ប្រធានធិបតីរុស្ស៊ី លោកវ្ល៉ាឌីមៀ ពូទីន នៅថ្ងៃជ័យជម្នះទី៩ ខែឧសភា បានរំលឹកខួបដល់ទាហាន សូវៀតដែលបានយកឈ្នះសង្គ្រាមជាមួយណាស៊ីអាល្លឺម៉ង់ ក្នុងសង្គ្រាមលោកលើកទីពីរ ហើយបានសង្កត់ធ្ងន់ពីកងកម្លាំងរុស្ស៊ីដែលបានការពារមាតុភូមិពីការគំរាមកំហែងខាងក្រៅ។ យ៉ាងណាមិញ លោកពូទីន មិនបានលើកឡើងពីការប្រកាសប្រមូលកម្លាំងយោធា ឬការប្រកាសជ័យជម្នះលើសង្គ្រាមលើអ៊ុយក្រែននោះឡើយ។
ថ្ងៃទី៩ ខែឧសភា ត្រូវបានគេស្គាល់ថាជាទិវាជ័យជម្នះសម្រាប់ស្ស៊ី ហើយថ្ងៃនេះរំលឹក ដល់ពេលដែលទាហានសូវៀតបានយកឈ្នះសង្គ្រាមជាមួយណាស៊ីអាល្លឺម៉ង់ ក្នុងអំឡុងសង្គ្រាមលោកលើកទីពីរផង។ ជាធម្មតា លោកពូទីនតែងតែយកថ្ងៃនេះ ដើម្បីថ្លែងពី ស្នាដៃល្អៗដើម្បីបង្កើនការជឿទុកចិត្ត និងការគាំទ្រលើរដ្ឋាភិបាលរបស់លោក។
អ្នកនយោបាយលោកខាងលិច និងអ្នកឃ្លាំមើលរុស្ស៊ីមួយចំនួនបានប៉ាន់ស្មានថា លោក ពូទីនអាចនឹងរៀបចំការប្រកាសដ៏សំខាន់មួយនៅថ្ងៃទី៩ខែឧសភាជាមួយនឹងការប្រកាសសង្រ្គាម ឬការប្រកាសប្រមូលកម្លាំងយោធាបន្ថែមទៀត។ ក៏ប៉ុន្តែអ្នកនាំពាក្យវិមាន ក្រេមឡាំងលោក Dmitry Peskov ក៏បានច្រានចោលការសំអាងនេះថា ជារឿងដែលមិន អាចទៅរួច។
ដូចនឹងអ្វីដែលអ្នកនាំពាក្យរុស្ស៊ីបានលើកឡើង អំឡុងការថ្លែងសុន្ទរកថានៅទីលានក្រហម នៃទីក្រុងមូស្គូ ក្នុងការប្រារព្ធទិវាជ័យជំនះលើកទី៧៧ ប្រធានាធិបតីរុស្ស៊ី លោកពូទីន មិនបានលើកឡើងដូចអ្វីដែលលោកខាងលិច និងអ្នកឃ្លាំមើលរុស្សីបានរំពឹងទុកនោះទេ។ ផ្ទុយទៅវិញ លោកបានលើកឡើងស្រដៀងនឹងសព្វដងថា កងទាហានរុស្ស៊ីកំពុងតែប្រយុទ្ធ ដើម្បីការពារមាតុភូមិ និងសន្តិសុខរុស្ស៊ី។
«អ្នក(កងកម្លាំងរុស្ស៊ី)កំពុងប្រយុទ្ធ ដើម្បីមាតុភូមិ និងអនាគតរបស់ប្រទេសហើយ កុំឱ្យនរណាម្នាក់ភ្លេចមេរៀនពីសង្គ្រាមលោកលើកទីពីរ ដែលពួកយើងមិនទុកឱ្យ ពួកណាហ្ស៊ីមានវត្តមានលើពិភពលោកនេះទៀត»។ លោកពូទីន បានសង្កត់ធ្ងន់បែបនេះហើយ ដោយបន្តថា ទាហានរុស្ស៊ីកំពុងតែប្រយុទ្ធដើម្បីការពារប្រទេសដូចអ្វីដែលអ្នកជំនាន់មុនៗបានធ្វើផងដែរ។
ជាថ្មីម្ដងទៀតមេដឹកនាំរុស្ស៊ីរូបនេះក៏បានថ្កោលទោសសម្ព័ន្ធយោធាណាតូថាបានគំរាម កំហែងដល់សន្តិសុខព្រំដែនបស់ខ្លួន ហើយបានព្យាយាមធ្វើឱ្យរុស្ស៊ីចុះខ្សោយ និងបែកបាក់គ្នា។ ចំពោះការប្រយុទ្ធនៅតំបន់ដុនបាសដែលស្ថិតនៅភាពខាងកើតអុយក្រែន លោក ពូទីនបានបញ្ជាក់ដូចធ្លាប់បានប្រកាសថាជាការរំដោះតំបន់មួយនេះចេញពីការគ្រប់គ្រង របស់ក្រុងកៀវ។ ការលើកឡើងទាំងនេះត្រូវបានមើលឃើញថាជាការព្យាយាមបង្ហាញពី ភាពត្រឹមត្រូវរបស់រុស្ស៊ីក្នុងការលុកលុយអ៊ុយក្រែន។
យ៉ាងណាមិញ លោកពូទីនក៏បានបញ្ជាក់ពីការស្លាប់របស់ទាហាន និងមន្ត្រីអំឡុងពេល ប្រយុទ្ធផងដែរ ហើយក៏បានសន្យាថានឹងជួយជ្រោមជ្រែងដល់ក្រុមគ្រួសាររបស់ទាហាន ដែលបានលះបង់ជីវិត។
ក្នុងពេលថ្លែងសុន្ទរកថានោះ លោកពូទីនមិនបានលើកឡើងចំៗពីអ៊ុយក្រែន ហើយក៏មិនបានលើកឡើងពីការបង្ហូរឈាមនៅតំបន់ Mariupol ដែលបានបណ្ដាលឱ្យ ជនស៊ីវិលជាច្រើននាក់បានស្លាប់នោះទេ។ ចំណែករយៈពេលដែលសង្គ្រាម ក៏មិនត្រូវបានលើកឡើងដែរ។
បន្ទាប់ពីសុន្ទរកថារបស់លោកពូទីនបានបញ្ចប់ ក្បួនដង្ហែយោធាដ៏ធំ បានបង្ហាញវត្តមានរបស់ខ្លួនឡើងនៅជុំវិញទីលានក្រហម ក្នុងនោះមានដូចជា រថក្រោះ Armata និង T-90M Proryv ប្រព័ន្ធបាញ់គ្រាប់រ៉ុក្កែត និងព្រមទាំងមីស៊ីលផ្លោងអន្តរទ្វីប។ ទាហានប្រមាណ ១,១ ម៉ឺននាក់បានចូលរួមក្នុងក្បួនដង្ហែយោធាមួយ នេះ៕