«ការសម្រេចបាននូវសមិទ្ធផលដ៏ល្អប្រសើរនេះ ជាកំណត់ត្រាប្រវត្តិសាស្ត្រនៃការប្រមូលចំណូលពន្ធ ដែលអគ្គនាយកដ្ឋានពន្ធដារសម្រេចបានលើសផែនការរហូតដល់ ២៤,០២ភាគរយ ស្មើនឹង ៥៣៨,៨៥លានដុល្លារ»។ សម្តេច ហ៊ុន សែន បានបញ្ជាក់យ៉ាងដូច្នេះនៅក្នុងលិខិតរបស់ខ្លួន ដែលផ្ញើជូនលោក គង់ វិបុល កាលពីថ្ងៃទី២៤មីនា ឆ្នាំ២០២២។ 

 

បើតាម ប្រមុខ​រដ្ឋាភិបាល​ សមិទ្ធផលនេះ ផ្តើមចេញពីការប្រកាន់យកជំហរប្រសិទ្ធភាព នៃការដឹកនាំប្រកាន់ យកនូវគោលការណ៍ អភិបាលកិច្ចល្អ និងរដ្ឋបាលកិច្ចល្អ ព្រមទាំងការខិតខំប្រឹងប្រែងប្តេជ្ញាចិត្តខ្ពស់របស់លោក គង់ វិបុល ក្នុងឋានៈជាអ្នកដឹកនាំអគ្គនាយកដ្ឋានពន្ធដារ បើទោះបីជា កម្ពុជាស្ថិតក្នុងកាលៈទេសៈ ដ៏លំបាកនៃការប្រយុទ្ធប្រឆាំងជំងឺកូវីដ-១៩ក្តី។ 

 

ជាមួយគ្នានេះ សម្តេចបាន​ប្រកាសគាំទ្រនូវវិធានការនានាដែលអគ្គនាយកដ្ឋានពន្ធដារបានដាក់ចេញ ដើម្បីបង្កើនប្រសិទ្ធភាព និងតម្លាភាពនៃការប្រមូលចំណូលពង្រឹងគុណភាពសេវាអ្នកជាប់ពន្ធ និងបន្តធ្វើទំនើបកម្មរដ្ឋបាលសារពើពន្ធឱ្យកាន់តែមានភាពប្រសើរឡើងជាលំដាប់៕​