ភ្នំពេញ៖ រដ្ឋាភិបាល ត្រៀមបោះផ្សាយលក់មូលបត្របំណុល ក្នុងទំហំទឹកប្រាក់ចំនួន១,២ទ្រីលានរៀល(៣០០លានដុល្លារ) នៅក្នុងឆ្នាំ២០២២។ បើតាមលោក ប៉ែន ធីរុង្គ អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ រដ្ឋសម្រេចបោះផ្សាយសញ្ញាបណ្ណ ឬ បណ្ណបំណុលនេះ គឺដើម្បីកៀរគរទុនវិនិយោគពីផ្សារមូលបត្រមកអភិវឌ្ឍសេដ្ឋកិច្ច។
រដ្ឋគ្រោងខ្ចីលុយប្រមាណ៣០០លានដុល្លារ ពីវិនិយោគិនក្នុងស្រុក តាមរយៈការបោះផ្សាយលក់មូលត្របំណុលនៅលើទីផ្សារមូលបត្រកម្ពុជា(CSX) នៅឆ្នាំ២០២២ ដែលមានធនាគារជាតិនៃកម្ពុជា(NBC) ជាភ្នាក់ងារបោះផ្សាយមូលបត្រនេះ។ នេះជាការលើកឡើងរបស់លោក ប៉ែន ធីរុង្គ។
អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុរូបនេះ បានបញ្ជាក់ថា តាមពិតកម្ពុជាមានលទ្ធភាពបោះលក់មូលបត្របំណុលបានចន្លោះពី ២ទ្រីលាន ដល់ ៤ទ្រីលានរៀន(៥០០ទៅ១០០០លានដុល្លារអាម៉េរិក)។
«សមត្ថភាពយើង អាចដល់ប៉ុណ្ណឹងប៉ុន្តែនៅក្នុងច្បាប់យើងដាក់ត្រឹម៣០០លានដុល្លារសិន ព្រោះយើងទុកចន្លោះក្នុងករណីដែលមានតម្រូវការបន្ទាន់ដែលយើងត្រូវការ គឺអាចបោះលក់[ក្នុងទំហំ៥០០ទៅ១០០០លានដុល្លារបាន]»។ លោក ប៉ែន ធីរុង្គ និយាយបែបនេះក្នុងសន្និសីទជាតិស្ដីពីទីផ្សារមូលបត្រកម្ពុជាក្រោមប្រធានបទ៖មួយទស្សវត្សរ៍នៃការអភិវឌ្ឍទីផ្សារមូលបត្រកម្ពុជា និងដំណើរឆ្ពោះទៅមុខ នាព្រឹកថ្ងៃទី១៨ឧសភា។
បើតាមលោក ប៉ែន ធីរុង្គ រដ្ឋសម្រេចបោះលក់មូលបត្របំណុលនេះ មានគោលដៅពង្រឹងការគ្រប់គ្រងតម្រូវការសាច់ប្រាក់របស់រាជរដ្ឋាភិបាល ជាពិសេសឆ្លើយតបនឹងតម្រូវការហិរញ្ញប្បទាន សម្រាប់ការអភិវឌ្ឍសេដ្ឋកិច្ច និងសង្គម រួមទាំងគាំទ្រគម្រោងអទិភាព និងចាំបាច់ផ្សេងៗរបស់រដ្ឋាភិបាល។ លើសនេះ ការបោះផ្សាយមូលបត្របំណុលនេះ ក៏ដើម្បីអភិវឌ្ឍទីផ្សារមូលបត្រ និងហិរញ្ញវត្ថុនៅកម្ពុជាឱ្យកាន់តែប្រសើរផងដែរ ខណៈផ្សារមូលបត្រកម្ពុជាបានដំណើរការអស់រយៈពេល១០ឆ្នាំមកហើយ។
ផែនការនៃការបោះផ្សាយមូលបត្ររដ្ឋក្នុងទំហំ៣០០លានដុល្លារ ដោយប័ណ្ណបំណុលមួយសន្លឹកមានតម្លៃចារឹត២៥០ដុល្លារដែលមានរយៈពេលចាប់ពី៣ឆ្នាំឡើងជាមួយនឹងអត្រាការថេរ។ រដ្ឋនឹងទូទាត់ការប្រាក់ឱ្យវិនិយោគក្នុងរយៈពេល៦ខែម្តង។
លោកបន្តនិយាយដូច្នេះ៖«ចំណូលបានពីការបោះផ្សាយមូលបត្របំណុលហ្នឹង! យើងគ្រោងចាយ[ផ្តល់ហិរញ្ញប្បទាន]ទៅលើឱ្យធនាគាSME, ធនាគារអភិវឌ្ឍន៍ជនបទ និងកសិកម្ម និងគ្រោងផ្តល់ហិរញ្ញប្បទានក្នុងវិស័យសេដ្ឋកិច្ចឌីជីថល...ជាដើម»។
បើតាមលោក អូន ព័ន្ធមុនីរ័ត្ន ក្រៅពីបោះផ្សាយមូលបត្រដើម្បីកៀរគរប្រភពទុនវិនិយោគពីទីផ្សារមូលបត្រហើយនោះ ក៏ដើម្បីបង្កើតឧបករណ៍ហិរញ្ញវត្ថុថ្មី សម្រាប់វិនិយោគិននៅក្នុងទីផ្សារមូលបត្រ ជាពិសេសស្ថាប័នរកស៊ីនៅកម្ពុជា រួមមាន ធនាគារ ក្រុមហ៊ុនធានារ៉ាប់រង, មូលនិធិសោធននិវត្តន៍,មូលនិធិសន្តិសុខសង្គម ជាដើម។
សម្រាប់ឧបករណ៍ហិរញ្ញវត្ថុថ្មីនេះ លោកឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ដាក់ក្តីរំពឹងថា៖ «នឹងទទួលបានការពេញនិយមសម្រាប់ការជួញដូរនៅក្នុងផ្សារមូលបត្រកម្ពុជា និងផ្តល់នូវទិន្នន័យ Benchmark សម្រាប់ការជួញដូរមូលបត្រសាជីវកម្ម និងការវិភាគហិរញ្ញវត្ថុនានា ដូចត្រូវបានអនុវត្តនៅក្នុងប្រទេសដែលមានវិស័យមូលបត្ររីកចម្រើន»។
ជុំវិញនៃការបោះផ្សាយលក់មូលបត្ររដ្ឋនេះ លោក ស៊ូ សុជាតិ អគ្គនាយកនៃនិយ័តករមូលបត្រកម្ពុជា (SERC) លើកឡើងថា ក្រសួងសេដ្ឋកិច្ចអាចនឹងប្រកាសជាផ្លូវការ នាអំឡុងខែមិថុនា ឬខែកក្កដា។ លោកបាននិយាយដូច្នេះ៖« ខ្ញុំគិតថាក្រសួងសេដ្ឋកិច្ច និងហរិញ្ញវត្ថុ អាចនឹងចេញសេចក្តីប្រកាសព័ត៌មានឆាប់ៗនេះ នាខែមិថុនា។ បើមិនអ៊ីចឹងទេ! យ៉ាងយូរនៅខែកក្កដា នឹងមានសេចក្តីជូនដំណឹងជាផ្លូវការ អំពីការបោះផ្សាយមូលបត្រនេះ»។
ជាមួយគ្នានេះ លោក មាស សុខសេនសាន អ្នកនាំពាក្យក្រសួងសេដ្ឋកិច្ច និងហិរញ្ញវត្ថុ បានប្រាប់សារព័ត៌មានថ្មីៗ(ThmeyThmey)តាមទូរសព្ទថា ពេលវេលាជាក់លាក់នៃការបោះផ្សាយមូលបត្ររដ្ឋនេះ លោកពុំទាន់ទទួលបានព័ត៌មានទេ។ ប៉ុន្តែលោកបញ្ជាក់ថា ការបោះលក់មូលបត្របំណុលនេះ រដ្ឋគឺមិនបោះលើសពីទំហំ៣០០លានដុល្លារនេះឡើយ។ អ្នកនាំពាក្យក្រសួងសេដ្ឋកិច្ច និងហិរញ្ញវត្ថុរូបនេះ បាននិយាយដូច្នេះ៖ «យើងអាចបោះមូលបត្រនេះនៅក្រោម៣០០លានដុល្លារ ឬនៅត្រឹម៣០០លានដុល្លារ តែយើងមិនអាចបោះលើសពីនេះទេ។ បើបោះលើស គឺខុសច្បាប់ [ស្តីពីហិរញ្ញវត្ថុសម្រាប់ការគ្រប់គ្រងហិរញ្ញវត្ថុឆ្នាំ២០២២]»។
សូមជម្រាបថា ផ្សារមូលបត្រកម្ពុជា(CSX) ត្រូវបានបើកឱ្យដំណើរការជួញដូរមូលបត្រនៅថ្ងៃទី ១៨ ខែមេសា ឆ្នាំ២០១២។ រយៈពេល១០ឆ្នាំនៃការបង្កើតផ្សារមូលបត្រកម្ពុជានេះ គឺមានក្រុមហ៊ុនចំនួន១៦បានចុះបញ្ជី។ ក្នុងនោះមាន៩ក្រុមហ៊ុន ចុះបញ្ជីបោះផ្សាយលក់ភាគហ៊ុន និង៦ក្រុមហ៊ុនទៀតចុះបញ្ជីបោះលក់មូលបត្របំណុល ឬ សញ្ញបណ្ណ ដែលមានកៀរគរទុនវិនិយោគពីទីផ្សារនេះបានប្រមាណ ២៨១លានដុល្លារ៕