កីឡាជាតិ
ជាតិ
វគ្គផ្តាច់ព្រ័ត្រ៖ ភ្នំពេញក្រោន លើកពាន ខេមបូឌានលីគខាប់ ក្រោយឈ្នះ វិសាខា ២-១ ក្រុមភ្នំពេញក្រោនលើកពាន ខេមបូឌានលីគខាប់
×
ដោយ៖ ហៀក ឆក
ក្រុមបាល់ទាត់ភ្នំពេញក្រោន បានយកឈ្នះ វិសាខា ក្នុងលទ្ធផល ២-១ ជំនួបវគ្គផ្តាច់ព្រ័ត្រពានរង្វាន់ ខេមបូឌានលីគខាប់ នាកីឡដ្ឋាន ស្មាត អ អេស អិន ថ្ងៃទី២៨ ឧសភា ។
នៅតង់ទី១ ភ្នំពេញក្រោន បើកការសម្រុកជាខ្លាំងទៅលើ វិសាខា តែពុំមានសំណាងរកគ្រាប់បាល់បាននោះទេ បញ្ចប់តង់ទី១ រក្សាលទ្ធផល ០-០។
ចូលដល់តង់ទី២ កីឡាករ ប្រាក់ ធីវ៉ា ខ្សែប្រយុទ្ធ ភ្នំពេញក្រោន ស៊ុតបំប៉ោងសំណាញ់ទីបាន ១គ្រាប់ នៅនាទី ៥០។ នៅពាក់កណ្តាលតង់ទី២ ក្រុមទាំងពីរមានការប៉ះទង្គិចគ្នាបន្តិចបន្តួច រវាងកីឡាករ Paulo របស់វិសាខា និងកីឡាករ Neto របស់ភ្នំពេញក្រោន ដោយការវិនិច្ឆ័យពីអជ្ញាកណ្តាល ក៏សម្រេចផ្តល់កាតក្រហមដល់កីឡាករ Paulo លើការគ្រវាសដៃ ចំផ្ទៃចំហៀងស្លឹកត្រចៀកខាងឆ្វេងកីឡាករ Neto។
បន្ទាប់ពីទទួលបានកាតក្រហម វិសាខា សល់កីឡាករ ១០ នាក់ប៉ុណ្ណោះនៅលើទីលាន។ ការវាយបកទៅវិញ ដោយនៅនាទី ៨៣ កីឡាករ Khan Mohammed Faeez បានរកគ្រាប់បាល់តាមស្មើ ដោយការតែតបាល់បញ្ចូលទី ក្រោយលើកបាល់ចេញពីជ្រុង ពីកីឡាករ ឆេង ម៉េង។
៤ នាទីក្រោយ ក្រុមភ្នំពេញក្រោន បានវាយសម្រុករកគ្រាប់ទី២ បានសម្រេច ដោយកីឡាករ ជនជាតិជប៉ុន Yudai នៅនាទី ៨៧។ បញ្ចប់ ៩០+៥ តង់ទី២ ភ្នំពេញក្រោន ឈ្នះ វិសាខា ២-១។
ក្លិបបាល់ទាត់ ភ្នំពេញក្រោន ឈ្នះពានរង្វាន់ ខេមបូឌានលីគខាប់ ដំបូងគេ នារដូវកាល ២០២១-២០២២ ខណៈពានទើបនឹងបង្កើត ក្នុងឆ្នាំ២០២២ ចំណែកក្រុមបាល់ទាត់ វិសាខា គ្រងជើងឯករង។
គួបញ្ជាក់ផងដែរ ការប្រគល់ពានរង្វាន់ ខេមបូឌានលីគខាប់ ត្រូវបានធ្វើឡើងនៅកីឡដ្ឋាន ស្មាត អ អេស អិន ដោយមានបំពាក់មេដាយ ចំនួន ៤០ គ្រឿង ដល់កីឡាក គ្រូបង្វឹក និងអជ្ញាកណ្តាល។ សម្រាប់ កីឡាករល្អក្នុងការប្រកួត បានទៅ ប្រាក់ ធីវ៉ា ឈ្នះពានរង្វាន់កីឡាករឆ្នើម ប្រចាំការប្រកួត វគ្គផ្តាច់ព្រ័ត្រ៕
Tag:
បាល់ទាត់កម្ពុជា
លីកខាប់
© រក្សាសិទ្ធិដោយ thmeythmey.com