ជាតិ
សេដ្ឋកិច្ច
ឥណ្ឌាផ្តល់ជំនួយ៥ម៉ឺនដុល្លារ ដើម្បីលើកកម្ពស់មុខវិជ្ជា«STEM»ដល់សិស្សនៅកំពត លោក ចម ប្រសិទ្ធ រដ្ឋមន្រ្តីក្រសួងឧស្សាហកម្ម កំពុងចុះហត្ថលេខាជាមួយលោកស្រី Davyani Khobragade ឯកអគ្គរដ្ឋទូតសាធារណរដ្ឋឥណ្ឌាប្រចាំកម្ពុជា លើគម្រោងទទួលផលរហ័ស (QIP) ក្នុងការពង្រឹងផ្នែកវិទ្យាសាស្ត្រ បច្ចេកវិទ្យា និងនវានុវត្តន៍ នៅខេត្តកំពត។ រូបថត៖ ក្រសួងឧស្សាហកម្ម
×
ដោយ៖ ធន់ សេងហុង
ភ្នំពេញ៖ ប្រទេសឥណ្ឌា ផ្តល់ជំនួយឥតសំណងចំនួន៥ម៉ឺនដុល្លារ ដើម្បីលើកកម្ពស់ការអប់រំដល់សិស្សនៅខេត្តកំពត ក្នុងវិស័យវិទ្យាសាស្ត្រ បច្ចេកវិទ្យា និងនវានុវត្តន៍(STI)និងមុខវិជ្ជាSTEM។ ការលើកកម្ពស់នេះ គឺធ្វើឡើងតាមរយៈការបង្កើតឲ្យមានវិធានណែនាំអំពីការអប់រំ STI-STEM ក្នុងចំណោមគ្រូបង្រៀន និងលើកកម្ពស់ការអប់រំវិស័យ STEM ដល់សិស្សានុសិស្ស។
កម្ពុជាតាមរយៈក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ទទួលបានជំនួយឥតសំណងចំនួន៥ម៉ឺនដុល្លារ ពីប្រទេសឥណ្ឌាដើម្បីជំរុញការអប់រំក្នុងវិស័យវិទ្យាសាស្ត្រ បច្ចេកវិទ្យា និងនវានុវត្តន៍(STI)និងមុខវិជ្ជាSTEM( Science Technology Engineering Mathematicians) ដល់សិស្សនៅខេត្តកំពត។ ជំនួយនេះ ស្ថិតក្រោមគម្រោងទទួលផលរហ័ស(QIP) ក្នុងការពង្រឹងផ្នែកវិទ្យាសាស្ត្រ បច្ចេកវិទ្យា និងនវានុវត្តន៍ នៅខេត្តកំពត ដែលបានចុះហត្ថលេខាដោយ លោក ចម ប្រសិទ្ធ រដ្ឋមន្រ្តីក្រសួងឧស្សាហកម្ម ជាមួយលោកស្រី Davyani Khobragade ឯកអគ្គរដ្ឋទូតសាធារណរដ្ឋឥណ្ឌាប្រចាំកម្ពុជា នាថ្ងៃទី៣១មីនា។
បើតាមលោក ចម ប្រសិទ្ធ ជំនួយឥតសំណងពីប្រទេសឥណ្ឌានេះ នឹងជួយបណ្តុះបណ្តាល ស្តីពី«ការណែនាំការអប់រំលើវិស័យSTEM /គរុកោសល្យ" ដល់លោកគ្រូ អ្នកគ្រូសម្រាប់វិទ្យាល័យសាធារណៈចំនួន៥កន្លែង នៅខេត្តកំពត។ ជំនួយនេះ ក៏នឹងបង្កើតក្លឹបSTEM សម្រាប់សិស្ស និងយុទ្ធនាការលើកកម្ពស់ការអប់រំ STEM ដល់ភាគីពាក់ព័ន្ធនានា។ នេះបើតាមការចុះផ្សាយរបស់ក្រសួងឧស្សាហកម្ម។
លោក ចម ប្រសិទ្ធ បានបញ្ជាក់ថា ជំនួយពីប្រទេសឥណ្ឌាក្នុងវិស័យអប់រំនេះ ជួយអភិវឌ្ឍន៍ធនធានមនុស្ស ស្របនឹងសេដ្ឋកិច្ចកម្ពុជាកំពុងឆ្ពោះទៅទិសដៅឧស្សាហកម្ម ដើម្បីសម្រេចបាននូវចក្ខុវិស័យរបស់រាជរដ្ឋាភិបាលឆ្នាំ២០៣០និង២០៥០៕
© រក្សាសិទ្ធិដោយ thmeythmey.com