«វាពិតជាទុក្ខដ៏ធំមួយដែលយើងត្រូវតែប្រកាសថា ទារករបស់យើងបានស្លាប់។ វាគឺជាការឈឺចាប់ដ៏ធំបំផុត ដែលឪពុកម្តាយគ្រប់រូបអាចនឹងងាយទទួលអារម្មណ៍បែបនេះ»។ Ronaldo និងមិត្តស្រី Rodriguez និយាយបែបនេះ ក្នុងសេចក្តីថ្លែងការណ៍រួមមួយនៅលើបណ្តាញសង្គម។
 

ខ្សែប្រយុទ្ធវ័យ ៣៧ឆ្នាំ បានមានទំនាក់ទំនងជាមួយដៃគូ Georgina Rodriguez អំឡុងពេលរូបគេលេងនៅក្លិបយក្សអេស្ប៉ាញ Real Madrid ហើយអ្នកទាំងពីរមានកូនស្រីអាយុ៤ឆ្នាំម្នាក់ ខណៈ Ronaldo មានកូន៣ នាក់រួចហើយ។
 

ក្រោយទទួលបានដំណឹងយ៉ាងក្រៀមក្រំពីសំណាក់ម្ចាស់ពានរង្វាន់ Ballon d’Or ៥សម័យ ក្លិបបិសាចក្រហមបានបង្ហោះសាររំលែកទុក្ខ ដោយបាននិយាយថា «ទុក្ខរបស់អ្នកក៏ដូចជាទុក្ខរបស់យើង Ronaldo។ ហើយយើងនឹងផ្ញើការស្រលាញ់ និងការកម្លាំងចិត្តដល់អ្នកព្រមទាំងក្រុមគ្រួសារអ្នកពេលនេះ»។
 

មិនត្រឹមតែប៉ុណ្ណោះប្រធានក្លិប Real Madrid ក៏ដូចជាក្លិបដែល Ronaldo ធ្លាប់រួមរស់ ក៏បានប្រកាសនៅលើគេហទំព័រក្លិប ចូលរួមរំលែកទុក្ខ ចំពោះការបាត់បង់ទារក ដែលជាក្តីស្រលាញ់របស់អតីតខ្សែប្រយុទ្ធ និងមិត្តស្រី៕