លោកស្រី ឱម យុវណ្ណឌី ដែលបច្ចុប្បន្នគឺជាទីប្រឹក្សាក្រសួងវប្បធម៌ និងវិចិត្រសិល្បៈ បានប្រាប់សារព័ត៌មានថ្មីៗថា លោកស្រី ដំឡើងស្នាដៃរបាំរឿង “ព្រះបាទជយវរ្ម័នទី៧” នេះឡើង ដោយសារក្ដីគោរព ស្រឡាញ់ និងសេចក្ដីកោតស្ញប់ស្ញែងនូវគុណបំណាច់ របស់ព្រះបាទជយវរ្ម័នទី៧ ដែលបានកសាងជាតិដ៏ថ្កុំថ្កើង ។ ម្យ៉ាងវិញទៀត លោកស្រីយល់ឃើញថា រឿងព្រះបាទជយវរ្ម័នទី៧ មានជាភាពយន្ត និងល្ខោននិយាយរួចហើយ ប៉ុន្តែមិនទាន់មានជាទម្រង់របាំបុរាណ(របាំព្រះរាជទ្រព្យ) ហាក់ដូចជាមិនសម ទើបបានជាលោកស្រី សម្រេចចិត្តដំឡើងស្នាដៃនេះឡើង ជាផ្ទាំងទស្សនីយភាព។
«កុន និងល្ខោននិយាយក៏មាន ប៉ុន្តែជាផ្ទាំងទស្សនីយភាព (របាំបុរាណ)មិនមាន។ ខ្ញុំគិតថាមិនគួរសោះ របាំព្រះរាជទ្រព្យ មិនគួរមិនធ្វើរឿងរបស់ព្រះអង្គ ដែលជាព្រះរាជា។ ខ្ញុំធ្លាប់បានដំឡើងរឿង “ព្រះនាងជ័យរាជាទេវី” និង”ព្រះនាងឥន្ទ្រទេវី” រួចហើយ ក៏មានមហាជនស្នើឱ្យមានធ្វើបន្តសាច់រឿងទៀត ដូច្នេះខ្ញុំក៏ធ្វើរឿង “ព្រះបាទជយវរ្ម័នទី៧” នេះឡើង។»។ នេះជាការបញ្ជាក់បន្ថែមរបស់លោកស្រី ឱម យុវណ្ឌឌី។
លោកស្រី ឱម យុវណ្ណឌី ពាក់អាវពណ៌ឈាមជ្រូក និងសិស្សគណ ក្នុងថ្ងៃសម្ដែងរបាំរឿង ព្រះបាទជយវរ្ម័នទី៧ កាលពីពេលកន្លងទៅ
ដំណើរការនៃការដំឡើងស្នាដៃរបាំរឿង “ព្រះបាទជយវរ្ម័នទី៧” ត្រូវបានគ្រូបង្រៀនរបាំក្បាច់បុរាណខ្មែរ ឱម យុវណ្ណឌី ពន្យល់ថា លោកស្រីបានចំណាយពេលសរសេរអត្ថបទរឿង រួមទាំងចម្រៀងផង ប្រមាណតែ១សប្ដាហ៍ប៉ុណ្ណោះ។ ដោយឡែកទម្រាំអាចសរសេរជាសាច់រឿងបាន លោកស្រីបានចំណាយពេលយ៉ាងយូរ ស្រាវជ្រាវឯកសារដែលពាក់ព័ន្ធ ជាមួយព្រះបាទជយវរ្ម័នទី៧ ដើម្បីធ្វើឱ្យស្នាដៃនេះត្រឹមត្រូវតាមប្រវត្តិសាស្ត្រ។ ទោះជាយ៉ាងណា នៅពេលដែលដំឡើងស្នាដៃជារបាំ លោកស្រីក៏ចំណាយពេលច្រើនដែរ។
ទៅលើក្បាច់ក្នុងរបាំរឿង “ព្រះបាទជយវរ្ម័នទី៧” វិញ អតីតនាដការបាំបុរាណរូបនេះ បានបញ្ជាក់ថា លោកស្រីបានយកមូលដ្ឋានគ្រឹះ នៃក្បាច់របាំខ្មែរទាំង៤៥០០ក្បាច់ មកច្នៃបង្កើតថ្មី ដើម្បីឱ្យក្បាច់កាន់តែមានភាពស្រស់ស្អាត។
តួ ព្រះបាទជយវរ្ម័នទី៧ មានពាក់មកុដ និងនាដការបាំបុរាណជាកុមារ
យ៉ាងណាក៏ដោយ សិល្បករដែលត្រូវបានជ្រើសរើសមករាំក្នុងរបាំរឿង “ព្រះបាទជយវរ្ម័នទី៧” ភាគច្រើនមិនមែនជានាដការបាំអាជីពឡើយ។ ប៉ុន្តែដោយក្ដីស្រឡាញ់ ពួកគេដែលអ្នកខ្លះបានរៀនរបាំបន្តិចបន្តួច ក៏ចូលខ្លួនមកហាត់រៀនយ៉ាងស្វិតស្វាញ ដើម្បីអាចសម្ដែងក្នុងស្នាដៃមួយនេះបាន។
លោកស្រី យុវណ្ណឌី ពន្យល់បន្ថែម៖«អ្នកហាត់មានតែថ្ងៃសៅរ៍និងអាទិត្យ ហើយថ្ងៃខ្លះបានតែមួយព្រឹកទៀត ព្រោះគាត់រវល់ ហើយខ្លះជាប់រៀន។ អ្នករាំភាគច្រើន គាត់រៀននៅសាលាបណ្ដុះបណ្ដាលផ្សេងៗ។ តួព្រះបាទជយវរ្ម័ន ចូលហាត់របាំអាយុ១៤ឆ្នាំហើយ កាលនោះខ្ញុំមិនចង់ទទួលគាត់ទេ ព្រោះអាយុច្រើនពេក ប៉ុន្តែគ្នាស្រឡាញ់ ហើយគាត់ប្រឹងប្រែងហាត់។»។
លោក យ៉ាន់ បូរិន សិល្បករចម្រៀងបុរាណ (ឈរកណ្ដាល) រួមទាំងសិល្បករសម្ដែងល្បុកតោ
សូមបញ្ជាក់ថា កន្លងទៅលោកស្រី ឱម យុវណ្ណឌី ធ្លាប់បានដំឡើងស្នាដៃរបាំ “ហ្លួងព្រះស្ដេចកន” “ព្រះនាងឥន្ទ្រទេវី” ហើយបច្ចុប្បន្នលោកស្រីទើបតែបានដំឡើងរឿង “ព្រះបាទជយវរ្ម័នទី៧” ។
ក្រៅពីរឿងខាងលើ គ្រូរបាំបុរាណលោកស្រី ឱម យុវណ្ណឌី នៅមានរបាំរឿងជាច្រើនទៀត ដែលលោកស្រីបានគិត និងសរសេរជាអត្ថបទរួចជាស្រេច ប៉ុន្តែលោកស្រីនៅខ្វះថវិកា និងធនធានមនុស្ស ក្នុងការដំឡើងស្នាដៃទាំងនោះ។ បន្ថែមពីនោះលោកស្រីក៏បានបង្ហើបដែរថា លោកស្រីមានគម្រោងក្នុងការដំឡើងរបាំ “រំដួលរតនៈជាតិ”។ របាំនេះលោកស្រី មានបំណងចង់ធ្វើឱ្យកាន់តែមានប្រណីតភាព ព្រោះដើម្បីទុកជាសម្បត្តិសម្រាប់ជាតិ៕