COVID-19
ជាតិ
សម្តេច ហ៊ុន សែន៖ រដ្ឋនឹងចេញមុខបង្កើតរោងចក្រផលិតវ៉ាក់សាំងកូវីដ-១៩ បើឯកជនយឺតយ៉ាវ
× ភ្នំពេញ៖ រដ្ឋាភិបាលកម្ពុជា នឹងចេញមុខធ្វើជាដៃគូបង្កើតរោងចក្រផលិតវ៉ាក់សាំងបង្ការកូវីដ-១៩ ដោយផ្ទាល់ ប្រសិនក្រុមហ៊ុនឯកជនដែលទទួលបានសិទ្ធិផលិតយឺតយ៉ាវ ឬមិនហ៊ានវិនិយោគ។ សម្តេច ហ៊ុន សែន គូសបញ្ជាក់ដូច្នេះ បន្ទាប់ពីគម្រោងបង្កើតរោងចក្រផលិតវ៉ាក់សាំងនៅកម្ពុជា គ្មានវឌ្ឍនភាពសោះ។
សម្តេច ហ៊ុន សែន ប្រាប់ឱ្យក្រសួងសុខាភិបាល ពិនិត្យ និងពន្លឿនការងារបង្កើតរោងចក្រផលិតវ៉ាក់សាំងបង្ការជំងឺកូវីដ-១៩ បន្ទាប់ពីប្រមុខរដ្ឋាភិបាល ទទួលព័ត៌មានថា ក្រុមហ៊ុនខ្មែរ ដែលទទួលបានសិទ្ធិផលិតវ៉ាក់សាំង ឆ្លើយតបយឺតយ៉ាវទៅភាគីចិន។ សម្តេច ហ៊ុន សែន លើកឡើងដូច្នេះ ក្នុងពិធីសំណេះសំណាលជាមួយក្រុមគ្រូពេទ្យធីតា ប្រឆាំងកូវីដ-១៩ នៅសាលពិព័រណ៍ជ្រោយចង្វារ នៅថ្ងៃទី១៧ ឧសភានេះ។
ជុំវិញភាពយឺតយ៉ាវនេះ ប្រមុខរដ្ឋាភិបាល បានប្រាប់ឱ្យក្រសួងសុខាភិបាល ពិចារណាដកហូតអាជ្ញាបណ្ណពីក្រុមហ៊ុនឯកជននោះវិញ បើការងារសាងសង់រោងចក្រនេះ គ្មានវឌ្ឍនភាព។ សម្តេច ហ៊ុន សែន សង្កត់ធ្ងន់ដូច្នេះថា៖ «វិស័យឯកជនកម្ពុជា ដែលបានទទួលបានសិទ្ធិ ធ្វើ ឬធ្វើ? បើមិនធ្វើ ត្រូវប្រគល់ឱ្យអ្នកផ្សេងធ្វើ។ អត់មានទុកអ៊ីចឹងទេ។ ខាងចិនគេលើកមកវិញថា ខាងខ្មែរយឺត។ ឥឡូវ(ក្រសួងសុខាភិបាល)ត្រូវមើល! បើមិនធ្វើទេ ដក License (អាជ្ញាបណ្ណ) ប្រគល់ឱ្យក្រុមហ៊ុនណាហ៊ានធ្វើ។ អត់មាន ឱ្យក្រុមហ៊ុនមួយមកវ៉ាងទីទេ។ អត់ទេ! សូមទុកឱ្យអ្នកឯង(ក្រុមហ៊ុន) រយៈពេលប៉ុន្មាន? ខ្ញុំត្រូវការមានរោងចក្រមួយផលិតវ៉ាក់សាំង(កូវីដ-១៩)»។
ទន្ទឹមនឹងសម្តែងការមិនពេញចំពោះភាពយឺតយ៉ាវនេះ ប្រមុខរដ្ឋាភិបាលកម្ពុជា អះអាងថា បើក្រុមហ៊ុនឯកជននៅតែយឺតយ៉ាវ ឬមិនហ៊ានវិនិយោគនោះទេ រដ្ឋាភិបាលនឹងចេញមុខធ្វើការនេះផ្ទាល់ជាមួយភាគីចិនតែម្តង។ «ទុនមាន អត់បញ្ហា! ខ្ញុំបញ្ចេញពីក្រសួងសេដ្ឋកិច្ច និងហិរញ្ញវត្ថុ ឱ្យរដ្ឋផលិតតែម្តង។ ធ្វើជាដៃគូជាមួយនឹងខាងចិន»។ នេះជាការបញ្ជាក់បន្ថែមរបស់ សម្តេច ហ៊ុន សែន មុននឹងបញ្ជាឱ្យលោក ម៉ម ប៊ុនហេង រដ្ឋមន្ត្រីក្រសួងសុខាភិបាល រាយការណ៍ពីវឌ្ឍនភាពនៃការបង្កើតរោងចក្រផលិតវ៉ាក់សាំងកូវីដ-១៩ រៀងរាល់សប្តាហ៍ផងដែរ។
សូមជម្រាបថា កាលពីអំឡុងខែធ្នូ ឆ្នាំ២០២១ សម្តេចនាយករដ្ឋមន្ត្រីកម្ពុជា បានប្រកាសថា កម្ពុជា នឹងបង្កើតរោងចក្រផលិតវ៉ាក់សាំងប្រភេទ ស៊ីណូហ្វាម នៅក្នុងឆ្នាំ២០២២២នេះ ក្រោយទទួួលបានការគាំទ្រពីភាគីចិន។
គិតមកទល់ពេលនេះ កម្ពុជាបានចាក់វ៉ាក់សាំងកូវីដ-១៩ ដូសមូលដ្ឋាន ដល់ពលរដ្ឋបានប្រមាណ១៥លាននាក់ហើយ។ ក្នុងចំណោមនោះ មានជាង៩លាននាក់ បានចាក់នូវដូសទី៣ និងមានជាង ២,២លាននាក់ បានចាក់នូវដូសទី៤៕
Tag:
រោងចក្រ
វ៉ាក់សាំងកូវីដ-១៩
សុខាភិបាល
© រក្សាសិទ្ធិដោយ thmeythmey.com