លោក ឃុល ភីរម្យ អ្នកចាត់ការក្រុមជម្រើសជាតិបាល់ទាត់Futsal បានបង្ហាញឆន្ទៈខ្ពស់ ក្នុងការដឹកនាំប្រកួតនេះ ទោះបីត្រូវប្រឈមមុខជាមួយក្រុមខ្លាំងក្តី។ លោក ឃុល ភីរម្យ បានដឹកនាំកីឡាករជម្រើសជាតិ ១៤នាក់ទៅចូលរួមប្រកួតនេះ។
 

ថ្លែងប្រាប់សារពត៌មានថ្មីៗ អ្នកចាត់ការរូបនេះ បាននិយាយថា៖«ពួកយើង នឹងប្រឹងឲ្យអស់ពីលទ្ធភាព តាមដែលអាចធ្វើទៅបាន លេង១០០ភាគរយ គ្រប់ពេលទោះជួបក្រុមខ្លាំងៗ បទពិសោធន៍ច្រើនជាងយើង ហើយទោះស្ថិតក្នុងស្ថានភាពកូវីដ១៩ក៏ដោយ ដើម្បីឲ្យទទួលបានលទ្ធផលជូនជាតិ»។ 
 

សម្រាប់ការប្រកួត AFF Futsal Championship ប្រទេសការពារដំណែងជើងឯក ថៃ ត្រូវប្រកួតជាមួយ ម៉ាឡេស៊ី ឥណ្ឌូនេស៊ី ព្រុយណេ និង កម្ពុជា នៅក្នុងពូល A ខណៈ ពូលB មាន វៀតណាម មីយ៉ាន់ម៉ា ទីម័រខាងកើត និងអូស្ត្រាលី ។
 

គួរបញ្ជាក់ផងដែរថា ការប្រកួតរយៈ១៧លើកកន្លងមក ថៃ បានឈ្នះជើងឯក១៥សម័យកាល ខណៈ ឥណ្ឌូនេស៊ី ធ្លាប់ឈ្នះ ជើងឯកមួយលើក។ ដោយឡែក កម្ពុជា ចូលរួមប្រកួតបាន៦លើក តែបានចំណាត់ថ្នាក់លេខ៤ ពីរលើក៕