អាម៉េរិក និងតៃវ៉ាន់ នៅថ្ងៃទី១ ខែមិថុនា បានសម្ពោធគំនិតផ្តួចផ្តើមពាណិជ្ជកម្មសតវត្សរ៍ទី២១ ។ គម្រោងមួយនេះ ត្រូវបានបង្កើតឡើង ដើម្បីពង្រឹងទំនាក់ទំនងពាណិជ្ជកម្ម និងសេដ្ឋកិច្ចទ្វេភាគី, ពង្រីកអាទិភាពពាណិជ្ជកម្មទៅវិញទៅមក ដោយផ្អែកលើគុណតម្លៃ និងលើកតម្កើងគំនិតច្នៃប្រឌិត រួមទាំងកំណើនសេដ្ឋកិច្ចក្នុងវិស័យការងារ និងធុរកិច្ចរបស់ភាគីទាំងពីរ។ 

 

មួយថ្ងៃបន្ទាប់ពីការសម្ពោធខាងលើ ក្រសួងពាណិជ្ជកម្មចិន បានចេញមុខជំទាស់យ៉ាងខ្លាំង និងជំរុញឱ្យអាម៉េរិកគ្រប់គ្រងពាណិជ្ជកម្មទ្វេភាគីជាមួយតៃវ៉ាន់ឱ្យបានត្រឹមត្រូវ។ 

 

«អាម៉េរិក គួរតែគ្រប់គ្រងឱ្យបានប្រុងប្រយ័ត្នចំពោះទំនាក់ទំនងពាណិជ្ជកម្ម និងសេដ្ឋកិច្ចជាមួយតៃវ៉ាន់ ដើម្បីបញ្ចៀសការបញ្ជូនសញ្ញាខុសទៅកាន់កម្លាំងគាំទ្រឯករាជ្យ»។ លោក Gao Feng អ្នកនាំពាក្យក្រសួងពាណិជ្ជកម្មចិន បានសង្កត់ធ្ងន់បែបនេះ នៅក្នុងសន្និសីទសារព័ត៌មាន ដែលធ្វើឡើងតាមប្រព័ន្ធវីដេអូនៅថ្ងៃទី២​ ខែមិថុនា។ 

 

ទន្ទឹមនេះ មន្រ្តីក្រសួងពាណិជ្ជកម្មចិន បានបន្តថា ចិនមិនទទួលស្គាល់រាល់គ្រប់ទម្រង់នៃទំនាក់ទំនងរវាងកោះតៃវ៉ាន់ ជាមួយបណ្តាប្រទេសផ្សេង ដោយរួមទាំងការចរចា និងការចុះហត្ថលេខាលើកិច្ចព្រមព្រៀងពាណិជ្ជកម្ម រួមទាំងសេដ្ឋកិច្ច។ 

 

គំនិតផ្តួចផ្តើមតៃវ៉ាន់-អាម៉េរិកលើពាណិជ្ជកម្មសតវត្សរ៍ទី២១ ដែលផ្តោតលើការសម្របសម្រួលពាណិជ្ជកម្ម, កសិកម្ម, ប្រឆាំងអំពើពុករលួយ ពាណិជ្ជកម្មបែបឌីជីថល និងវិស័យផ្សេងទៀតនេះ ត្រូវបានតៃវ៉ាន់សង្ឃឹមថា ជាការត្រួសត្រាយផ្លូវសម្រាប់រដ្ឋាភិបាលក្រុងតៃប៉ិ ក្នុងការចូលរួមក្របខណ្ឌសេដ្ឋកិច្ចឥណ្ឌូ-ប៉ាស៊ីហ្វិក។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។ 

 

បន្ទាប់ពីគំនិតផ្តួចផ្តើមត្រូវបានប្រកាស នាយករដ្ឋមន្រ្តីតៃវ៉ាន់ លោក Su Tseng-chang បានប្រាប់គណៈរដ្ឋមន្រ្តីរបស់ខ្លួនថា កោះតៃវ៉ាន់ មានតួនាទីដ៏សំខាន់សម្រាប់ច្រវាក់ផ្គត់ផ្គង់សកល។ ដោយផ្អែកលើហេតុផលនេះ លោក Su បានលើកឡើងថា នេះជាហេតុផល ដែលអាម៉េរិក ត្រូវតែពង្រឹងសេដ្ឋកិច្ច និងពាណិជ្ជកម្មរបស់ខ្លួនជាមួយតៃវ៉ាន់ ដើម្បីភាពរឹងមាំ ការស្តារឡើងវិញ និងសន្តិសុខនៅក្នុងច្រវាក់ផលិតកម្មសកល។ 

 

បើតាមប្រមុខរដ្ឋាភិបាលកោះតៃវ៉ាន់ ដោយសារតែសង្រ្គាមនៅអ៊ុយក្រែន វាបានបង្ហាញយ៉ាងច្បាស់ពីតួនាទីរបស់ក្រុងតៃប៉ិនៅលើឆាកអន្តរជាតិ។ តៃវ៉ាន់ គឺជាដែនដីមួយ ដែលផលិតសឺមីកុងឌុចទ័រ (Semiconductor) ដ៏សំខាន់ ខណៈបណ្តាប្រទេសផ្សេង កំពុងខ្វះខាតវា ដើម្បីយកទៅផលិតរថយន្ត និងឧបករណ៍បច្ចេកវិទ្យាផ្សេងៗ៕