អន្តរជាតិ
អ៊ុយក្រែន ជំរុញឱ្យចិនដើរតួសកម្មដើម្បីបញ្ឈប់សង្គ្រាម និងធ្វើជាអ្នកការពារសន្តិសុខនៅពេលខាងមុខ ប្រធានាធិបតីចិន ស៊ី ជិនភីង ។ រូបថត Xinhua
× ជំនួយការជាន់ខ្ពស់របស់ប្រធានាធិបតីអ៊ុយក្រែន Andriy Yermak នៅថ្ងៃទី២២ ខែមីនា លើកឡើងថា អ៊ុយក្រែនចង់ឱ្យចិនដើរតួសកម្មជាងបច្ចុប្បន្នដើម្បីចូលរួមដោះស្រាយសង្គ្រាមដែលបង្កឡើងដោយរុស្ស៊ី។ បន្ថែមពីនេះ លោក Yermak ក៏សង្ឃឹមថា ចិននឹងបំពេញតួនាទីជាអ្នកការពារសន្តិសុខអ៊ុយក្រែននៅពេលអនាគតក្រោមប្រព័ន្ធសន្តិសុខសកលផងដែរ។
ផ្ទុយពីលោកខាងលិច ចិនមិនបានថ្កោលទោសប្រតិបត្តិការយោធារបស់រុស្ស៊ីនៅអ៊ុយក្រែន ហើយក៏គាំទ្រហេតុផលរុស្ស៊ីក្នុងការការពារសន្តិសុខតាមព្រំដែនជាមួយអ៊ុយក្រែនផងដែរ។ លើសពីនេះ ចិនក៏បានរិះគន់សម្ព័ន្ធយោធាណាតូថា ជាមេបង្ករឿងដោយសារតែចង់ពង្រីកសមាជិកសម្ព័ន្ធយោធាទៅកាន់តំបន់អឺរ៉ុបខាងកើតដែលរុស្ស៊ីចាត់ទុកជាបន្ទាត់ក្រហមថែមទៀត។ ប៉ុន្តែក្រុងប៉េកាំងធ្លាប់បានបញ្ជាក់ជំហរថា នឹងគោរពបូរណភាពទឹកដីអ៊ុយក្រែន ហើយក៏គាំទ្រការដោះស្រាយបញ្ហាតាមការទូតផង។
ខណៈសង្គ្រាមនៅតែបន្ត ហើយទណ្ឌកម្មលោកខាងលិចទំនងជាមិនអាចបញ្ឈប់ការឈ្លានពានរបស់រុស្ស៊ី ជំនួយការជាន់ខ្ពស់របស់ប្រធានាធិបតីអ៊ុយក្រែន Andriy Yermak ចង់ឱ្យចិនបង្កើនតួនាទីរបស់ខ្លួនថែមទៀត។ លោក Yermak អះអាង អ៊ុយក្រែនសង្ឃឹមឱ្យមានកិច្ចសន្ទនាឆាប់ៗនេះរវាងមេដឹកនាំអ៊ុយក្រែន និងប្រធានាធិបតីចិន ស៊ី ជិនភីង។
«រហូតមកដល់ពេលនេះ ពួកយើងបានឃើញជំហរអព្យាក្រឹតរបស់ចិន។ ហើយដូចដែលខ្ញុំ បាននិយាយពីមុនមក ពួកយើងជឿថា ចិនគួរតែដើរតួនាទីគួរឱ្យកត់សម្គាល់បន្ថែមទៀតក្នុងការបញ្ឈប់សង្រ្គាម និងការកសាងប្រព័ន្ធសន្តិសុខពិភពលោកថ្មីមួយ»។ លោក Yermak បានលើកឡើងបែបនេះអំឡុង សន្និសីទកាសែតតាមប្រព័ន្ធអនឡាញរៀបចំដោយស្ថាប័ន Chatham House ។
ទីប្រឹក្សាប្រធានាធិបតីអ៊ុយក្រែនរូបនេះ បង្ហាញក្ដីរំពឹងទៀតថា ក្រុងប៉េកាំងនឹងរួមចំណែកយ៉ាងសំខាន់ចំពោះប្រព័ន្ធសន្តិសុខថ្មីសម្រាប់អ៊ុយក្រែន ហើយចិនក៏អាចនឹងក្លាយជាអ្នកធានាសន្តិសុខអ៊ុយក្រែនក្រោមក្របខ័ណ្ឌនៃប្រព័ន្ធសន្តិសុខសកល។ លោក Yermak ក៏បានសង្កត់ធ្ងន់ថា ខណៈអ៊ុយក្រែនគោរពចិនចំពោះការសម្រេចចិត្តកន្លងមក អ៊ុយក្រែនក៏នៅតែសង្ឃឹមថាក្រុងប៉េកាំងនឹងសម្រេចចិត្តដើរតួនាទីឱ្យបានសកម្មក្នុងវិបត្តិមួយនេះ៕
© រក្សាសិទ្ធិដោយ thmeythmey.com