​Salah សញ្ជាតិអេហ្សីបក្លាយជាកីឡាករទីបួនដែលបានបញ្ចប់រដូវកាលរបស់ Premier league មានគ្រាប់ស៊ុតនិងបញ្ជូនបាល់ឱ្យមិត្តរួមក្រុមច្រើនជាងគេ, បន្ទាប់ពីកីឡាករ Andy Cole ឆ្នាំ ១៩៩៣-៩៤, Jimmy Floyd Hasselbaink ឆ្នាំ ១៩៩៨-៩៩ និង Harry Kane ឆ្នាំ ២០២០-២១។ 
 

កីឡាករវ័យ២៩ឆ្នាំរូបនេះ ក្លាយជាកីឡាករឈ្នះស្បែកជើងមាស៣លើកនៅ Premier league ឈរពីក្រោយ អតីតវីរបុរសក្រុម Arsenal លោក Thierry Henry។ Henry ឈ្នះស្បែកមាស ៤លើកនៅ Premier League។
 

Spurs ឈ្នះក្រុមបាតតារាង Norwich City លទ្ធផល ៥-០ មានចំណែកគ្រាប់ស៊ុត ខ្សែប្រយុទ្ធអាស៊ី Heung Min Son ២គ្រាប់។ ឯ Son ក្លាយជាកីឡាករអាស៊ីលើកដំបូង ឈ្នះស្បែកជើងមាស ក្រោយរកបាន២៣គ្រាប់នៅ Premier League រដូវកាលនេះ។
 

ជាលើកទីពីរប្រវត្តិសាស្ត្ររបស់ Premier league ដែលមានកីឡាករ២រូប ឈ្នះពានរង្វាន់ឯកត្តជនស្បែកជើងមាសក្នុងរដូវកាលតែមួយ។ កាលពីរដូវកាល ២០១០-១១ កីឡាករ Carlos Tevez ក្រុម Man City និង Dimitar Berbatov ក្រុម Man United រកបានគ្រាប់បាល់ ២០គ្រាប់ស្មើគ្នា។
 

ដោយឡែកអ្នកចាំទី Alisson Becker ក្រុម Liverpool និង Ederson Moraes របស់ Man City ជាកីឡាករសញ្ជាតិប្រេស៊ីលទាំងពីរ ហើយជាកីឡាករដែលទប់សំណាញ់ទីមិនឱ្យគេស៊ុតចូល(Clean- Sheet) ចំនួន២០ដងដូចគ្នាក្នុងរដូវកាលនេះ។
  

 ជាលើកទីពីរប្រចាំប្រវត្តិសាស្ត្រលីគកំពូលអង់គ្លេស ដែលមានអ្នកចាំទីពីរនាក់ ឈ្នះស្រោមដៃមាសក្នុងរដូវកាលតែមួយ ដោយកាលឆ្នាំ ២០១៣  Petr Cech និង Wojciech Szczesny ធ្វើបាន Clean-Sheet ១៦ ដងស្មើគ្នា៕