ក្រុមរហ័សនាមអ្នកមានបារាំង PSG បានប្រយុទ្ធយកឈ្នះក្នុងលទ្ធផល ២-១ លើក្រុមភ្ញៀវ។ ជ័យជម្នះដែលរកបាន ដោយការស៊ុតបាល់បញ្ជូលទីរបស់ខ្សែប្រយុទ្ធ Neymar JR នៅនាទី១២ និង Kylian Mbappe នាទី៤៥+៥ នាវគ្គទីមួយ។ កីឡាករ Dimitri Payet ជាអ្នកស៊ុតគ្រាប់បាល់ ១គ្រាប់លើ PSG វិញនៅនាទី ២២។
 

ជាមួយជ័យជម្នះបានរុញក្រុម PSG ឱ្យបន្តនាំមុខនៅកំពូលតារាងដែលមានពិន្ទុនាំមុខ ក្រុម Marseille ឈរលេខពីរ ចំនួន១៥ពិន្ទុ ខណៈការប្រកួតនៅសល់៦ប្រកួតក្នុងដៃ នៃរដូវកាលនេះ។ ទោះជាបែបនេះក្តីគ្រូបង្វឹកសញ្ជាតិអាហ្សង់ទីនរូបនេះ បាននិយាយថា កង្វះការគាំទ្រ បានធ្វើឱ្យប៉ះពាល់អារម្មណ៍ក្រុម ដែលកំពុងឈានទៅលើកពានរង្វាន់លីគបារាំង។
 

«យើងកំពុងតែរង់ចាំអ្នកគាំទ្រណាដែលអាចទទួលយកយើងបានពេលនេះ ដើម្បីផ្តល់ថាមពលហើយគាំទ្រយើងឱ្យបានខ្លាំងថែមទៀត។ ពួកគេបានបង្ហាញអារម្មណ៍អស់សង្ឃឹមមកលើយើង ហើយយើងក៏គោរពតាមពួកគេ ប៉ុន្តែយើងក៏នៅតែត្រូវការ ការគាំទ្រពីអ្នកគាំទ្ររហូតអ៊ីចឹង»។ លោក Pochettino និយាយបែបនេះ ក្នុងសន្និសីទកាសែតក្រោយចប់ការប្រកួត។
 

យ៉ាងណាមិញ មានសេចក្តីរាយការណ៍មួយចំនួនបាននិយាយថា ក្រុមអ្នកគាំទ្ររបស់ PSG បានបន្តធ្វើបាតុកម្មស្នើឱ្យមានការផ្លាស់ប្តូរសមាជិកនៃគណកម្មាធិការប្រតិបត្តិក្លិប និងគណគ្រប់គ្រងក្លិបរបស់បារាំងមួយនេះ ចេញក្រោយក្រុម ធ្លាក់ចេញពី Champions League។
 

ដោយឡែកខ្សែការពារ Marquinhos ដែលជាប្រធានក្រុម PSG ក៏ភ្ញាក់ផ្អើលជាខ្លាំងចំពោះកង្វះការគាំទ្របែបនេះ ក្នុងនាមជាកីឡាករម្នាក់របស់ក្លិប៕