កីឡាអន្តរជាតិ
អន្តរជាតិ
ប្រាក់រង្វាន់ World Cup 2022៖ ៤២លានដុល្លារសម្រាប់ជើងឯក ឯលេខពីរ ៣០លានដុល្លារ
× កាតា តាមរយៈសហព័ន្ធកីឡាបាល់ទាត់អន្តរជាតិ (FIFA) នឹងផ្តល់ប្រាក់រង្វាន់ឱ្យក្រុមជើងឯក FIFA World Cup 2022 ចំនួន៤២លានដុល្លារ ឯលេខពីរ ៣០លានដុល្លារ។ សម្រាប់ព្រឹត្តិការណ៍បាល់ទាត់ពិភពលោកលើកទី២២ FIFA នឹងត្រូវចំណាយប្រាក់រង្វាន់ឱ្យក្រុមទាំង៣២ សរុប ៥២៥លានដុល្លារ។
ទោះទើបរកឃើញ២៩ក្រុមមានកៅអីទៅកាតា ប៉ុន្តែការចាប់ឆ្នោតវគ្គចែកពូលការប្រកួត World Cup ឆ្នាំ២០២២ បានធ្វើឡើងរួចហើយនៅទីក្រុងដូហា ប្រទេសកាតានៅថ្ងៃទី១ ខែមេសា ។ ការប្រកួត World Cup នឹងចាប់ផ្តើម នៅថ្ងៃទី២១ ខែវិច្ឆិកាខាងមុខ។
បើតាមការផ្សាយរបស់កាសែត Doha News ក្នុងវគ្គជម្រុះតាមពូលចាប់ពីពូល A ដល់ H ក្រុមនីមួយៗនឹងទទួលបានប្រាក់ពី FIFA ១,៥លានដុល្លារ ដោយសរុបទាំង៣២ក្រុម ត្រូវចំណាយអស់ ៤៨លានដុល្លារ រួមទាំងបូកប្រាក់លើកទឹកចិត្តសម្រាប់ក្រុមឈ្នះផ្សេងទៀត ចំនួន៩លានដុល្លារ។
ក្រុមណាដែលអាចឈានដល់វគ្គ១៦ចុងក្រោយ នឹងទទួលបានក្នុងមួយក្រុម ១៣លានដុល្លារទៀត សរុប ២០៨លានដុល្លារ។ សម្រាប់ក្រុមឈានដល់វគ្គ១/៤ផ្តាច់ព្រ័ត្រ នឹងទទួលបាន ១៧លានដុល្លារ ក្នុងមួយក្រុម សរុប១៣៦លានដុល្លារ។
ក្រុមដែលបញ្ចប់ក្នុងចំណាត់ថ្នាក់ទី៤ នឹងទទួលបានប្រាក់រង្វាន់បន្ថែម ២៥លានដុល្លារ ខណៈលេខ៣ ទទួលបាន២៧លានដុល្លារ។ ក្រុមតំណាងប្រទេសណា ដែលអាចឈ្នះតំណែងជើងឯក World Cup ឆ្នាំ២០២២ នឹងទទួលបានប្រាក់រង្វាន់បន្ថែមចំនួន ៤២លានដុល្លារ ឯក្រុមរងជើងឯកទទួលបាន ៣០លានដុល្លារ។
ការចំណាយប្រាក់រង្វាន់ចំនួន៥២៥លានដុល្លារ ក្នុងការប្រកួតកីឡាបាល់ទាត់ពិភពលោកនៅកាតា មានចំនួនលើសការចំណាយនៅប្រទេសរុស្ស៊ី ដែលមានត្រឹម៤៤៨លានដុល្លារសម្រាប់៣២ក្រុម៕
© រក្សាសិទ្ធិដោយ thmeythmey.com