ជំងឺអុតស្វានេះ មានរោគសញ្ញា កន្ទួល ពងបែកនៅលើស្បែក បាតដៃ បាតជើង និងលើមុខ ក្នុងនោះក៏មានគ្រុនក្ដៅលើស ៣៨.៥ អង្សាសេ ឡើងកូនកណ្ដុរ ឈឺខ្នង ឈឺសាច់ដុំក្នុងរយៈពេលជាច្រើនសប្ដាហ៍។
 

CDC បានបញ្ជាក់ថា ៖«បើបុគ្គលណាមានរោគសញ្ញាសង្ស័យ សូមទៅពិគ្រោះជំងឺនៅមន្ទីរពេទ្យដែលនៅជិតបំផុត ឬទូរស័ព្ទលេខ ១១៥»។

 

ជំងឺអុតស្វា ឆ្លងពីអ្នកដែលប៉ះពាល់រាងកាយផ្ទាល់ ឬអ្នកមានរោគសញ្ញានៃជំងឺតាមរយៈការទំនាក់ទំនងរួមភេទគ្មានសុវត្ថិភាព ការប្រើសម្លៀកបំពាក់ សម្ភារ ឬបរិភោគឡូកឡំគ្នា ទឹកមាត់អ្នកមានជំងឺ និងឆ្លងពីម្ដាយទៅកូន នាអំឡុង ឬក្រោយឆ្លងទន្លេ​ តាមរយៈប៉ះស្បែក។ វីរុសនេះមាននៅលើសត្វកកេរព្រៃ ដែលមានជាប្រចាំនៅអាហ្វ្រិកខាងលិច និងកណ្ដាល ហើយបច្ចុប្បន្ន ជំងឺនេះ កំពុងឆ្លងនៅទ្វីបអឺរ៉ុប អាមេ៉រិក និងកាណាដា។

 

យ៉ាងណាមិញជំងឺអុតស្វានេះ ក៏មានវិធីការពារដែរ ដោយត្រូវរក្សាអនាម័យខ្លួនប្រាណឱ្យបានស្អាត លាងដៃជាប្រចាំជាមួយសាប៊ូ អាល់កុល ឬជែល និងរក្សាអនាម័យផ្លូវដង្ហើម។ ចៀសវាងការប៉ះដោយផ្ទាល់ជាមួយអ្នកជំងឺអុតស្វា ត្រូវប្រើស្រោមអនាម័យពេលរួមភេទ បរិភោគអាហារសុខភាព និងចម្អិនឱ្យបានឆ្អិនល្អ។ ចៀសវាងការប៉ះពាល់ជាមួយសត្វរស់ ឬងាប់៕