ជាកិរិយាសព្ទ «រាវ» មានន័យថា ជ្រាវរកដោយដៃ។ រាវចាប់ត្រីក្នុងអង្រុត ។ ស្រាវជ្រាវរក, សង្កេតឈ្លេចឈ្លីរក។ រាវរកឲ្យឃើញសេចក្ដីពិត ។

 

ជាគុណសព្ទ «រាវ» ផ្ទុយពីពាក្យ​ខាប់។ ខ្លាញ់រាវ, បបររាវ របស់រាវ ឬ វត្ថុរាវ អ្វីៗដែលជាទឹក, មិនខាប់ ដូចយ៉ាងប្រេង, សុរាជាដើម ។ ក្មេងឈាមរាវ ក្មេងដែលកំពុងមានកម្លាំងពេញពាល មានចិត្តរហេវរហាវមិនសូវចេះអត់ធ្មត់ ។ ល ។

 

សម្រាប់នាមសព្ទវិញ «រាវ» សំដៅលើប្រដាប់ធ្វើដោយបន្ទោះត្បាញជាក្រឡា ឬដោយក្រងបន្ទះរនាបជាដើម សម្រាប់ផ្កាប់ចានដែលប្រើប្រាស់។ រាវចាន, ចានមួយរាវ។

 

ពាក្យទំនឹមទំនៀម​បុរាណ៖ ចានមួយរាវរណ្ដំតែគ្នាឯង នៅក្នុងលំនៅ ឬក្នុងបន្ទុកមួយចេះតែប្រទូស្តគ្នារឿយៗឥតស្រាក ដូចជាចានក្នុងរាវមួយរណ្ដំគ្នា ៕