មន្ត្រី នៃអគ្គនាយកដ្ឋានការពារ អ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) សាខារាជធានីភ្នំពេញ នៅថ្ងៃទី២៩មីនា បានបំផ្លាញចោលនូវទំនិញចម្រុះខូចគុណភាព ដែលជាផលិតផលម្ហូបអាហារ ភេសជ្ជៈ និង ស្រាសមានផ្ទុកសារធាតុមេតាណុល ចំនួន៦១០គីឡូក្រាម និង ៣ ៥៤០លីត្រ។ បើតាមហ្វេសប៊ុក ក.ប.ប ទំនិញជាង៤តោនខាងលើនេះ ខូចគុណភាព ហួសកាលបរិច្ឆេទកំណត់ និងរំលោភបំពានសិទ្ធផ្ដាច់មុខជាដើម ដែលត្រូវបានមន្ត្រីដកហូតតាមបណ្ដា​ចែកចាយ និងទីផ្សារនានា ។ 
 

នៅថ្ងៃដដែលនោះ មន្ត្រី ក.ប.ប សាខារាជធានីភ្នំពេញ រួមនឹងគណៈកម្មាធិការប្រយុទ្ធប្រឆាំងផលិតផលក្លែងក្លាយ បានត្រួតពិនិត្យទំនិញប្រភេទសាច់បង្កក ក្នុងឃ្លាំង និងមធ្យោបាយដឹកជញ្ជូន ដោយបានរកឃើញទំនិញទាំងនោះ មិនមានអនុលោមតាមបទដ្ឋានគតិយុត្ត។ បន្ទាប់ពីរកឃើញ មន្ត្រី ក.ប.ប បានឃាត់ទុក និងផ្អាកសកម្មភាពអាជីវកម្មបណ្ដោះអាសន្ន៕