កីឡាអន្តរជាតិ
អន្តរជាតិ
អង់គ្លេស នឹងធ្វើជាម្ចាស់ផ្ទះលីគបេស្បល MLB ឆ្នាំ ២០២៣ ២០២៤ និង ២០២៦
× ទីក្រុងឡុដ៍ប្រទេសអង់គ្លេស នឹងធ្វើជាម្ចាស់ផ្ទះសម្រាប់ការប្រកួត Major Baseball League ដែលជាលីគប្រកួតវាយកូនបាល់បេស្បល (Baseball) ដ៏ធំក្នុងពិភពលោកក្នុងឆ្នាំ ២០២៣ ២០២៤ និង ២០២៦ ខាងមុខ។ នេះបើតាមការប្រកាសរបស់គណកម្មាធិការលីគលោក Rob Manfred នាថ្ងៃទី៩ ខែឧសភា។
កាលពីឆ្នាំ ២០១៩ ក្រុមបេស្បល The New York Yankee និងក្រុម Boston Red Sox ធ្លាប់ធ្វើដំណើរទៅប្រកួតលីគ MLB ក្នុងតំបន់អឺរ៉ុបបាន២ប្រកួត ដោយធ្វើឡើងនៅទីក្រុងឡុដ៍នាកីឡដ្ឋាន London Stadium។ ឈានចូលឆ្នាំ ២០២០ ដោយសារតែបញ្ហាជំងឺរាតត្បាតសកលកូវីដ-១៩ ការប្រកួតវាយកូនបាល់បេស្បលនេះ ត្រូវបានលុបចោលវិញនៅប្រទេសអង់គ្លេស។
ទោះជាយ៉ាងនេះ ការប្រកួតកីឡាវាយកូនបាល់បេស្បលនេះ នឹងវិលត្រលប់ទៅកាន់ទីក្រុងឡុដ៍ជាថ្មីម្តងទៀតនៅឆ្នាំ ២០២៣ ខាងមុខ អមជាមួយគម្រោងនៃការប្រកួតបន្ថែមទៀតក្នុងឆ្នាំ ២០២៤ និង ២០២៦។
«ការប្រកួត MLB ទាំងអស់នៅទីក្រុងឡុដ៍ គ្រប់ទិដ្ឋភាពទទួលបានជោគជ័យដ៏ល្អណាស់ ហើយប្រជាជនអង់គ្លេសជាច្រើននៅទីក្រុងឡុដ៍ស្រលាញ់ចូលចិត្តកីឡាបេស្បលនេះ។ យើងពិតជាមានទំនុកចិត្តនឹងសម្លឹងមើលការនាំយកកីឡានេះត្រលប់ទៅកាន់ទីក្រុងឡុដ៍ជាថ្មីម្តងហើយដោយរយៈពេលវែងថែមទៀត ហើយជាមួយការប្រកួត MLB ជាច្រើន។»។ លោក Rob Manfred គណៈកម្មាធិកាលីគ MLB និយាយបែបនេះ។
លើសពីនេះទៅទៀត អភិបាលទីក្រុងឡុដ៍លោក Sadiq Aman Khan ក៏បានបង្ហាញចំណាប់អារម្មណ៍ចំពោះការធ្វើជាម្ចាស់ផ្ទះនេះ ដោយនិយាយថា៖«វាជាថ្ងៃប្រវត្តិសាស្ត្រសម្រាប់ទីក្រុងឡុដ៍និងបេស្បល វានឹងមានភាពទាក់ទាញចំពោះកីឡាករលំដាប់ពិភពលោកមួយនេះ បានក្លាយជាផ្នែកដែលជួយឱ្យទីក្រុងមួយនេះ ក្លាយជាទីក្រុងកីឡាដ៏ធំក្នុងពិភពលោក។»។
យ៉ាងណាមិញ កីឡដ្ឋាន London Stadium របស់ក្លិបញញ្ញូរយក្ស West Ham United បានទទួលឱកាសធ្វើជាម្ចាស់ផ្ទះ និងជាទីតាំងសម្រាប់ការប្រកួតវាយកូនបាល់បេស្បល របស់លីគ MLB នេះ៕
Tag:
Major league Baseball
London
© រក្សាសិទ្ធិដោយ thmeythmey.com