ប្រធានាធិបតីបារាំង អេម៉ានុយអ៊ែល ម៉ាក្រុង នៅថ្ងៃទី៩ ខែឧសភា ថ្លែងពីទីក្រុង Strasbourg ដោយស្នើឱ្យបង្កើតអង្គការនយោបាយថ្មីមួយ ដើម្បីអនុញ្ញាតឱ្យប្រទេសមិនមែនសមាជិកសហភាពអឺរ៉ុប (EU) ចូលរួម។ នៅថ្ងៃដដែលលោក ម៉ាក្រុងក៏បានធ្វើដំណើរទៅអាល្លឺម៉ង់ដើម្បីពិភាក្សាពីវិបត្តិអ៊ុយក្រែន និងអធិបតេយ្យភាព EUផងដែរ។
ក្រោយស្បថចូលតំណែងជាប្រធានាធិបតីបារាំងអាណត្តិទី២ លោក អេម៉ានុយអ៊ែល ម៉ាក្រុង នៅថ្ងៃទី៩ ខែឧសភា បានទៅទីក្រុង Strasbourg ដើម្បីប្រារព្ធទិវាអឺរ៉ុប រួចចេញដំណើរទស្សនកិច្ចជាលើកដំបូងទៅអាល្លឺម៉ង់ ដើម្បីជួបពិភាក្សាជាមួយអធិការបតី លោក អូឡាហ្វ ស្ហូល។
ថ្លែងសុន្ទរកថាអំឡុងពេលប្រារព្ធទិវាអឺរ៉ុប ប្រធានាធិបតីបារាំង អេម៉ានុយអ៊ែល ម៉ាក្រុង បានលើកឡើងពីការដាក់ចូលជាសមាជិកភាពសហភាពអឺរ៉ុប (EU) របស់អ៊ុយក្រែន។ រដ្ឋសមាជិក EU ស្វាគមន៍យ៉ាងកក់ក្តៅ ដើម្បីពន្លឿនដំណើរការចូលជាសមាជិករបស់អ៊ុយក្រែន។ ប៉ុន្តែ មន្រ្តី EU បានសង្កត់ធ្ងន់ថា ដំណើរការនេះអាចចំណាយពេលច្រើនឆ្នាំ ដោយសារមានកំណែទម្រង់ជាច្រើនត្រូវការសម្រេចមុននឹងអ៊ុយក្រែនដែលហែកហួរដោយសង្គ្រាមបំពេញតាមលក្ខណៈវិនិច្ឆ័យរបស់ EU។
ពាក់ព័ន្ធនឹងរឿងនេះ លោកម៉ាក្រុងបានព្រមានថា អ្នករាល់គ្នាដឹងយ៉ាងច្បាស់ហើយថា ដំណើរការអនុញ្ញាតឱ្យអ៊ុយក្រែនចូលជាសមាជិកជាការពិតណាស់នឹងប្រើពេលជាច្រើនឆ្នាំ។ ជំនួសមកវិញ មេដឹកនាំបារាំងរូបនេះបានស្នើឱ្យបង្កើតអង្គការនយោបាយថ្មីមួយដែលលោកហៅថា សហគមន៍នយោបាយអឺរ៉ុប ដែលនឹងបើកចំហឱ្យប្រទេសដែលមិនមែនសមាជិកសហភាពអឺរ៉ុប រួមទាំងអង់គ្លេសដែលបានចាកចេញពីប្លុក ចូលរួម។
«អង្គការអឺរ៉ុបថ្មីនេះនឹងអនុញ្ញាតរដ្ឋប្រជាធិបតេយ្យអឺរ៉ុបដែលប្រកាន់ខ្ជាប់នូវតម្លៃស្នូលរបស់យើងស្វែងរកកន្លែងថ្មីសម្រាប់កិច្ចសហប្រតិបត្តិការនយោបាយ សន្តិសុខ កិច្ចសហប្រតិបត្តិការថាមពល ការដឹកជញ្ជូន វិនិយោគ ហេដ្ឋារចនាសម្ព័ន្ធ ការផ្លាស់ទីតាំងរបស់ប្រជាជន»។ មេដឹកនាំបារាំងបានសង្កត់ធ្ងន់ បែបនេះនៅសភាអឺរ៉ុប ដោយបន្ថែមថាការចូលរួមអង្គការថ្មីនេះ នឹងមិនធានាសមាជិកភាពសហភាពអឺរ៉ុបនៅថ្ងៃអនាគតទេ។
បន្ទាប់ពីប្រារព្ធទិវាអឺរ៉ុប លោក ម៉ាក្រុងបានទៅអាល្លឺម៉ង់ ដើម្បីជួបពិភាក្សាជាមួយលោកស្ហូល ដែលជាដំណើរទស្សនកិច្ចដំបូង បន្ទាប់ពីលោកស្បថចូលតំណែង។ នេះគឺជាទំនៀមទម្លាប់ប្រពៃណីរវាងក្រុងប៉ារីស និងក្រុងបែរឡាំងដែលលោក ស្ហូលក៏យកបារាំងជាទិសដៅដំណើរទស្សនកិច្ចទីមួយដែរ បន្ទាប់ពីលោកស្បថចូលកាន់តំណែងកាលពីខែធ្នូ ឆ្នាំ២០២១។
មកដល់ទីក្រុងបែរឡាំងនៅថ្ងៃទី៩ ខែឧសភា ប្រធានាធិបតីបារាំងត្រូវបានទទួលស្វាគមន៍អមដោយយោធានៅឯការិយាល័យអធិការបតីអាល្លឺម៉ង់ មុនចាប់ផ្តើមកិច្ចប្រជុំបិទទ្វារ និងកិច្ចពិភាក្សាអំឡុងអាហារពេលល្ងាច។ វិបត្តិនៅអ៊ុយក្រែន និងអធិបតេយ្យភាពសហភាពអឺរ៉ុប (EU) គឺជារបៀបវាៈសំខាន់នៃកិច្ចជំនួបនេះ។
មេដឹកនាំបារាំង បានប្រាប់មេដឹកនាំអាល្លឺម៉ង់យ៉ាងច្បាស់ថា សហភាពអឺរ៉ុប គួរតែប្រាប់អ៊ុយក្រែនពីរយៈពេលនៃការចូលជាសមាជិក ហើយអឺរ៉ុបមិនត្រូវបញ្ឈប់នីតិវិធីចូលជាសមាជិកថ្មីឡើយ។ ជាការឆ្លើយតប អធិការបតី បានសាទរគំនិតរបស់លោកម៉ាក្រុង ដោយសារតែអឺរ៉ុបកំពុងជួបបញ្ហាប្រឈមដ៏ធំ។ មិនតែប៉ុណ្ណោះ ប្រធានាធិបតីបារាំង បានទទួលស្គាល់ថា សង្រ្គាមនៅអ៊ុយក្រែន បានជះឥទ្ធិពលដល់អឺរ៉ុប និងប្រជាជនខ្លួនយ៉ាងខ្លាំង ហើយអឺរ៉ុបត្រូវតែការពារអ៊ុយក្រែន៕