ភ្នំពេញ៖ ស្ថាប័នហិរញ្ញវត្ថុចំនួន៦ នៅកម្ពុជា រងការរំលោភសិទ្ធិមនុស្ស និងបទដ្ឋានសាជីវកម្មអន្តរជាតិ ពីសំណាក់អង្គការសង្គមស៊ីវិល។ ប៉ុន្តែសមាគមមីក្រូហិរញ្ញវត្ថុកម្ពជា អះអាងថា មិនដែលមានករណីរំលោភបំពានសិទ្ធិមនុស្សធ្ងន់ធ្ងរ និងបទដ្ឋានសាជីវកម្មអន្តរជាតិឡើយ។
សង្គមស៊ីវិលចំនួន២ គឺសម្ព័នខ្មែរជំរឿននិងការពារសិទ្ធិមនុស្ស (លីកាដូ) និងអង្គការសមធម៌កម្ពុជា ដែលធ្វើជាអ្នកតំណាងឲ្យអ្នករងគ្រោះពីការខ្ចីប្រាក់កម្ចីខ្នាតតូចពីគ្រឹះស្ថានហិរញ្ញវត្ថុនិងធនាគារបានដាក់បណ្ដឹងទៅស្ថាប័នឃ្លាំមើលសាជីវកម្មអន្តរជាតិ ដោយប្ដឹងស្ថាប័នហិរញ្ញវត្ថុ ចំនួន៦ ជុំវិញការរំលោភសិទ្ធិមនុស្ស និងលក្ខខណ្ឌសាជីវកម្ម។ ស្ថាប័នឃ្លាំមើលសាជីវកម្ម នឹងពិនិត្យមើលសំណុំរឿង ពាក់ព័ន្ធគម្រោងឥតទានខ្នាតតូចរបស់សាជីវកម្មហិរញ្ញវត្ថុអន្តរជាតិ ដែលផ្ដល់មកកម្ពុជា តាមពាក្យបណ្ដឹងនេះ។
សេចក្ដីថ្លែងការណ៍របស់លីកាដូ ដែលចេញថ្ងៃទី៣ ឧសភា បានអះអាងថា គ្រឹះស្ថានមីក្រូហិរញ្ញវត្ថុ និងធនាគារនៅកម្ពុជាទាំង៦ រួមមាន ធនាគារអេស៊ីលីដា ធនាគារហត្ថា ធនាគារស្ថាបនា គ្រឹះស្ថានមីក្រូហិរញ្ញវត្ថុអម្រឹត គ្រឹះស្ថានមីក្រូហិរញ្ញវត្ថុអិលអូអិលស៊ី និងគ្រឹះស្ថានមីក្រូហិរញ្ញវត្ថុប្រាសាក់ ជាប់ពាក់ព័ន្ធនឹងការរំលោភសិទ្ធិមនុស្ស និងបទដ្ឋានសាជីវកម្មអន្តរជាតិ។ សម្ព័នខ្មែរជំរឿននិងការពារសិទ្ធិមនុស្ស (លីកាដូ) និងអង្គការសមធម៌កម្ពុជា
សេចក្ដីថ្លែងការណ៍ដដែលបានឲ្យដឹងថា ដើមបណ្ដឹងបានអំពាវនាវឲ្យស្ថាប័នឃ្លាំមើលសាជីវកម្មហិរញ្ញវត្ថុអន្តរជាតិ បើកការស៊ើបអង្កេតជាបន្ទាន់ ដើម្បីកំណត់ទំហំនៃផលប៉ះពាល់ឲ្យបានលម្អិត និងពិនិត្យវិសាលភាពនៃការរំលោភបំពាន។ ជុំវិញបណ្ដឹងករណីនេះ លោកស្រី ណាលី ពីឡូក នាយិកាទទួលបន្ទុកកិច្ចការក្រៅតំបន់នៃអង្គការលីកាដូ បានលើកឡើងថា ម្ចាស់បណ្ដឹងរងគ្រោះដោយសារកម្ចីនៅកម្ពុជាទាំងនេះ ប្រឈមនឹងហានិភ័យ ក្នុងការលាតត្រដាងពីការរំលោភបំពាន ដែលបង្កឡើងដោយគ្រឹះស្ថានមីក្រូហិរញ្ញវត្ថុ និងធនាគារនៅកម្ពុជា។
បើតាមលោកស្រី ណាលី ពីឡូក បណ្ដឹងនេះ សបញ្ជាក់ថា គម្រោងឥណទានខ្នាតតូចរបស់សាជីវកម្មហិរញ្ញវត្ថុអន្តរជាតិ បានរំលោភបំពានដោយផ្ទាល់ ទៅលើលក្ខខណ្ឌនៃបញ្ជីលើកលែងរបស់ខ្លួន ដែលពាក់ព័ន្ធនឹងការរំលោភបំពានសិទ្ធិដីធ្លី ពលកម្មកុមារ និងសន្តិសុខសហគមន៍ជាដើម។
នាយិកាទទួលបន្ទុកកិច្ចការក្រៅតំបន់នៃអង្គការលីកាដូ បានសង្កត់ធ្ងន់ថា៖ «ការវិនិយោគប្រកបដោយគ្រោះថ្នាក់ និងខ្វះការចាត់វិធានការចាំបាច់ឲ្យបានគ្រប់ជ្រុងជ្រោយ របស់សាជីវកម្មហិរញ្ញវត្ថុអន្តរជាតិ ពាក់ព័ន្ធនឹងគម្រោងកម្ចីឥណទានខ្នាតតូចរបស់ខ្លួន បានបំផ្លិចផ្លាញការរស់នៅ និងខូចខាតដល់សហគមន៍ជាច្រើននៅក្នុងប្រទេស ហើយពួកគេត្រូវតែចាត់វិធានការ ដើម្បីផ្ដល់ការអនុគ្រោះពិតប្រាកដសម្រាប់អ្នកខ្ចីប្រាក់ទាំងនោះ»។
ពាក់ព័ន្ធនឹងបណ្ដឹងនេះ លោក សុខ វឿន ប្រធានក្រុមប្រឹក្សាភិបាលសមាគមមីក្រូហិរញ្ញវត្ថុកម្ពុជា យល់ថា បើមានរឿងរ៉ាវរំលោភបំពាន ដូចការចោទប្រកាន់មែន នោះស្ថាប័នដែលប្រព្រឹត្តខុស នឹងប្រឈមមុខលើការវិនិយោគខ្លួន ។
លោក សុខ វឿន បានបន្ថែមថា៖ «ស្ថាប័ន(គ្រឹះស្ថានមីក្រូហិរវត្ថុនិងធនាគារ) ដែលត្រូវបានរកឃើញថា ពិតជាបានរំលោភគោលការណ៍ទាំងនោះ នឹងត្រូវតម្រូវឲ្យកែប្រែ ឬប្រឈមនឹងការដកទុនវិនិយោគចេញពី សាជីវកម្មហិរញ្ញវត្ថុអន្តរជាតិ»។
ស្ថាប័នឃ្លាំមើលសាជីវកម្មហិរញ្ញវត្ថុអន្តរជាតិ មានកាតព្វកិច្ចទទួលពាក្យបណ្ដឹង ដែលពាក់ព័ន្ធនឹងការវិនិយោគរបស់ខ្លួន ដើម្បីត្រួតពិនិត្យទាំងផលវិជ្ជមាន និងអវិជ្ជមានលើគម្រោងវិនិយោគរបស់ពួកគេ។
តែយ៉ាងណាលោក សុខ វឿន អះអាងថា ខាងសមាគមហិរញ្ញវត្ថុ មិនដែលរកឃើញករណីដូចការចោទប្រកាន់នៃពាក្យបណ្ដឹងរបស់សង្គមស៊ីវិលទាំងពីរឡើយ។ បើតាមលោក សុខ វឿន ប្រព័ន្ធនៃការផ្ដល់កម្ចីនៅកម្ពុជា មានស្ដង់ដារខ្ពស់ និងមានការទទួលស្គាល់ពីអន្តរជាតិ។
«ស្ថាប័នទាំង៦ ដែលបានរងការចោទប្រកាន់ សុទ្ធតែធ្លាប់ទទួលបានសញ្ញាប័ត្រ Smart Campaign ជាស្ដង់ដារមាសកម្រិតពិភពលោកផ្ដល់ជូនដល់គ្រឹះស្ថានហិរញ្ញវត្ថុ ដែលមានបេសកម្មសង្គម រួមទាំងយន្តការណ៍អតិថិជនច្បាស់លាស់រឹងមាំ»។ នេះបើតាមលោក សុខ វឿន ដែលបានបន្ថែមថា មានបញ្ហាតិចតួចបំផុតដែលសមាគមមីក្រូហិរញ្ញវត្ថុរកឃើញជា បញ្ហាបុគ្គល។ ត្រង់ចំណុចនេះលោកពន្យល់ថា បុគ្គលខ្លះបានប្រព្រឹត្តខុសគោលការណ៍ និងក្រមសីលធម៌។ ប៉ុន្តែ បុគ្គលទាំងនោះ ត្រូវបានរងពិន័យ ហើយបញ្ឈប់ការងារ និងប្រឈមមុខផ្លូវច្បាប់។
សេចក្ដីថ្លែងការណ៍ដដែលរបស់លីកាដូ បានឲ្យដឹងថា ស្ថាប័នទាំង៦ខាងលើ ទទួលបានការអនុម័តទឹកប្រាក់ជាង៤០០លានដុល្លារ ពីមូលនិធិសាជីវកម្មហិរញ្ញវត្ថុអន្តរជាតិ នារយៈពេល៥ឆ្នាំចុងក្រោយនេះ។ ការផ្ដល់ឲ្យនេះ មានកម្ចីឥណទានដោយផ្ទាល់ កម្ចីបញ្ចូលគ្នា និងការវិនិយោគផ្អែកលើសមភាពពីមូលនិធិ ដែលគាំទ្រដោយមានសាជីវកម្មហិរញ្ញវត្ថុអន្តរជាតិជាដើម។ ចំពោះកម្ចីឥណទានខ្នាតតូចរបស់ពលរដ្ឋកម្ពុជា ជិត៣លានកម្ចី មានទំហំទឹកប្រាក់ជាង១៤ពាន់លានដុល្លារ។ កម្ទីទាំងនេះ គឺតម្រូវឱ្យមានសវនកម្មទាំងស្រុង ហើយជាបន្ទាន់ ដើម្បីកំណត់ពីវិសាលភាពនៃការខូចខាត។
កន្លងមកអង្គការលីកាដូ បានចេញរបាយការណ៍ ប្រមាណ៥ដងហើយ រួមទាំងសេចក្ដីថ្លែងការណ៍ចុងក្រោយនេះ ជុំវិញបញ្ហាកម្ចីខ្នាតតូច និងការរំលោភសិទ្ធិមនុស្សនេះ។
ចំពោះរបាយការណ៍ និងវិធីសាស្រ្តធ្វើការរបស់អង្គការលីកាដូនេះ ខាងសមាគមមីក្រូហិរញ្ញវត្ថុកម្ពុជា មិនចាត់ទុកជារបាយការណ៍ផ្លូវការឡើយ ព្រោះសំណាកចុះសិក្សាស្រាវជ្រាវតិចតួច ខ្វះការយល់ដឹង និងគ្មានទិន្នន័យច្បាស់លាស់។ លោក សុខ វឿន បាននិយាយថា ការចេញរបាយការណ៍បែបនេះ គឺជាការធ្វើបាបប្រជាពលរដ្ឋ និងវាយប្រហាវិស័យគ្រឹះស្ថានមីក្រូហិរញ្ញវត្ថុ និងធនាគារទាំងមូល ខណៈវិស័យនេះ កំពុងជួយប្រជាជនរាប់លាននាក់។
ប្រធានក្រុមប្រឹក្សាភិបាលសមាគមមីក្រូហិរញ្ញវត្ថុកម្ពុជារូបនេះ បានសង្កត់ធ្ងន់ថា៖ «ការចោទប្រកាន់នេះ បានបង្កការរំខាន និងប៉ះពាល់ដល់កេរ្តិ៍ឈ្មោះកម្ពុជា និងគ្រឹះស្ថានដែលយកចិត្តទុកដាក់ខ្លាំង លើសុខុមាលភាពអតិថិជនរបស់គាត់»។
បើតាមលោក សុខ វឿន កន្លងមកសមាគមធ្លាប់បានផ្ទៀតផ្ទាត់ពីរបាយការណ៍របស់លីកាដូឡើងវិញ ក្នុងករណីខេត្តបន្ទាយមានជ័យ គឺរកឃើញថាប្រាស់ចាកពីការពិតទាំងស្រុង។ តែយ៉ាងណា ភាគីខាងសមាគមនឹងបន្តតាមដាន ជុំវិញចំណុចដែលពាក់ព័ន្ធនឹងការចោទប្រកាន់របស់អង្គការសង្គមស៊ីវិល។ ជាពិសេសសហការជាមួយអង្គការ និងអ្នកពាក់ព័ន្ធ ដែលមានគោលបំណងគាំពារ ឬការពារអតិថិជន ៕