រថយន្ត
អន្តរជាតិ
នាយករដ្ឋមន្ត្រីម៉ាឡេស៊ី ព្យាយាមទាក់ទាញ Tesla ឲ្យវិនិយោគរោងចក្ររថយន្តអគ្គិសនីក្នុងប្រទេសខ្លួន
× នាយករដ្ឋមន្ត្រីម៉ាឡេស៊ី លោក Ismail Sabri Yaakob ចង់ឲ្យក្រុមហ៊ុន Tesla បើកដំណើរការរោងចក្ររបស់ខ្លួននៅម៉ាឡេស៊ី។ លោកបានស្នើយ៉ាងដូច្នេះ នាអំឡុងពេលដែលលោកបានអញ្ជើញក្រុមហ៊ុនធំៗមួយចំនួនចំណោមក្រុមហ៊ុនអាម៉េរិកក្នុងបញ្ជី Fortune 500 ទៅទស្សនាប្រទេសរបស់លោក។
បន្ទាប់ពីជំនួបជាមួយលោក Ted Osious អគ្គនាយក និងជាប្រធានក្រុមប្រឹក្សាពាណិជ្ជកម្មអាម៉េរិក-អាស៊ាន (US-ABC) ប្រមុខរដ្ឋាភិបាលម៉ាឡេស៊ី បានស្នើទៅក្រុមហ៊ុន Tesla ឲ្យផលិតរថយន្តអគ្គិសនី EVs នៅទឹកដីរបស់លោក។
«ខ្ញុំបានស្នើទៅក្រុមហ៊ុន Tesla ឲ្យមកវិនិយោគនៅក្នុងប្រទេសម៉ាឡេស៊ី លើការផលិតរថយន្តអគ្គិសនី»។ លោក Ismail បានអះអាងយ៉ាងដូច្នេះទៅកាន់សារព័ត៌មានក្នុងស្រុក ដោយគូសបញ្ជាក់ថា US-ABC ដើរតួនាទីយ៉ាងសំខាន់ក្នុងការទាក់ទាញវិនិយោគិនអាម៉េរិកមកក្នុងតំបន់អាស៊ាន ជាពិសេសម៉ាឡេស៊ី។
យោងតាមការចុះផ្សាយរបស់ Malay Mail លោក Shahrol Halmi ប្រធានក្លិបអ្នកប្រើប្រាស់រថយន្តអគ្គិសនីម៉ាឡេស៊ី (MYEVOC) បានបញ្ជាក់ថា អ្នកប្រើប្រាស់រថយន្តអគ្គិសនីលើផ្លូវថ្នល់ម៉ាឡេស៊ី មានប្រមាណ៥០០គ្រឿង ហើយមនុស្សជាច្រើនបង្ហាញពីឆន្ទះចង់ទិញនាពេលអនាគត។
លោក Halmi បានលើកឡើងថា៖ «ការប្រើប្រាស់រថយន្តអគ្គិសនីនៅម៉ាឡេស៊ី នឹងមានអនាគតដ៏ភ្លឺស្វាង ពីព្រោះមនុស្សជាច្រើន បង្ហាញចំណាប់អារម្មណ៍ទិញឲ្យបាន១គ្រឿង ដោយសារវារលូន និងស្ងប់ស្ងាត់ជាងរថយន្តធម្មតា»។
លោកបានបន្ថែមថា នាពេលបច្ចុប្បន្ន ម៉ាឡេស៊ី ប្រើប្រាស់រថយន្ត EVs របស់ Porsche, BMW, Hyundai, Volvo និង Mercedes-Benz ហើយ Tesla, MG និង Audi ក៏កំពុងចូលក្នុងទីផ្សារផងដែរ ដែលនឹងផ្តល់ជម្រើសកាន់តែច្រើនសម្រាប់អ្នកទិញ៕
© រក្សាសិទ្ធិដោយ thmeythmey.com