Manchester City បានប្រកាសពីការសម្រេចបានលទ្ធផលមួយជំហានទៀត ក្នុងការនាំកីឡាករ Erling Haaland មកកាន់ក្លិប តាមរយៈការឈានដល់កិច្ចព្រមព្រៀងជាមួយក្លិប Borussia Dortmund។

 

Manchester City បានចេញសេចក្តីថ្លែងការណ៍ខ្លីថា៖«យើងបានឈានដល់កិច្ចព្រមព្រៀងជាគោលការណ៍ជាមួយ Borussia Dortmund សម្រាប់ការផ្ទេរខ្សែប្រយុទ្ធ Erling Haaland មកកាន់ក្លិបនៅថ្ងៃទី ១ ខែកក្កដា ឆ្នាំ ២០២២»។
 

បើតាម Man city ការផ្ទេរនេះ នៅតែស្ថិតក្រោមលក្ខខណ្ឌចុងក្រោយរបស់ក្លិបជាមួយនឹងកីឡាករ Haaland ។ បើតាមមានការព្រមព្រៀងជាផ្លូវការនោះ ទឹកប្រាក់ ៧៨លានដុល្លារ អាចជាតម្លៃខ្លួន Haaland ដើម្បីចាកចេញពីអាល្លឺម៉ង់ទៅកាន់ទឹកដីអង់គ្លេស។
 

កាលពីថ្ងៃទី៩ ឧសភា Erling Haaland បានទទួលការពិនិត្យសុខភាពនៅទីក្រុង Brussels រួចហើយ និងយល់ព្រមលើកិច្ចសន្យាផ្ទាល់ខ្លួនជាមួយក្លិបមេឃខៀវ ដោយទទួលបានប្រាក់ពលកម្មចំនួន ៥០ម៉ឺនដុល្លារក្នុងមួយសប្តាហ៍។
 

Haaland បានចាកចេញពី Red Bull Salzburg ទៅចូលរួមជាមួយ Dortmund កាលពីឆ្នាំ២០២០។ ក្នុងការបង្ហាញខ្លួន៨៨លើកជាមួយក្រុមអាល្លឺម៉ង់ Haaland អាចរកគ្រាប់បាល់ស៊ុតបញ្ចូលទីបានដល់ទៅ៨៥គ្រាប់៕