា ដែលរាប់បញ្ចូលទាំងការដាក់ទណ្ឌកម្មបិទចន្លោះប្រហោងលើមូលនិធិ ដែលប្រើប្រាស់ដោយអ្នកជំនួញ និងអ្នកនយោបាយរុស្ស៊ី, ការបន្ថែមជនជាតិរុស្ស៊ីទៅក្នុងបញ្ជីខ្មៅ, ការហាមឃាត់នាវារុស្ស៊ីកុំឱ្យចតនៅកំពង់ផែសហភាពអឺរ៉ុប, និងការកាត់បន្ថយការចូលប្រើធនាគារដែលពាក់ព័ន្ធនឹងប្រព័ន្ធទូរទាត់ប្រាក់អន្តរជាតិ SWIFT។
បញ្ហាទាំងអស់នេះនឹងត្រូវពិភាក្សាម្តងទៀត នៅថ្ងៃទី២៤ ខែមីនា ក្នុងពេលប្រធានាធិបតីអាម៉េរិក លោក ចូ បៃឌិន ចូលរួមកិច្ចពិភាក្សានៅទីក្រុង ព្រុចសែល ជាមួយសមាជិកសម្ព័ន្ធយោធាណាតូ, សហភាពអឺរ៉ុប, ក្រុមប្រទេសមានសេដ្ឋកិច្ចរីកចម្រើនទាំង៧ (G7) រួមទាំងជប៉ុនផងដែរ។ ភាគីទាំងអស់នឹងពិភាក្សាគ្នា ដើម្បីពង្រឹងការឆ្លើយតបចំពោះទីក្រុងមូស្គូ៕