គ្រឹះស្ថានអង្គរបញ្ជាក់ថា ក្នុងរយៈពេល ៤ខែមកនេះ មានទេសចរសរុប ៣៣ ២០៥នាក់ បានទិញសំបុត្រចូលរមណីយដ្ឋានអង្គរ ដែលចំនួននេះកើនជាង ៦៣៣ភាគរយ ធៀបនឹងរយៈពេលក្នុងឆ្នាំ២០២១ គ្រាដែលកម្ពុជា ក៏ដូចជាពិភពលោកជួបវិបត្តិធ្ងន់ធ្ងរពីការរាតត្បាតនៃជំងឺកូវីដ-១៩។ 

 

ដោយឡែក ក្នុងខែមេសាកន្លងទៅនេះ មានចំនួនទេសចរ​ ចំនួន ១៣ ៣៦៤នាក់ បានទិញបណ្ណចូលទស្សនារមណីយដ្ឋានអង្គរ ហើយចំណូលលក់សំបុត្រនោះមានចំនួន ៥៣៧ ០៤០ដុល្លារ។

 

ក្រៅពីនេះតំបន់អង្គរ គ្រឹះស្ថានអង្គរ ក៏បានលក់សំបុត្រចូលទស្សនាតំបន់កោះកេរបាន​ចំនួន ៣ ៤៣៥ដុល្លារដែរ ដល់ទេសចរអន្តរជាតិចំនួន ២២៩នាក់ ក្នុងខែមេសាកន្លងទៅ។ ទន្ទឹមនឹងនេះ ចំណូលពីការលក់សំបុត្រទូក នៅកំពង់ផែចុងឃ្លៀស ក្នុងខែមេសា មានចំនួន ១៥ ៩១៩ដុល្លារ ទៅដល់ទេសចរចំនួន ៣ ៨១៧នាក់ផងដែរ។

 

​ក្នុងរយៈពេល ៤ខែ ចំណូលពីការលក់សំបុត្រចូលរមណីយដ្ឋានអង្គរ ដែលបានឧបត្ថម្ភទៅមូលនិធិគន្ធបុប្ផា មានចំនួន ៦៦ ៤១០ដុល្លារ។ នេះបើតាមសេចក្តីប្រកាសព័ត៌មានរបស់គ្រឹះស្ថានអង្គរ៕