កង្វះជើងហោះហើរ ជាបញ្ហាចម្បង។ ម្យ៉ាងទៀតកំណើនភ្ញៀវទេសចរ ក៏មានតែអំឡុងពេលពិធីបុណ្យជាតិធំៗ ទើបធ្វើឱ្យអភិបាលរូបនេះ ពិបាកវាយតម្លៃពីកំណើនភ្ញៀវទេសចរនាពេលអនាគត។ លោក សីហា ពន្យល់ថា ដ្បិតចូលឆ្នាំខ្មែរនេះ សៀមរាប មានកំណើនទេសចរ ប៉ុន្តែភាគច្រើនជាទេសចរក្នុងស្រុក។ ចំពោះភ្ញៀវបរទេស នៅមានកម្រិត ព្រោះជើងហោះហើរបើកដំណើរការបានតិចបំផុត ហើយប្រទេសជិតខាងក៏មិនទាន់អាចគ្រប់គ្រងជំងឺកូវីដ-១៩ បានប្រសើរនៅឡើយ។
 

លោក សីហា បានលើកឡើងដូច្នេះថា៖«ខ្ញុំសង្ឃឹមថាប្រទេសផ្សេងៗនឹងអាចទប់ស្កាត់ការរាលដាលជំងឺកូវីដ-១៩ យើងនឹងអាចទទួលបានកំណើនទេសចរច្រើនជាងនេះ។ ខេត្តសៀមរាបបានត្រៀមខ្លួនរួចជាស្រេច យើងមានលទ្ធភាពអាចទទួលភ្ញៀវទេសចរបាន។ កត្តាសំខាន់គឺប្រទេសដែលនៅជុំវិញ។ ដ្បិតយើងរៀបចំបានល្អ មានចំណុចទាក់ទាញទេសចរក្នុងខេត្តសៀមរាបក៏ដោយ ប៉ុន្តែបើសិនជាយើងនៅខ្វះកត្តាធ្វើដំណើរ ដូចជាជើងយន្តហោះដែលធ្វើដំណើរត្រង់មកសៀមរាបនៅមានតិចនៅឡើយ»។ 

 

អភិបាលរូបនេះ បញ្ជាក់ទៀតថា បច្ចុប្បន្ន ប្រតិបត្តិការទេសចរណ៍នៅខេត្តសៀមរាប ដូចជាសណ្ឋាគារ ផ្ទះសំណាក់ និងរមណីយដ្ឋានផ្សេងៗ បានដំណើរការត្រឹម៤០ភាគរយប៉ុណ្ណោះ ព្រោះខ្វះភ្ញៀវទេសចរនៅឡើយ។ លោក អះអាងថា នឹងបន្តជំរុញឱ្យមានការបើកឡើងវិញឱ្យបានច្រើន បើសិនជាមានភ្ញៀវទេសចរច្រើនវិលត្រឡប់មកវិញ៕